МагъчIваялъе рес

Гьанжеги «гъугъана» Гъуниб магIарда…


Гъуниб

30 абилеб маялъул радалалдаса нахъе Гъуниб мухъалда полициялъулаздаги изнугьечIого яргъидгIуцIаразул къокъаялда гьоркьобги кьавагьа-гIанхъи унеб бугин лъазабулеб буго бакIалъул гIадамаз. Гьезул рагIабазда рекъон низам цIунелезул чанго чи лъукъунги вуго. Жанисел ишазул идарабаз гьеб лъугьа-бахъиналъул хIакъалъулъ киналгIаги баянал кьолел гьечIо.

Рузман къоялъул радал Гъуниб мухъалъул ГIунтIиб ва Сугъралъ росабазул гIорхъода бугеб магIарда изнугьечIого яргъидгIуцIараздаги низамцIунулездаги гьоркьоб тунка-гIуси кканилан лъазабулеб буго бакIалъул гIадамаз. Гьез бицухъе 30 маялъул радалалдаса нахъе гьеб бакIалда тIад гьоркьоса къотIичIого тIавап гьабулеб буго рагъулаб вертолет, рагIулеб буго кьвагьа-гIанхъи. ГIунтIиб росдал гIадамаз бицухъе гьеб рагъулаб вертолеталъ кваридаги бан жаназа босун ине бихьун буго гьезда, гьеб лъил жаназаяли лъалеб гьечIо. Гьелго гIадамаз кьурал баяназда рекъон гьеб тунка-гIусиялъул хIасилалда къуваталъул идарабзул хIалтIухъабазда гьоркьор лъукъаралги руго.

Гьеб къуваталъул идарабазул хIалтIухъабаздаги изнугьечIогояргъидгIуцIараздаги гьоркьоб ккараб тунка-гIусиялъул хIакъалъулъ кинал ругониги официалиял баянал кьолел гьечIо. МухIканлъи цIехезе республикаялъул жанисел ишазул пресс-хъулухъалде ахIараб мехалда гьезул хIалтIухъабаз Гъуниб мухъалда хасал тадбирал унел рукIин тадсикъ гьабуна, амма жидеца тIокIал киналниги баянал кьун бажаруларилан лъазабуна гьез. Щай гурелъул гьел хасал тадбирал ФСБялъул хIалтIухъабаз тIоритIулила, гьединлъидал Россиялъул Миллияб терроризмалде дандечIараб комитеталъ гурони гьел тадбиразул хIакъалъулъ баянал кьоларилан. Амма гьеб комитеталъги жеги киналгIаги баянал кьолел гьечIо, Гъуниб мухъалда лъугьа-бахъунеб бугелда тIасан.
Гъуниб мухъалъул администрациялдаги «Эркенлъи» радиоялда лъазабуна, гьениб хасаб операция ине букIин, амма жидеда гьелъул хIакъалъулъ киналгIаги мухIканлъаби лъаларин чIана гьелги.

Гьеб хасаб тадбиразул хIасилалда лъукъарал ругин абулеб букIиндал, гьезул цониги чи Гъуниб азарханаялде вачIун вугищали цIехараб мехалдаги, гьеб идараялъул хIалтIухъабаз абуна жидехъе цониги лъукъарав чи вачIинчIилан.
Исана май моцIалда жаниб гьеб буго Гъуниб мухъалда тIобитIулеб бугеб кIиабилеб хасаб операция. I5 маялда гьениб изнугьечIогояргъидгIуцIарал ралагьулел рукIарал полициялъул хIалтIухъабазде кьвагьдана гьел изнугьечIого яргъидгIуцIарал. Гьелъул хIасилалда чIвана 3 Гъуниб мухъалъул полициялъул хIалтIухъан, ва 7 чи лъукъизеги лъукъана. Амма низамцIунулез гьенив цониги изнугьечIого яргъидгIуцIарав кквечIо. Гьеб къоялдаса нахъе Гъуниб мухъалда терроризмалде данде чIараб низамги лъазабун, хасал тадбирал тIоритIулеб букIана полиция.

Гьедин 16 маялда росуго сверунги ккун Сугъралъ росдал гIадамазул рокъоб чIухь базе лъугьана полициялъулал. Гьез лъазабулеб букIана изнугьечIогояргъидгIуцIаразулгун бухьен бугел ва гьезие кумек гьабиялда щаклъи бугел чагIазул доба балеб бугила жидеца чIухьилан. Гьедин рокъоб ярагъ батанин абун Сугъулдерил 5 чи ккуна полициялъ. Жалго гьеб росдал гIадамаз кутакалда разигьечIолъи загьир гьабулеб букIана низамцIунулездасан ва гьезул хIалтIудасан. Гьез щибго гIайиб гьечIел гIадамал ккунилан лъазабулеб букIана сугъулдерица.

Сугъралъ росулъа «Новое Дело» газеталъул редактор Сагидов ХIажимурадил пикруялда рекъон I5 маялда полициялъулазе гьединаб кIудияб ками ккеялъул гIайиб жалго къуваталъул идарабазул нухмалъиялда буго. Гьединго низамцIунулез Сугъралъ хъачIаб къагIидаялъ хасал тадбирал тIоритIизе лъугьиналъги, низамцIунулездехун дагьабги рокьукъаб бербалагьи лъугьунеб буго гIадамазул.

Сагидов ХIажимурад: «Бищун кIудияб минус лъола дица Жанисел ишазул идарабазе. Щай гьел росабалъ рукIунел гIиси-бикъинал такъсирал рагьиялда тIад хIалтIулел, щибниги хасаб хIадури гьечIел хIалтIухъаби гIодоса-тIараде щвезегIан яргъилъанги раккарал, рагъизеги ругьун гьарурал гIадамазда данде рагъизе ритIулел? Гьеб буго гIадалаб жо, гIададе гIадамал чIвазе ритIилъун ккола гьеб. Щай жанисел ишазул нухмалъиялда гьеб бичIчIулареб? Дагьалищ ругел гьединал изнугьечIого яргъидгIуцIаразде данде къеркьон бажарулел, цохIо гьеб гурони тIокIаб хIалтIи гьабуларел полициялъулги, федералияб хIинкъигьечIолъи идараялъулги хасал хIалтIухъабазул къокъаби.

Гьелдаса хадурги сверун росуги ккун, Сугъралъ чIухь базейилан лъугьана гьел. Гьебги букIана циркалда релълъараб жо. Щай гурелъул гIадамазда бердаги бихьун жидецаго ярагъги реххун рокъоб ярагъ батанилан гIайибги гIунтIизабун чанго чи ккуна гьез. Гьезда гьоркьов вуго лъукъарал полициялъулазе кумек гьабулев вукIарав чигицин. Росдадаго лъала гьесул рокъобеги низамцIунулез жидецаго ярагъ реххараблъи. Гьелдаса хадуб кинаб бербалагьи букIинеб гIадамазул гьездехун? Гьез данде рагъ балел ругел чагIазги гьединал хIужаби къуваталъул идарабазде данде хIалтIизариларищ».

Ахираб заманалда Гъуниб мухъалда изнугьечIого яргъидгIуцIарал гIемерлъиялъе гIилла щибин, щайин гьезул гIемерисел сугъулдерил вакилзаби ругелин, росулъ гьездехун кинаб бербалагьийин бугебилан абурал суалалги кьуна «Эркенлъи» радиоялъул мухбирас Сагидов ХIажимурадие, амма экспертас гьел суалазе жаваб кьечIо.
XS
SM
MD
LG