МагъчIваялъе рес

Тохтур Гунашев Марат эркен гьавун вуго


МахIачхъалаялъул Советский мухъалъул диванхана

МахIачхъалаялъул Советский мухъалъул диванханаялъ 6 маялда ритIухъги гьавун туснахъалъуса нахъе виччана тохтур Гунашев Марат. Гьесда гIунтIизабулеб букIана инзу гьечIого яргъидгIуцIаразулгун бухьен букIиналъул гIайиб. Гунашев ккун вукIана 2012 соналъул 28 ноябралда азарханаялда жанив операция гьабулеб бакIалда. Доб мехалда гьесда гIунтIизабулеб букIана МахIачхъалаялъул полициялъул бутIаялъул нухмалъулев чIваялъул ишалда хурхен букIиналъул гIайиб.

Диваналъ тохтурасда щибниги гIайиб гьечIин чIезабуна ва гьенисанго къватIивеги виччана гьев.

Талат къоялъ МахIачхъалаялъул Советский мухъалъул диванханалъул хIукмуялда рекъон эркен гьавуна, изнугьечIого яргъидгIуцIаразе кумек гьабиялъул, гIайиб гIунтIизабулев вукIарав тохтур-анестезиолог Марат Гунашев.
Гунашев Маратил адвокат МухIамадов Заурица «Эркенлъи» радиоялъе бицана, диванчи Къурбанов Шамилица, тохтурасда щибго гIайиб гьечIин лъазабунила ва гьениб диванхалаяллъул залалдасанго къватIивеги виччанила гьевилан.

МухIамадов Заур: «Маратица гьабуралъулъ щибниги такъсирияб иш букIинчIила, гьесде гIунтIизарулел рукIарал гIайибалги мекъи ругинги лъазабун диванчияс, гьеб бакIалдасанго къватIиве виччайин гьевилан абун хIукму къотIана. Гьесда гIайиб гьечIеблъи лъалеб букIаниги ахиралде щвезегIан гьев эркен гьавилин абураб хьул бугониги, божилъи букIинчIо. Кинха божилъи букIинеб щибниги гьечIеб бакIалда чаналиго гIайибги гIунтIизабун, гьесул террористги, наркотикал ричулев чиги, чIвадарухъанги вахъинавун вукIиндал, амма лъица щибилан абуниги, кинаб гIазаб кьуниги Марат гьел жинде гIутIизарулел ругел гIайибазе мукIурлъичIо. Гьес киса-кибего ва щибаб нухалъ жинда щибго гIайиб гьечIин абулаан, жакъаги, диваналъ хIукуму къотIилалда цебе, гьесие ахирисеб рагIи кьун хадуб Маратица лъазабуна жив гIайибияв гьечIин ва жив эркен гьавейилан гьарана».

20I2 соналъул 28 ноябралда МахIачхъалаялъул полициялъул бутIаялъул нухмалъулев МухIамадов АхIмад чIваялда щаклъи бугинги абун, операция гьабулеб бакIалдаса вачун ана МахIачхъалаялъул кIиабилеб азарханаялда анестезиологлъун хIалтIилев вукIарав Гунашев Марат. Гьесдаго цадахъ ккун вукIана цойти тохтур ХIасанов Шамильги. Гьел ккурабго къоялъ кIиязулго рокъоб чIухьги бана къуваталъул идарабазул вакилзабаз. Чухь балаго низамцIунулезда Гунашевасул рокъоб наркотикалги ратун рукIана, гьесул гIагарлъиялъ лъазабуна гьел полициялъулаз жидецаго реххарал жал ругилан. Гьебго чIухь балеб заманалда ХIасанов Шамиль жидеде кьвагьданин, гьединлъидал гьесде данде кьвагьдезе кканин жалгийиланги абун жиндирго рокъов чIван реххана ХIасанов Шамиль. Гьесул адвокатас ва гIагарлъиялъ лъазабулеб букIана гьев лъидениги кьвагьдечIила, низамцIунулез жидецаго чIвазеги чIван гьесул жаназа рокъобе бачIанила, гьедин жидецаго гьабураб-тараб бахчизелъун ХIасанов данде кьвагьдезе лъугьиналъ чIвазе кканин абун лъазабулеб бугила низамцIунулезилан.

Гьедин низамцIунулезул хIалтIудаса рази гьечIолъи загьир гьабун, гьез къануналде данде кколарел ишал гьарияда хурхун ва цIех-рех букIине кколеб хIалалъ гьаблуеб гьечIинги абун тохтурзабазул гIагарлъиялъгун адвокатаз кагътал Дагъистаналъул тIалъиялдаса Россиялъул нухмалъиялде щвезегIан хъван руго, амма гьезул щибниги пайдаги ккун гьечIо, гьезул рагIабазда рекъон.

ХIасанов ва Гунашев такъсирчагIилъун рахъинаризе къваригIун букIанила ХIасановасул йикIарал йокьулелъейилан абураб баянги кьолеб букIана гьезул гIагарлъиялъ. Гьей гIаданалъе къваригIун букIанила Шамилица жий ячине, амма гьейги реххун тун гьес Гунашевасул яц ячанила. Гьединлъидал гьелъ жиндирго лъай-хъваялги хIалтIизарун Гунашевасдаса ва ХIасановасдаса рецIел босанилан.

МухIамадов АхIмад чIвай гуребги Гунашев Маратиде изнугьечIого яргъидгIуцIаразе кумек гьабиялъул гIайибги гIунтIизабун букIана. ЦIех-рехчагIаз лъазабулеб букIана гьес чанги унтарал «рохьилазе» кумек гьабулеб букIанилан, гьес наркотикал ричулел ва хIалтIизарулел рукIаниланги. Амма адвокат МухIамадов Заурил рагIабазда рекъон гьел киналго гIайибал Маратидаса тIаса рахъун руго. Щибго гIайиб гьечIев чи лъагIелгун бащадалъ туснахъалда тIамуралъухъ ва гьелъул хIасилалда гьесул сахлъиялъе кIудияб зарал ккеялда хурхун компенсация тIалаб гьабизе бугебищин ва гьел къуваталъул идарабазде данде гIарза хъвазе бугебищин цIехедал, Заур МухIамадовас «Эркенлъи» радиоялъе бицана, диваналъ хIукму гьабун хадуб I0 къо инчIого жидеца кибениги гIарза хъвазе гьечIила. Диваналъул хIукмуялдаса разигьечIолъиги загьир гьабунила, гьелда тIасан жидеца гIарзаги хъвазе бугин лъазабунила прокуратураялъ, гьединлъидал гьез гIарза хъвалищали бихьизегIан жидеца кибениги щибниги хъвазе гьечIилан.
XS
SM
MD
LG