МагъчIваялъе рес

Самуралъ нугIлъи гьабулеб буго


МухIарамкент мухъалъул гIадамаз гьезул ракьалда, Самур гIортIа лъим кьабулеб станция баялде дандекъеркьей лъугIизе толеб гьечIо. 24 декабрялда гьеб мухъалъул гIадамаз лъимкьабулеб станция баялъул хIалтIаби чIезарун руго.

Хасаб, лъидаго бачIеб комиссиялъ гьеб лъимкьабулеб станция баялъ экологиялъе зарал гьабуларин абураб баян кьечIого жидеца гьеб базе ва хIалтIизе тезе гьечIилан лъазабулеб буго гьеб дандечIеялъул гIахьалчагIаз.

Лъим кьабулеб станция баялде бищунго кIудияб дандечIей гьабулеб бугеб Самур росулъ, гьоркьоса къотIичIого гьениб бугеб ахIвал-хIалалда хадур халккун полициялъул патруль бугин, гьезулгун бакIалъул гIадамазул тунка-гIусиги камулеб гьечIин лъазабулеб буго Самуралъулаз.

Полициялъулазулги бакIалъул гIадамазулги дандеккунгутIи букIанин талат къоялъ,3000 гIан чиги вакIарун лъим кьаблуеб станция балеб бакIалда хIалтIаби къатIинареян халкъалъ тIалаб гьабураб мехалдайилан бицана Эркенлъи радиоялъе МухIарамкент мухъалъул данделъиялъул депутат МухIамаданифа Бейбутовас.

Гьеб тунка-гIусиялъул заманалда полициялъулаз ярагъ хIалтIизабунин, амма лъиениги зарал ккечIин бицана, 11 декабралда гьеб станция баялде дандечIараб акция тIобитIунилан, 10 сордо-къоялъ туснахъ гьавун вукIарав депутат Бейбутовас.

МухIамаданифа Бейбутов: «Сон, берцинго, гьеб станция балеб бугеб бакIалдеги рачIун нижее бокьун букIана гьанир гьарулел ругел хIалтIабазул суратал рахъизе, Самур росдал депутатаз гьеб бакIалда хIалтIаби гьаризе гьукъараб хIукмуги бихьизабизе, ва гьел хIалтIаби чIезареян тIалаб гьабизе.

Нижер кинал мурадал ругелали бицаниги полициялъ риччачIо цин ниж гьенире. Гьезухъ гIинги тIамичIого халкъ цебехун ине лъугьараб мехалда МухIарамкент мухъалъул полициялъул бетIерхисулев Гамлет Эфендиевас кьвагьдезе лъугьан ишан гьабун жиндирго хIалтIухъабазде.

ГIадамазул бутIрузда тIасан ана киналго гулби, лъиениги заралги ккечIо. Гьелдаса хадуб дагьабги ццин бахъараб халкъ доре-гьанире низамцIунулелги тунгун церехун ана, гьеб станцияб балеб бакIалъул нухмалъулесухъе гьенир хIалтIаби чIезареян тIалаб гьабураб документги кьуна, гьелда гъоркь гъулбасги гьабуна гьев чиясГьаб сагIат росулъ гIодойбиччай буго.

Ниж Москваялдаса хаса лъиданиги бачIеб комиссия бачIиналъухъ балагьун чIун руго. Гьеб комиссиялъ лъим кьабулеб станция бан хадуб Самуралъул рохьалъе зарал кколищ кколарищали чIезабизе экспертиза тIобитIизе ккола.

Гьеб Москваялдаса рачIарал экспертазда гурони гьаниб Дагъистаналда лъиданиги божуларо ниж. Гьаниб киналго ричун росун рукIуна.

Гьезие нижер ургъелги гьечIо, цониги нухалъ я тIалъиялъул вакил яги цониги эксперт вачIун вукIинчIо гьаниве щиб-кинали нижеда бичIчIизабизе ва халкъгун данчIвазе»

Щиб гьабунги жидеца гьеб станция базе тезе гьечIин, хасаб, лъидаго бачIеб комиссиялъ жидехъе гьеб лъимкьабулеб бакI баялъ тIабигIаталъе зарал гьабулареблъи чIезабураб баян кьечIогойилан абулеб буго Самур росдал гIадамаз.

ТIоцебе гьеб станция баялде дандечIей гьез багъаризабуна, хадуб аскIор ругел цойгидал росабалъа гIадамалги цIана гьез гьеб дандечIеялде гьоркьоре.

8 моцIалъ цебе Самур гIортIа лъимкьабулеб станция базе байбихьаралдаса нахъе гьеб мухъалъул гIадамал дандечIана гьелде, щайгурелъул станция бан хадуб гьелъ ракьулъ бугеб лъим кьабизе лъугьани, Россиялда цо гурони гьечIеб субтропикияб, Самуралъул рохь бакъвалин абулеб буго гIадамаз.

Рохь бакъвани тIокIаб гьеб мухъалда гIумру гьабун бажаруларин, гьеб рохьалъ гьураздаса цIунун ругин жидер ахалгун хурзал, гьенисан гьабулин жидеца аслияб къагIидаялъ магIишатилан абулеб буго гьез. ЧанцIулго республикаялъул тIалъиялде хъвадараниги, хIатта Дагъистаналъул президент Рамазан ГIабдулатIиповасулгун букIараб дандчIваялдагицин самуралъулаз гьеб станциялъ гьабизе бугеб заралалъул бициналъги кинабниги хIасил кьечIо.

11 декабралда Самур росулъ гьеб станция баялде данде акция тIобитIидал , гьениб гIадамалги полицияги цоцалъ рагъун хадуб, акциячагIазда полициялъулаз лъазабун буго 20 декабралда Дагъистаналъул хIукуматалъул бетIер ГIабдусамад ХIамидовасулгун ва экологиялъул суалазда тIад хIалтIулел, Самуралда лъим кьабулеб станция баялъул кинал хIасилал рукIунелали гIелмияб къагIидаялъ баян гьабун бажарулел гIадамалгун дандчIваялде ахIилилан, амма гьеб данделъи тIобитIун гьечIо жеги.

XS
SM
MD
LG