МагъчIваялъе рес

Украиналда хурхун Европарламенталъул резолюция


Европарламенталъ рикIкIунеб буго Украиналъул хIукуматалда ва оппозициялда гьоркьоб диалог байбихьиялъе хехгьабун гьоркьохъанлъи гьабизе байбихьизе кколин. Гьедин абулеб буго хамиз къоялда Страсбургалда Европарламенталъул иргадулаб данделъиялда къабул гьабураб резолюциялда.
Документалъул автораз гIагали загьир гьабуна исана 9 декабралда улкаялда хIинкъигьечIолъи чIезабиялъул къуватаз оппозициониял партиязул ва лъидаго рачIел информалатазул офисазе гьужумал гьариялда, ва гьединго протесталъул акциячагIазда хадуб халкквей чIезабиялда.
Европарламенталъул гIахьалчагIаз хитIаб гьабуна Европаялъул Цолъиялде гъорлъе унел улкабазде. Гьелда гьез гьарулеб буго Украиналъул гражданазе Евроцолъиялъул улкабазде визаби речIого рачIине изну кьеян.
Гьез гьединго хитIаб гьабуна Еврокомиссиялдеги. Гьениб абулеб буго нагагь Россиялъ Украиналде политикияб яги экономикияб тIадецуй гьабуни рукIине жавабиял тадбирал хIадуреян.
Киевалда ва Украиналъул цоги шагьаразда евроинтергациялъул рахъ кколезул акциял байбихьун рукIана 21 ноябралда. Гьелъие гIиллалъун ккун букIана ЕвроЦолъигун ассоциация гьабиялъул къотIи хъваялъул иш заманаялъ чIезабизе хIукуматалъ хIукму гьаби.
XS
SM
MD
LG