МагъчIваялъе рес

Президент Петр Порошенкоца гьа бана Украиналъул халкъалъе


Украиналъул гьанже вищарав президент Петр Порошенкоца ТIадегIанаб Радаялъул данделъиялда гьа бана Украиналъул халкъалъе.

УНИАН абураб агентлъиялъул лъазабиялда рекъон, Порошенкол гьа баялъул церемония тIобитIана Украиналъул Конституциялалъулаб дивналъул бетIер Юрий Баулиница.

Инаугурациялъул церемониялда гIахьаллъана къватIисел пачалихъазул 60 гIанаб делегация. Гьездаго гъорлъ Польшаялъул, Белорусалъул, Литваялъул президентал Бронислав Коморовский, Александр Лукашенко, Даля Грибаускайте, Швейцариялъул федерациялъул президент, гьанже ОБСЕялъул бетIер Дидье Букхалтер, Цолъарал миллатазул гIуцIиялъул генералияв секретарь хисулев Джеффри Фелтман.

Цолъарал Штатазул делегация букIана вице-премьер Джо Байденил ва сенатор Виктория Нуландил нухмалдъиялда гъоркь, Россиялъул – Украиналда Россиялъул вакиль Михаил Зурабов.

Порошенкоца лъазабун букIана, инаугурациялда хадуб, жинца загьир гьабизе бугин улкаялда ахIвал-хIал рукIалиде бачиналъул планин. Гьеб планалда, гьесул рагIабазда, бихьизабизе буго гIатIидаб амнистияги нухмалъиялъул децентрализациялъул тадбиралги.

Президентасул рищиязда Порошенко бергьана рищарухъабазул гьаркьазул 55 гIанаб процентги щун.
XS
SM
MD
LG