МагъчIваялъе рес

МахIачхъалаялда биххизабун буго изну гьечIого бараб 3 мина


МахIачхъала, 6 Май 2014

МахIачхъалаялда батун буго 400 ялдаса цIикIкIун изнугьечIого бараб бакI. Гьеб тIатун буго кIиго моцIица гьабураб хал-шалалъул хIасилалда. Гьезул лъабгояб диваналъ хIукмуги гьабун гьанжеялде биххизабунги буго. Шагьаралъул цIияв нухмалъулев Сулейманов МухIамадица лъазабулеб буго МахIачхъалаялда гIадлу-низам гьабиялъул иш бищун цебе гьел изнугьечIого рарал бакIал тIагIинарияздасан байбихьизе бугилан.

КIиго моцIица цеве МахIачхъалаялъул нухмалъуде Сулейманов МухIамад вачIун хадуб гьес тIоцебесеб данделъиялдаго кьварун лъазабун букIана бищун цебе МахIачхъалаялда рацIцIалъи чIезабизе кколин, хадуб гьанир ругел изнугьечIого рарал бакIазулги, ракьазулги гIадлу лъугьинабизе кколилан.

Гьесдаса цеве мэрасул ишал тIуралев вукIарав Рабаданов МуртазгIалица гIуцIун букIана гьел изнугьечIого ралел бакIал тIатинарулеб ва хадубккун гьезу иш роцIцIинабулеб хасаб комиссия. Гьеб комиссияги тIубан цIидасан гIуцIун Сулеймановас гьел моцIил болжазда жаниб шагьаралда бакIал раялъул бугеб ахIвал-хIалалъул хIисаб кьезе тIамун рукIун руго. Гьеб данделъиялъул ва комиссиялъ кьураб хIисабалъул хIакъалъулъ «Эркенлъи» радиоялъе бицана МахIачхъалаялъул администрациялъул пресс-службаялъул хIалтIухъан ГIалимирзаева Зайнабица.

ГIалимирзаева Зайнаб: «МухIамад Сулейманов шагьаралъул нухмалъуде вачIаралдаса нахъе гьаниб щибаб къойил гIадин изнугьечIого ралела бакIал тIатинаризе гIоло халгьабиял унел руго. Жакъа къоялда жаниб шагьаралда батун буго гьединаб 400 гIан бакI, гьезул 3 биххизабунги буго. Гьеб биххизабизе хIукму диваналъ къотIула. ХутIарал гьез изнугьечIого ралел бакIазул къисматги диваналъ тIубазе ккола. Гьез рукIине кколел документал рачIани, гьел риххизаруларо».
Зайнабица бицухъе комиссиялъул хIалтIуе кумек гьабулеб буго жалго шагьаралда гIумру гьабун ругезги. Гьезул гIемерисезул цIакъго рахIат хвезабун рагIула гьадингоги дагьаб гурони гьечIеб МахIачхъалялъул гъветI-хер хвезабиялда. ГIадамал жалго рахъун руго гьел хутIунниги ругел шагьаралъул ахал цIунизе. Гьедин тахшагьаралъул Батырмурзаевасул къотIноб бугеб гIадамаз хIухьбахъи гьабулеб ахикь бакI базе лъугьиналъги гьенир аскIо гIумру гьабун ругез ахIи бахъинабун буго.

Гьеб ах цIунулезул цояй СагIидова Калиматица, «Эркенлъи» радиоялъе бицана жидеца гьеб ах хвезабизе тезе гьечIин, ва гьениб бижулеб щибаб харил сумалъе гIологи къеркьезе ругилан.

СагIидова Калимат: «Нилъ киналго къануналда рекъон хьвадизе ккола, цоязе хъвараб цойгидазе хъвачIеб жо гурелъул бугеб нилъер пачалихъалъул къанун. Гьаб нижецаго къачIараб, гIезабураб, сверухълъиялдаго бугеб цохIого-цо ахикьеги вачIун гьаниб бокьараб бакI базе бегьилин ракIалде ккун батани гьеб бакIалъул бетIергьанасда, гьев мекъи вуго. Нижеца гьаб ах цIунизе буго, гьаниб щибниги базеги тезе гьечIо. Цояз гIезабун цойгидаз хвезабун букIунеб жойищ букIунеб. Щай цо-цоязда ракIалде кколеб кодор кагъталги ккун жидеца бокьа-бокьараб гьабизе бегьулилан, гьелъие ахир лъезе буго».

МахIачхъалаялъул администрациялъ гьеб изнугьечIого рарал бакIал тIагIинариялъул иш букIине кколеб хIалалъ гьабулеб гьечIин, г\ьадингоял харбалги рицун, гьел бакIазул бетIергьабахъа гIарацги босун гьел церего гIадин гьанжеги ралел ругин лъазабулеб буго «Черновик» газеталъул редакциялъ. Гьединлъидал газетацIалулезда гьез гьарулеб буго шагьаралда изнугьечIого ралел бакIазул хIакъалъулъ баянал редакциялда лъазареян, жидеца гьезда хадуб халкквезе бугилан.
XS
SM
MD
LG