МагъчIваялъе рес

Россия-Украина: дандечlей халат бахъунеб буго


Украиналъул жанисел ишазул министрасул ишал тIуразарулев Андрей Дещицаца лъазабун буго гьесул улкаялъ Крымалдаса инкар гьабизе гьечIин ва гьеб кризис рагIалде бахъинабизелъун кIварабщинаб гьабизе бугин. Гьес гьедин абуна шамат къоялда Киевалда кьураб пресс-конференциялда.
Гьебго заманаялда Москваялда Россиялъул къватIисел ишазул министр Сергей Лавровас лъазабун букIана Украиналъул гьанжесеб нухмалъи радикалазул асаралда гъоркь бугин. Лавровасул рагIабазда рекъон, магърибалъул улкабазда лъикI лъала Украиналда кколеб бугеб, амма гьез гьеб бахчулеб буго жидерго политикиял мурадал цIунизелъун.
Россиялъ халат бахъинабулеб буго Крымалде аскарал ва рагъулаб техника битIиялъул хIалтIи. УНИАН агентлъиялъе Украиналъул гIурхъаби цIунулез лъазабун буго «Крым» абулеб бурам къан бугин ва гьенив вугин ярагъ борчарав Россиялъул 100 чиги жалго цIуна-къаялъул къукъабийин абулезул 50 чигийин
ТСН агентлъиялъ лъазабулеб буго цIуна-къаялъул жидерго къукъаби гIуцIулел руго крымалъул татаразги. Гьезул сияхIазде гьанжеялде 200 чи восун вуго. Симферополалда гьез хъаравуллъи гьабулеб буго къватIазда ва хал гьабулеб буго щаклъи ккарал автомашинабазул.
XS
SM
MD
LG