Украиналъул аскарияз рузман къоялъ тIубан сверун ккун буго Донецк икълималъул Словянск шагьаралда гъоркьехун бугеб Николаевка росу. Гьенир сепаратисталгун рагъ халат бахъунеб букIана хамиз къоялдаса нахъе.
Авиациялъ ва артиллериялъ кьваби щвезабун тIубанго биххизабун буго Николаевка ва мадугьалихъ бугеб Семеновка росабалъ сепаратистазул анлъго чIовудабакIги ярагъгун кьвагьулел жал цIунулел бакIалги. Контроль чIезабун буго «Харьков-Ростов» шагьранухдал бутIаялда тIадги. Гьедин лъазабулеб буго Украинаялъул машрикъалъул рахъалда унеб антитеррористияб операциялъул пресс-хъулухъалъ.
Гьезго лъазабухъе, хун вуго кIиго аскарияв, лъукъун вуго ункъгояв. Сепаратистазул хун вуго 150 ялдаса цIикIкIун чи. Гьеб баян уяблъун гьабулеб лъидаго бачIеб информация гьечIо.
15 апрелалдаса нахъе Луганск ва Донецк икълимазда антитеррористияб
операция байбихьаралдаса хун вуго 200 гIан аскарияв, лъукъун вуго 650 гIан. Гьедин лъазабуна хамиз къоялда Киевалда миллияб хIинкъигьечIолъи ва улка цIуниялъул Шураялъул информационияб централъул вакил Андрей Лысенкоца.