МагъчIваялъе рес

КIиго батIияб пачалихъалъул вакил тIатинавизе гьавизе вуго


Ункъабилеб августалдаса байбихьун россиялда хIалтIизе лъугьана кIиго батIияб пачалихъалъул гражданство бугев чиясда хъитIулеб къанун. Гьанже гьединаб гражданство бугев чиясул гьеб бахчизе изну букIине гьечIо. Кинаб букIараб гьелъие хIажалъи ва гьелда тIасан экспертазул пикраби кинал ругелали?

КIиго батIияб пачалихъалъул гражданство бугел гIадамаца гьалдаса хадуб гьеб бахчулеб бугони гтьел тамихIалде цIазе руго Россиялда. Гьединаб къанун хIалтIизе биччана президент Путинил гъулбасалда гъоркь Россиялда ункъабилеб августалдаса байбихьун.

КIиго батIияб гражданство бугел чагIаз гьелъул хIакъалъулъ лъазабизе ккола гьев гIумру гьабун вугеб бакIалъул миграциялъул хъулухъалда, бахчулев чи ккани гьесда тIад тамихI гьабизе 200 азарго гъурущ гIакIа яги 400 сагIаталъ жамагIаталъул хIалтIаби гьари. Гьеб къанун къабул гьабуна Пачалихъияб Думаялъ 23 маялда ва 28 маялда Федералияб Шураялъ ритIухъги гьабуна.

Кинаб хIажалъи букIараб гьединаб къанун къабул гьабизеян абураб суал кьуна нижеца экспертазе ва къватIисеб пачалихъалда цо заманалъ гIумру гьабун рукIарал чIагIаздаги.

Гьеб къанун къабул гьабизе заман цебего щун букIанилан рикIкIунеб буго МахIачхъалаялдаса юрист Сулейманов Сулейманица. ГьабсагIат дунялалда бугеб хIалуцараб ахIвал-хIалалъ бихьизабулеб бугин кIиго батIияб пачалихъалъул гражданство бугони пачалихъалда жаниб гIадлу букIунареблъи.

Сулейманов Сулейман: «Юридикияб рахъалаждса балагьани гьеб бегьулеб жоцин гуро, кIиго батIияб паспорт чиясул букIине. КIиго батIияб гражданство бугони ва кIиябго пачалихъалъул жинди -жиндир къануналги ругони кинаб къануналда рекъон гьев чи хIалтIизе кколев. Гьеб дагьабги загьирлъана гьаб ахираб заманалда.

Мисалалъе гIемерисел россиялъулазул рукIана Израилалъул, Франциялъул ва Германиялъул гражданство. Гьанже гьел киналго пачалихъал Россиялда данде руго.

Гьеб цо. КIиабизе бугони гьел кIиго батIияб гражданство бугел гIадамал тIалъиялда рачIинеги бегьула, гьеб гьукъун гьечIелъул. Гьелъги кантIизе гьаруна гьел кIиго батIияб пачалихъалъул вакил вукIине бегьуларин абураб жоялде. Наккдалъ бахчун варани тIубаларелъул гьеб кида-къадги къватIибе загьирлъизе кколеб букIараб жо буго.

ТIалъиялъулгун хурхен бугел чагIазе захIматаб къанун буго гьеб, гIадатиял гIадамазе, мисалаъе магIарда вугев вехьасе кIиго батIияб паспорт хIажалъуларо».

КъватIиса хIукуматалде бизнес бугел ва гьенибе бухьен цIикIкIарал гIадамал тIатинаризелъун ургъун гьабураб хIалтIи кколин гьеб Путинилилан рикIкIунеб буго Гъуниб мухъалдаса Юсупов МухIамадицаги. Гьев чанго соналъ вукIана къватIиса хIукуматалда гIумру гьабун, амма кIиго батIияб гражданство гьабизе ккун букIун гьечIо гьес

Исупил МухIамад: «Ахираб заманалда жаниб жугьутIаз гIарацги къватIибе баччун гIемераб жо буго гьабулеб, дандекколареб, гьелда данде гьабулеб рагъ буго Путинил. Гьеб битIунги буго».

Россиялда гьеб къанун хIалтIизе лъугьине буго кIиго моцIидасан. Улкаялъул цIиял субъектал Крым ва Севостополалда гьеб къуваталде лъугьине буго 2016 соналъул январалдаса байбихьун.

XS
SM
MD
LG