МагъчIваялъе рес

МахIачхъалаялъул аэропорталъул бетIергьан - Керимов


Аэропорт Уйташ

МахIачхъалаялъул аэропорт босун буго олигарх Сулейман Керимовас. Гьелъул аукцион гьабун буго 6 июналда. Гьеб аэропорт босизе хIадурулезда гъорлъ рехсолел рукIана Дагъистаналдасаго вацал олигархал МухIамадовалги.

Аэропорт олигарх Сулейман Керимовас босараблъи МахIачхъалаялъул аэропорталъул хIалтIухъабазда 9 июналъ, итникъоялъул радалисеб данделъиялда лъана. Аэропорт босиялъул аукцион Дагъистаналда гуреб, Ростовалда букIун буго. Гьединлъидал жидеда щибниги мухIканлъи лъаларин гьеб рахъалъин абуна ЭР-ялъе МахIачхъалаялъул аэропорталъул пресс-секретарь ХIажиев Алексейица. Цо-цо баяназда рекъон, аэропорталъул генералияв директорлъун толев вуго ЧIарада мухъалдаса чи. Хадусев нухмалъиялда вукIине вуго гIурус миллаталъул чи.

Алексей ХIажиев: «Гьебги жеги мухIканго лъазе букIин щакаб жо буго. Гьелда бан гIемерал харбал рукIине руго. Амма лъалеб жо буго, нижер нухмалъулес абухъе, гьаб гIагараб кIиго моцIицаниги аэропорталъул мал-мулкалъул хIисаб гьабизе букIин. ЦIияв бетIергьанасухъе щиб кьелеб, щиб толебани, гIемераб хъвай-хъвагIай бугин гьабизе ккарабилан абуна нижер нухмалъулес. Доба хутIараб лъабго аэропланги бичиялъе аукцион гьабизеги рес буго. ГIемер заман ине буго жеги батIи-батIиял процедураби гьаризе. Гьединлъидал гIаммаб куцалда нижеда лъалеб жо дагьаб буго. Ниж кир ругел, Сулейман Керимов кив вугев?»

Аэропорт хIукуматалъухъа унеб букIиналда бан разилъи гьечIолъи буго цо-цоязул. Амма гьеб кутакалда лъикI бугин рикIкIунеб буго МахIачхъалаялдаса юрист Эльдар ХIажимурадовас.

Эльдар ХIажимурадов: «ТIоцебесеб иргаялда, гьеб дармидалъун хайир живго Сулейман Керимовасе, гьесул бизнесалъе ккеларищха. КIиабизе, МахIачхъалаялъул аэропорт тIокIалъ хIукуматалъ хьихьун бажарулеб хIалалда букIинчIо. ХIукуматалъухъ гьеб бугебгIан мехалъ, бугебщинаб гIарацги бикъун, авиапаркги хун, тIатIала чIван букIана гьеб. Аэропланал рещтIунеб, гьел зодоре рахъунеб нухги хутIула хIукуматалъухъ, хутIараб уна Керимовасухъе. Дир хIисабалда, гьеб кутакалда лъикI буго. Гьелдалъун билеталги учузлъила, гIадамазе шартIалги лъикIал рукIина, аэропланалги рукIина бищунго церетIурал, ахирисеб тайпаялъул».

Республикаялда бицуна гьеб аэропорт Дагъистаналдаса вацал-олигархал МухIамадовазеги къваригIун букIанин босизе.

Маялъул ахиралда журналистазулгун букIараб пресс-конференциялда транспорталъул министр хисулев ХIажи Ражабовас бицана 6 июналда букIине кколин МахIачхъалаялъул аэропорт босиялда бараб аукцион. Амма щал гьенир гIахьаллъизе ругелали лъалеб жо гьечIила. ТIубан аэропорталъул пакетал росаниги, Дагъистаналъул хIукумат гьениса нахъе унин абураб магIна кколарила гьеб.

XS
SM
MD
LG