МагъчIваялъе рес

15 июнь Украиналда чIегIер баялъул къо


Луганск
Украиналъул президент Пётр Порошенкоца 15 июнь лъазабун буго сепаратистазде данде операция гьабулаго хварал аскариязухъ чIегIер баялъул къолъун. Гьес гьединго зигара бана 14 июналда хварал аскариязул ва гъурхъаби цIунулезул хъизабазда.
Улкаялъул бетIерасул официалияб сайталда лъураб лъазабиялда абулеб буго «гьедин кIудияб ва гурхIел гьечIеб теракталда гIахьаллъи бугел тамихIалде цIачIого тезе гьечIин».
Цебе лъазабулеб букIана Луганск икълималда 14 июналда ва Днепропетровск икълималда 15-16 июналда лъазабун бугин Луганскалда тIад кьвагьизабураб ИЛ-76 аэропланалда вукIарав 49 чиясухъ чIегIер баялъул къоялин.
14 июналъул сардилъ Луганскалъул аэропорталда ракета кьвагьун бортизабун букIана Украиналъул Рагъулал къуватазул рагъулабгун-транспортияб аэроплан. Гьелда вукIун вуго экипажалъул ичIго чиги 40 солдатги. Гьел киналго хун руго. Гьелда бан, Украиналъул прокуратураялъ байбихьун буго цIех-рех.
XS
SM
MD
LG