МагъчIваялъе рес

Шамилов: Хъачагъазул идараялде сверун буго Дагъистаналъул МВД


Владимир Колокольцев ДУМаялъул данделъиялда, Москва, 17Окт2012

Шималияб Кавказалда изну гьечIого яргъидгIуцIаразде гъорлъе унев 350 чи чIван вуго къуваталъул идарабазул хIалтIухъабаз гьаб соналда жаниб. Гьедин бицана Россиялъул жанисел ишазул министерлъиялъул нухмалъулев Владимир Колокольцевас. Гьал къоязда ДУМаялда гьес кьолеб букlана 2014 соналъул тIоцересел моцIазда министерлъиялъ гьабураб хIалтIул хlасил. Министрасул рагIабазда рекъон, улкаялда криминалияб ахIвал-хIалги лъикIаб рахъалде хисулеб буго.

Шималияб Кавказалда чIваразда гъорлъ ратана терактал гьарурал ва гIуцIарал чагIиилан абуна Колокольцевас. «Жанисел ишазул министелъиялъги хIинкъигьечIолъиялъул федералияб хъулухъалъги терроралде дандекъеркьеялъул хIалтIи цадахъ гьабуна ва гьеб хIалтIуца лъикIал хIасилал кьуна», - илан абуна Колокольцевас ДУМаялда ва тIаде жубана рехсараб кIиго идараялъ цадахъ гьабулеб хIалтIи цIикIкIинабилин.

Терроризмалъулгун экстремизмалъул профилактика гьабиялъул хIалтIи лъикIлъизабизе кколин рикIкIунеб буго министрас. Гьес абухъе, къануназул база хисизабизе ккола. Колокольцевас ракIалде щвезабуна ахирисел соназда жанисел ишазул министерлъиялъул хIаракаталдалъун Россиялъул парламенаталъ терроралде ва экстремизмалде дандечIараб федералияб 20 къанун къабул гьабунилан. «Гьел къануназ хIасиал кьуна, амма балагьараб мехалда бичIчIулеб буго къанунал жеги лъикIлъизаризе кколеблъи, гьел согIлъизаризе кколеблъи», - илан абуна министрас.

Терроризмалъул ва экстремизмалъул хIакъалъулъ гьал къоязда бицулеб букIана хIинкъигьечIолъиялъул федералияб хъулухъалъул нухмалъулев Александр Бортниковасги. 20I4 соналъул тIоцересел моцIазда Шималияб Кавказалда изну гьечIого яргъид гIуцIаразде гъорлъе унев 350 чи чIванилан абуна Колокольцевас, амма Бортниковасул рагIабазда рекъон чIвана I30 чи. ФСБялъул нухмалъулесул рагIабазда рекъон, чIваразда гъорлъ ратана къукъабазул 2I цевехъан, низам цIунулез биххизабуна боевиказул I60 база ва блиндаж.

Шималияб Кавказалда бугеб ахIвал-хIалалъул гуребги бицине кколин абуна ФСБялъул нухмалъулес. Гьесул рагIабазда рекъон ахирисеб кIиго соналда жаниб халкъазда гьоркьосел экстремизмияб II ячейка Сибиралда тIатинабуна. «Гьел ячейкаби раккулел руго миграциялъул процессазе гIоло ва гьел процессалги къануназда рекъон унел гьечIо», - илан абуна Бортниковас. Гьес абуна экстремизмиял къукъаби Сибиралда жеги раккулел ругин ва гьел къукъабазде гъорлъе унел ругин гIемерисала гIолилал. Гьелдалъун, ФСБялъул нухмалъулес абухъе, экстремизмгун терроризмалъе профилактика гьабизе ккола Россиялъул шималияб бутIаялдаги.

Россиялъул жанисел ишазул министерлъиялъул нухмалъулев Колокольцевасул докладалде тIадруссинаго абизе ккола гьесул рагIабазда рекъон улкаялъул 60 регионалда криминалияб ахIвал-хIал лъикIаб рахъалде хисулеб буго. Гьел регионазда гъорлъе унеб буго Дагъистанги. «АхIвал-хIал хисизе кIвана полициялъул хIалтIиги лъикIлъизабун. Дисциплинаялъе кьолеб букIана кIудияб кIвар, гьединго статистикаялъе гIоло гьабулеб хIалтIиялъул система хвезабуна», - илан абуна министрас ва тIаде жубана полициялъул хIалтIуе гIадамаз лъикIаб къимат кьолеб бугин ва гьелъие нугIлъи гьабулеб бугин соцопросаз.

Гьединого Колокольцевас абуна полициялъул штат цIикIкIинабизе кколин, амма хIалтIизе рачIунел чагIи гIемер ратулел гьечIин. Гьес абухъе, полициялъул хIалтIухъаби гIолел гьечIо, мисалалъе, Кабардино-Балкариялда, Кубаналда, Дагъистаналда ва гь.ц. бакIаздаги. Полициялде хIалтIизе рачIунел чагIазда гьоркьорги ратулел руго хиянатчагIи илан абуна Колокольцевас ва тIаде жубана полиграф хIалтIизабулин гьединал чагIи ратизаризеян.

РакIбацIцIадго хIалтIи гьабун бажарулелщинал чагIи нахъе рехулел ругин МВДялдасаилан рикIкIунеб буго полициялъул хIалтIухъабазул профцолъиялъул нухмалъулев Шамилов МухIамадица. Гьес абухъе, Дагъистаналъул жанисел ишазул министр МухIамад ГIабдурашидовас гIемер бицуна полициялъул хIалтIи лъикIлъизабизе кколин, амма жакъа къоялда министерлъиялда жаниб тIибитIун буго цIогьги, хъамалчилъиги, чIвай-хъвейги.

Шамилов МухIамад: «МВД бацIцIад гьабизе къваригIун батани, гьес гIинтIамизе ккола профцолъиялда ва профцолъиялда бугеб ришватчилъиялда дандечIараб комитеталда. Гьеб мехалда МВД бацIцIад гьабизе кIвезе буго гьесда. Нижеда гурони лъаларо доба жаниб бугеб жоги ишги.ХIакъикъатни жакъа гьадинаб буго: хIалтIи гьабизе кIолел, лъай бугел офицерал хIалтIудаса рехулел руго».

Хъачагъазул идаарялде сверун буго Дагъистаналъул МВДилан абуна Шамиловас ахиралда.

XS
SM
MD
LG