МагъчIваялъе рес

Газаялда чlван вуго Израилалъул 13 ва Палестиналъул 87 чи


Газа, 21 июль 2014

Газа секторалда гьатIан къоялда израилалъул аскариязда ва ХIАМАСалда гьоркьор рукIарал рагъазда хун вуго Израилалъул 13 солдат. Гьедин лъазабулеб буго Израилалъул улка цIуниялъул министрелъиялъ. Кинабниги гьеб рагъулаб операция байбихьаралдаса Израилалъул хун вуго 18 солдат.

Палестиналъулазул гьатIан къоялда Газа секторалда чIван вуго 87 чи. Регионалда рагъулаб операция унеб бугелдаса кинабниги хун вуго 425 чи, лъукъун вуго кIиазаргогIан. Гьедин лъазабулеб буго Палестиналъул нухмалъиялъ.

ГьатIан къоялда БагIараб Хъанч идараялъул инициативалда рекъон, гьеб регионалда лъазабун букIараб заманалъулаб гуманитарияб рекъелги хвезабун буго. БагIараб Хъанчалъе къваригIун букIана гьениса лъукъаралги хваралги нахъе росизе.

ХIАМАСалъ жидер территориялде ракетаби кьвагьиялъе жаваб хIисабалда 8 июлалда Израилалъ байбихьун буго Газа секторалда рагъулаб операция. Ракьалда тIад операция байбихьилалде Израилалъ 10 къоялъ авиакьабиял щвезарулел рукIана палестиналъул яргъидгIуцIаразул позициязда, амма Газаялдаса гьарулел ракетазул кьабиял лъугIун гьечIо.

XS
SM
MD
LG