Газа секторалъул Сахлъи цIуниялъул министерлъиялъ лъазабун буго, талат къоялда израилалъулазулгун унел тунка-гIусиязда хванин нусгоялдасаги цIикIкIун чи. Израилалъ тасдикъ гьабуна талат къоялъул операция тIобитIулеб мехалда жидерго щуго солдат хвей.
Гьужум байбихьаралдаса кинавгIаги хун рагIула 1156 чи, лъукъун вуго 6700 гIанав чи. Гьединаб хIисаб бачунеб буго Палестинаялъул сахлъи цIуниялъул идараялъул лъазабиялда
Жидерго территориялде ХIАМАС гIуцIиялъ ракетаби риччай чIезабизеян абун 8 июлалъ Израилалъ байбихьана рагъулаб операция. Израилалъул территориялде яргъид гIуцIрал рачине рес кьолел туннелал хвезариялъул операция байбихьана 18 июлалда.
ДПА агентлъиялъул лъазабиялда рекъон, ХIАМАС ва «Исламияб жигьад» гIуцIиял хIадурал рагIула, Израилалда кьабиял щвезари 48 сагIаталъ гьоркьоб къотIизабизе.
Гьеб рекъел, ООНалъ тIалаб гьабухъе,, халат бахъинабизе рес бугин 72 сагIаталде щвезегIанин лъазабулеб буго Палестина эркен гьабиялъул гIуцIиялъул вакилас.