МагъчIваялъе рес

ЧIужугIаданалде хIал гьабиялъул гIайиб гIунтIизабулеб буго полициялъуласде


Гьал къоязда Дагъистаналъул инсанасул ихтиярал цIунулеб «Правозащита» идараялъул вакилзабаз лъазабуна полициялъул хIалтIухъанас 22 сон барай ясалда хIалгьабунилан. Гьеб хIужжаялда хурхун къуваталъул идарабаз такъсиргьабиялъул иш рагьунгутIиялдаса разигьечIолъи загьир гьабулеб буго инсанасул ихтиярал цIунулез.

Дагъистаналъул инсанасул ихтиярал цIунулеб «Правозащита» идараялде МахIачхъалаялдаса ПатахIова Асияца жиндир гьалмгъалда полициялъул хIалтIухъанас хIал гьабуниланги абун гIарза бачIун буго. ПатахIовалъул рагIабазда рекъон 24 августалъул радакь 4 тIубараб мехалда гьелъул рокъове вачIун вуго мехтарав полициялъул хIалтIухъан. Руччабиги лъималги гурони рокъоб гьечIеб бакIалдеги вачIун гьев полициялъул хIалтIухъанас туманкIги къватIибе бахъун гьенир ругезе хIинкъалаби кьезе лъугьун вуго. Гьелдаса хадуб руччабазул гьурмазда ригъун рукIарал пардавал рахъун руго гьес. Жив полициялъул хIалтIухъан вугин аби гурони тIокIал киналгIаги баяналги кьечIого гьес жиндаго цадахъ ячун ун йиго ПатахIовалъул гьалмагъ.

6-7 сагIаталдасан йиччан ячIун йиго гьей яс, гьебщинаб заманалъ Дагъистаналъул жанисел ишазул экстремизмалде данде чIараб централда бугеб жиндирго кабинеталъуй чIезаюн йикIун йиго гьей къуваталъул идарабазул хIалтIухъанас. Гьенибго живго хIалтIулеб рокъоеги ячун хIалги гьабун бугин гьелдайилан хъвалеб буго «Правозащитаялде» бачIараб гIарзаялда. Рогьо-ничалдаса цIуниялъе гIоло гьей хIал гьабурай ясалъул цIар бицунеб гьечIо инсанасул ихтиярал цIунулез. Гьез кьурал баяназда рекъон гьей гIаданалъул рос вукIун вуго изнугьечIого яргъидгIуцIаразул кьеразул вукIарав чи ва лъагIалица цеве хасал тадбирал тIоритIулеб мехалда чIван вуго гьев. Гьаб сагIаталда гIемер хIинкъиялъ кIалъазецин кIолеб гьечIин гьей хIал гьабурай ясалда, сахлъиялъул рахъги гьелъул гьаб сагIат расги лъикIаб гьечIин лъазабулеб буго инсанасул итиярал цIунулез.

Гьез бицухъе цебехун рехсараб хIалгьабиялъул хIужаялда хурхун гIарзаги хъван гьел ун рукIун руго Дагъистаналъул цIех-рехалъул идараялде. Амма гьеб идараялда инсанасул ихтиярал цIунулезда бичIчIизабун буго гьеб гIарза кьей гIададисеб иш бугилан, гьеб ишалъе цебетIей щоларилан. Кин букIаниги гьеб гIарза босизабунин жидеца цIех-рехалъул идараялдайин, амма гьелда хурхун кинаб букIаниги цIех-рех яги такъсиргьабиялъул иш рагьиялда божилъи гьечIин жидерилан лъазабулеб буго «правозащитаялъулаз».

Дагъистаналъул цIех-рехалъул идараялъул пресс-хъулухъалъул бетIер заманалъ хисулев Егор Балашовас «Эркенлъи» радиоялъулгун букIараб гара-чIвариялда лъазабуна жидер идараялда гьев низамцIунулес хIалгьабиялда хурхун щибниги лъаларила. Гьединал баянал жидехъе кьолев чиги ккечIила. Гьелда бан гIарза бачIун батани, гьелдаса хадуб байбихьизе кколила цIех-рехилан.

Инсанасул ихтиярал цIунулеб «Мемориал» идараялъул дагъистаналда бугеб бутIаялъул хIалтIухъабаз «Эркенлъи» радиоялъе баян гьабуна жидехъе рачIунел гIарзазул бищун цIикIкIараб къадар букIунила гьел къуваталъул идарабазул хIалтIухъабаз ккурал яги туснахъ гьаруразул ихтиярал хвезариялда тIасанилан. Гьединго «Мемориалалъ» лъазабулеб буго жидехъе низамцIунулез хIалгьабиялда хурхун жеги цониги гIарза бачIун букIинчIилан.

Адвокат ва гIемерал саназ батIи-батIиял инсанасул ихтиярал идарабазда хIалтIарай Елена Денисенкоцаги «Эркенлъи» радиоялъулгун букIараб гара-чIвариялда абуна къуваталъу идарабазул хIалтIухъабаз гIадамазул ихтиярал хвезариялъул хIакъалъулъ жинда чанги баянал лъалин, амма гьеб хIал гьабиялъул хIужжа тIоцебе дандчIвалеб бугилан.

Елена Денисенко: «Гьединаб гIорхъолъа араб ишалъул хIакъалъулъ дида тIоцебе рагIулеб буго. ГIемер рукIуна низамцIунулез ихтиярал хвезариялъул хIужжаби, амма гьеб хIал гьабигун дун жеги дандчIван йикIинчIо. Полициялъ ккурал яги туснахъалда ругел руччаби рухулеллъи, гьездаса кIазал рахъулебги, хIал гьабун гъулбасал гьаризе тIамулеллъи лъала дида. Гьединал хIужаби дандчIвала, амма гьел гIемер рукIунаро, аслияб къагIидаялъ гIазаб кьолел инжит гьарулел рукIуна туснахъалда ругел бихьинал. Гьедин низамцIунулез къанун хвезабулеб бугони, гьелда хурхун гIарзаги хъван бугони, россилъул къанунулда рекъон цIех-рехалъул идараялда тIадаб буго гьелда сверун хасаб цIех-рехги, халгьабиги байбихьизе. Гьез низамцIунулез къанун хвезабун букIиналъул хIужаби тIатинаруни такъсиргьабиялъул ишги рагьизе ккола. Амма Дагъистаналда гьеб иш билълъунаро, гьаниб къуваталъула идарабазул хIалтIухъабазде данде щибниги гьабуларо. Къануналда рекъон цIех-рехалъул идарабазда тIадаб буго гьел хасал идараабзул хIалтIухъабаз къанун хвезабиялда хурхун гьабураб халгьабилъул хIасилал адвокатасда рихьизе, амма жеги цониги нухалъ гьел баянал щвечIо дихъе. Цойгидал адвокатазги щванин абулеб рагIичIо».

Полициялъулас хIалгьабиялъул хIужаялда хурхун интернеталдаги гIемерал бахIсал руго. Масала, Facebook социалияб сайталда хъвадарулезул цо-цояз гьев низамцIунулев чIвазе кколин, цойгидазе мисаллъун букIине гьев инжит гьавизе кколиниланцин хъвалеб бугоан. Гьединго гIемерав чияс хъвалеб буго къуваталъул идарабазда божилъиги гьечIила, къанун цIунизе тараз къанун хвезабулеб бугелъул, гьезие гIадлу гьабулеб жамгIияб идара гIуцIизе кколилан.

XS
SM
MD
LG