Украиналъул жанисел ишазул министр Арсен Аваковас лъазабуна Мариуполалда милициялъул бутIаялда Россиялдехун цIайи цIикIкIарал активистазул 20гIан чи чIван вугин.
Низам цIунулезул цо чи чIван ва щугояв лъукъун вугинги абуна Аваковас. Гьесулго рагIабазда рекъон, ункъгояв кверде восун вуго ва хутIарал ярагъги рех-рехун тун лъутун руго. Гьедин хъвалеб буго Аваковас Facebookалда жиндирго гьумералда.
Донецк икълималъул администрациялъул сахлъи цIуниялъул департаменталда лъазабулеб буго Мариуполалда къуватазул операция гьабулаго лъабго чи хун вугин ва 25-яв лъукъун вугин.
Аваковасул баяназда рекъон, рузман къоялда автоматалгун кодор 60–гIан чияс хIалбихьун буго Мариуполалъул милициялъул бутIаялде гьужум гьабизе. Минаялда жаниб цIа ккун буго. Мариуполалъул жалго цIунулезул къукъабазул вакилзабаз абуни лъазабулеб буго Киевалъул буюриязе мукIурлъизе инкар гьабурал милициязде гьужум гьабун букIанин хIукуматалъул къуватал идарабазин.