МагъчIваялъе рес

Amnesty International гIуцIиялъ какулел руго россиялъул къанунал


Сочиялъул XXII Олимпиял хIаязда цебе Россиялда инсанасул ихтиярал цIуниялда сверун хал-шал гьабун, Amnesty International абураб халкъазда гьоркосеб гIуцIиялъ бахъана хасаб доклад. Гьелда рехсолел руго инсанасул ихтиярал цIунулезул ургъел ккезарулел суалал, рачунел руго цо-цо мухIканал мисалал.

Документалда квар буссинабулеб буго 2011 ва 2012 соналда парламенталъулги президентасулги рищиязда макру-хIиллаялде хIадурлъи унеб букIараб мехалда Москваялда гIемер халкъ гIахьаллъарал акцияби тIоритIун хадуб, президент Владимир Путиница чанго «репрессивиял къанун» гъулбасун букIиналде. Гьел къануназ гIорхъаби чIезарулел руго официалияб пикруялде данде кколалел, жидерго хасал пикраби загьир гьариялъе ва эркенго данде ракIариялъул ихтияралъе.

Докладалъул автораз абулеб буго, 2011 соналъул ахиралдаса Москваялда ва гьелъул сверухълъиялда аза-азар чи ккунин, нусгоялдаса цIикIкIун протесталъул акция тIобитIизе гьукъанин яги полиция тIаде лъун рихи-хочинарунин.

Гьез гьединго ракIалде щвезабулеб буго Россиялда азаргоялдасаги цIикIкIун коммерциялъул гурел гIуцIиязул хал-шал гьабунин.

Гьезул гIемерисезе «къватIисел улкабазул агентазул» къануналда рекъон, букIана къаялъул яги гIакIабазул хIинкъи. Amnesty International гIуцIиялъул къиматалда рекъон, гьел дискриминациялъулал къануназ квербакъи гьабуна гомофобия цIикIкIиналъе.
XS
SM
MD
LG