МагъчIваялъе рес

Тохтур Гунашев туснахъалъул азарханаялде вачана


Тохтур Гунашев жиндир ясгун.

Гъоркьисала туснахъ гьавурав Дагъистаналдаса тохтур Марат Гунашевасе квеш лъугьун, туснахъалъул азарханаялде вачун вуго. Аслияб куцалда гьесие къварилъи буго квегIаб бохалъул.

МахIачхъалаялдаса тохтур Марат Гунашев туснахъ гьавуралдаса чанго къоялдасан лъагIел тIубала. Амма чIванкъотIун гьесде гIунтIизабураб гIайиб гьечIо жеги. Байбихьуда абулеб букIана гьев гIахьаллъун вугин МахIачхъалаялъул полициялъул нухмалъулев МухIамадов АхIмад чIваялъулъ.

Хадуб байбихьана Гунашевас хъачагъал сах гьарулел рукIанин, хас гьабун гьес сах гьавун вугин Интерполалъ валагьулев вукIарав Генуса Ибрагьим ХIажидадаевилан абизе.

Амма жакъа къоялде щвезегIанги Гунашевасда хурхун хIадурараб материал гьечIин, диваналдеги гьеб кида битIизе бугебали Аллагьасда гурони лъаларин бицана Эркенлъи радиоялъе Марат Гунашевасул лъади Амина Гунашевалъ.

Гунашев вачIинахъего Владикавказалда ана туснахъ гьавизе, хадув гIезегIан заман гьоркьоб индал Дагъистаналде вачIана.

Амина Гунашева: «Марат авариялде ккун хадуб чанго нухалда операция гьабун букIана гьеб бохалъе. Доб мехалдаго чIегIерлъун букIана гьеб. Гьанже туснахъалде ккедал тIадеги унтиларищха гьеб, гьениб жаниб гьабулеб дару-сабаб щиб букIинеб гьесие?

КвегIаб бох гьедин унтараб букIиналъ, Маратие лъабабилеб даражаялъул сакъатлъигицин чIезабун букIана».

Низам цIунулез Марат азарханаялдаса ккун вачун ана, унтарасе дару биччалеб мехалда.

Жиндир рос туснахъалъуса вахъизе кумек гьабейин Марат Гунашевасул лъади Амина Гунашевалъ кагътал ритIун рукIана Россиялъул президент Владимир Путинихъеги, Россиялъул юстициялъул министр Юрий Чайкахъеги, прокуратураялдеги.

Амма кисанниги жал разияб жаваб щвечIин бицана Амина Гунашевалъ ЭР-ялъе. Щайин абуни жидеца жидеда тIасан гIарз бахъулел чагIазухъего ритIулел ругила гьел кагътал Москваялдасан тIадруссинеги гьарун.

Къануналда рекъон гьел чагIи хIалтIулел ругищ гьечIищали халгицин гьабулебги гьечIила.

Хадубккун лъиденги гьабилищин дуца хитIабин гьикъидал, жиндир росасе дивангIаги гьабулеб бугебали рес букIунаанин тIадехун гIарзахъдизеян жаваб кьуна Аминаца.

Амина Гунашева: Дир рос туснахъ гьавуна гIицIго Шамил ХIасанов абулев чиясул йикIарай йокьулелъ мацIги гьабун, сундулниги хIакъикъатги цIехечIого. Шамиль ХIасанов ккола дир росасул яцалъул рос. Жийги рехун тун, гьес гьей ячунилан квеш букIун, киназдаго бецIулеб буго гьелъ.

Амма дир росасда бараб жо щиб гьениб бугебали дида бичIчIуларо. Гьеле гьей гIаданалуъл гIахьучIаздаги божун туснахъалъув чIезавун вуго дир рос».

Марат Гунашев вегизавураб азархана буго МахIачхъалаялда рикIкIад гьечIого бугеб Шамхалалъул туснахъалда.
XS
SM
MD
LG