МагъчIваялъе рес

Киев бакьулъ тунка-гIусиял


ГьатIан къоялъ Киев бакьулъ тунка-гIусиял ккана ТIадегIанаб Радаялъул минаялде аскIоре рорчIизе хIаракат бахъулел демонстрантазда ва низам цIунулезда гьоркьор. Гьенир рагIулел рукIана хъуй бахъинабулел гранатабазул кьвагьи. Гьедин лъазабулеб буго Эркенлъи Радиялъул мухбираз. Гьебго заманаялда Киевалда унеб халкъияб вечеялда ай данделъиялда оппозициялъул лидераз лъазабуна гIагараб заманаялда жидеца гьабизе бугелъул. Гьелда рекъон гIуцIизе кколеб буго ТIадегIанаб Радаялъе альтернатива хIисабалда Халкъияб Рада ва гьелдасан Украина ЕвроЦолъиялде бачунеб Халкъияб хIукумат.
Гьелде тIадеги оппозициялъул планалда рекъон, къабул гьабизе кколеб буго цIияб Конституцияги божилъи гьечIолъи лъазабизе кколеб буго улкаялъул бетIер Виктор Януковичиеги.
ТIадегIанаб Радаялда 16 январалда къабул гьарурал ва гIадамазул ихтияразе гурхъаби лъолел къануназда «кверщелалъе узурпация» гьабийин лъазабуна оппозициялъ.
Нухмалъиялда разиял гьечIезул рахъалдасан цо лидерасул цIар лъазабеян халкъалъул тIалабалъе «Батькивщина» франциялъул бетIер Арсений Яценюкица абуна, лидер жибго украиналъул халкъ бугин. Ахираб кIигогIан моцIалда жаниб ахIараб микьабилеб халкъияб вечеялде гьатIан къоялда вакIарун вукIана анцI-анцI азар чи. Цо-цо баяназда рекъон, гьезул къадар 100 азаргоялдеги бахунеб буго.
XS
SM
MD
LG