МагъчIваялъе рес

Дагъистаналда тIобитIана тIоцебесеб «Лъел байрам»


Гьал къоязда МахIачхъалаялда тIоритIана спорталъул лъел тайпабазул къецал. Гьенир гIахьаллъизе рачIун рукIана батIиял пачалихъаздасацин гIадамал. Тадбир гIуцIараз абулеб буго Дагъистанаалда цохIо спорталъул рагъулал тайпабазде гурони кIвар кьоларила, гьездаго цадахъ спорталъул лъел тайпабаздеги кIвар кьуни, лъикIал хIасилал рихьизаризе киналго ресал ругила республикаялдайилан.

Гьал къоязда гIадатаияб гуреб чIаголъи лъугьун букIана МахIачхъалаяда Каспий ралъдал рагIалда. ЦIакъ гIемерав чи вакIарун вукIана гьениве ралъдадасан роржанхъулел кайтсерфералги, батIи-батIиял гумиги, лъеда тIад бугеб хъорщодаги рекIун трюкал рихьизарулел чагIазухъги балагьизе.

Гьединаб лъел байрам Дагъистаналда тIоцебе тIобитIулеб бугин, гьединлъидал гIемерав чи вакIарун вугин гьелъухъ балагьизейилан бицана гьеб тадбир гIуцIараз.

​«Лъел байрам» гIуцIун буго Дагъистаналъул спорталъул лъел тайпабазул федерациялъ ва ОАО «РусГидро» компаниялъул Дагъистаналда бугеб бутIаялъги. Цебе киданиги тIоритIун рукIинчIел гьединаб байрамги къецалги гьариялъе аслияб гIиллалъун бугила спорталъул гьел тайпабаздехун гIадамазул гъира бижизе, гьел тIитIизари ва туризм цебетIезабийилан бицана «Эркенлъи» радиоялъулгун букIараб гара-чIвариялда церехун рехсарал тадбирал гIуцIарав Дагъистаналъул спорталъул лъел тайпабазул федерациялъул нухмалъулев ГIумаров Мухтарица.

Мухтар ГIумаров: «Гьаб кинабго гIуцIун букIана спорталъул лъел тайпабиги, лъеда хIухьбахъи гьабиги, туризмги цебетIезабияъе гIоло.

Цого-цо спорталъул рагъулал тайпабазде кIварги кьун кидал лъагIан нилъ рукIинел. Гьел спорталъул лъел тайпаби церетIезариялъе кинал рокьаниги тIабигIиял ресал руго нилъер, цохIо гIарцулал ресал ратизе хутIун руго. ЦохIо «РусГидро» ялъ дагьабго кумек гьабуна нижее гьал тадбирал тIоритIулаго, хутIараб жо нижерго бажариялдалъун гIуцIана.

Нижер байрам бугеб мехалда халкъазда гьоркьосеб «Золотой Ногтоус» абураб гIисинал гумузда гьоркьоб тIобитIулел къецазул цо бутIаги букIана гьаниб. Гьелъулъ гIахьаллъи гьабизе Казахстаналдаса, Украинаялдасацин гумиги рачIун рукIана, Дагъистаналдаса «Аврора» йилан абураб гамаги букIана гьениб гIахьаллъулеб.

Гьел гумузухъ балагьизеги цIакъ гIемерав чи вачIун вукIана, гьединго лъетIа роржанхъулел, гьенир трюкал гьарулел кайтсерферазухъ балагьунги хаган хутIун рукIана гIемерисел.

Гьеб киналъго бихьизабулеб буго гIадамазул гьелде гъира букIин, гьанже гьелъие къваригIунеб жо буго дагьабго кумек. ТIалъиялъ квербакъилин хьул буго дир, тIадеялъулалда гьез кумекги гьабун дагьабги кутакалда тIобитIилин гьай байрамиланги».

Гьединго Мухтар ГIумаровас «Эркенлъи» радиоялъе бицана лъицаниги кумекги гьабичIого жиндица нухмалъи гьабулеб Дагъистаналъул спорталъул лъел тайпабазул федерациялда цебе гIуцIун бугила лъимал гьеб спорталъе куцалеб «Парус»илан абураб гIуцIиги.

Гьенире рачIине бокьарал лъималазул 4 бутIагицин куцазе рачине рес гьечIила жидерилан. Гьезие къваригIунел сурсатал камун ругила, гьел росизе гIарацги гьечIила жидерилан.

Жидее хIалтIизе ресал чIезаруни цо чанго соналдасан Дагъистаналъул лъималаз спорталъул лъел тайпабазулъ лъикIал хIасилал рихьизаризе ругин абуна ГIумаров Мухтарица.

Церехун бицарал тадбиразулъ гIахьаллъизе рачIун рукIана Украинаялдаса ва Казахстаналдаса I2 спортсмен. Казахстаналъул Актау шагьаралдаса кайтсерфер Кудяков Павелица «Эркенлъи» радиоялъулгун букIараб гара-чIвариялда абуна гьадинал лъикIал тIабигIиял ресалги рукIун Дагъистаналда спорталъул лъел тайпаби церетIезарунгутIи гьеб такъсир бугилан.

Кудяков Павел: «Дун кайтсерфингалде вуссун I2 сон ана. Гьеб буго спорталъул лъел тайпабазда гьоркьоб гIолохъанабин абизе бегьулеб тайпа. Чанги бакIаздеги щвана дун кайталда рекIинеялъе гIоло, амма Каспий ралъадгIадаб гьелъие гьава –бакъ рекъараб бакI дида кибго батичIо.

Дида бичIчIула гьеб кайтсерфингги цойгидал спорталъул лъел тайпабиги церетIеялъе гIемераб гIарац къваригIунеблъи, гьезие хIажатал сурсаталги гIезегIан хириял жал рукIуна, амма гьадинал ресалги рукIун гьезде кIвар кьечIого тей дир пикруялда рекъон такъсирчилъи буго.

Дир гIагараб Актау шагьаралдаги МахIачхъалаялдаги гIадал ресал кирниги гьечIо гьеб спорт цебетIеялъе, тIубараб лъагIалица гьоркьоб къотIичIого лъелъе лъугьине бегьулеб гьава-бакъ букIуна гьениб».

«Лъел байрам» гIуцIараз лъазабуна жидер кIудияб хьул бугила щибаб санайил гьел тадбирал тIоритIун бажаринилан абун. Гьелъие квербакъи гьабейилан абун къагътал хъван ругила жидеца Дагъистаналъул спорталъул министрасухъеги, МахIачхъалаялъул администрациялдегийилан. Амма жеги цониги гьеб идараялдаса гьел кагътазе жаваб бачIинчIилан.

XS
SM
MD
LG