МагъчIваялъе рес

Гуккарал «хIажичагIи»


Chechnya -- Pilgrims returning from the Hajj, Grozny, 24Oct2013

ХIежалде гIадамал рачунел турфирмабазда тIаса гIарзаби раккана гьал къоязда Дагъистаналда. «Зам-зам Трэвел» ва «Анжи-Тур» фирмабазухъа жидерго гIарац нахъе тIалаб гьабизехъин руго хIажичагIилъун рахъинчIел дагъистаниял.

«Зам-зам Трэвел» фирмаялъул клиентал гъоркьисалаги щун гьечIо хIежалде. Гьал къоязда жидер гIарацги загранпаспорталги нахъе кьеян рачIана гьел клиентал турфимаялъул офисалде.

Амма жибго офис къан батана гьезда, телефоналги свинарун рукIана. Офисалда цере ракIараразул рагIабазда рекъон, «Зам-зам Трэвел» фирмаялъ нахъе кьезе 50 млн гъурущ.

Цо-кIиго къоялдаса офис рагьана ва турфирмадул официалияв вакил МухIамад-Къасум АхIмаевас тIаса лъугьаянги гьарун, бицана щай хIажичагIи Маккаялде ритIичIел.

Гьесул рагIабазда рекъон «Зам-зам Трэвэл» фирма рагьана 2010 соналда. ХIежалде гIадамал ритIизе аккредитация ай рес бугел цогидал турагентствоязе жидер фирмаялъ кумек гьабулеб букIанилан абуна АхIамаевас. 2010 ва 2011 соназда жидеца Маккаялде азаргоялдаса цIикIкIун хIажичи витIанилан тIадеги жубана «Зам-зам Трэвел» фирмаялъул вакилас.

Гъоркьисалаги исанаги аккредитация бугел фирмабигун рагIабаздалъун къотIи-къай букIун буго «Зам-зам Трэвелалъул».

Гьеб къотIи-къаялда рекъон, 1500 хIажичи витIине кколев вукIун вуго хIежалде. Амма Маккаялде гIадамал ритIизе заман щвейдал дол фирмабаз абун буго гьезие бакIал гьечIилан.

ГIарацги паспорталги гIадамазухъе нахъе кьезе ругилан абуна АхIмаевас. Гьес гьединго тIаде жубана жидер турфирмаялъул вакилал Дагъистаналъул муфтий АхIмад-хIажи ГIабдулаевгунги дандчIванилан ва гьес абунин гьединал лъугьа-бахъинал бачIуналде ричангутIиялда тIад хIалтIизе кколилан.

«Зам-зам Трэвел» фирмадул клиентазул гIарзаби тIуралел ругин абизе бегьула, амма Хасавюрталда бугеб «Анжи-тур» агентствоялъул клиентаз ахIи-хIур балеб буго жидехъа гIарац бикъанилан.

Казбек мухъалъул Калининаул росулъ гIумру гьабулев 14 чияс гIарза хъвана полициялде «Анжи-тур» фирмаялъул хважаин Супян ГIабдуразакъовас жал гукканилан ва жидер гIарацги босун гьев тIагIанилан.

ИмансагIит Сатираевас бицана «Эркенлъи» радиоялъе живги росуцоялги исана хIадурлъулел рукIанилан хIежалде ине ва «Анжи-Тур» фирмаялде анин путевкаби росизе.

«ТIубачIеб хIежалъулхъ киназго гIаммаб къагIидаялъ кьуна миллионгун микьнус азарго гъурщ.

21 сентябрялда гьеб гIарац кьуна «Анжи-Туралде» ва гIарацгун тIагIана фирмадул нухмалъулев ГIабдуразакъов. Гьесул телефоналъул лъабабго номерги хIалтIулеб гьечIо, кив гьев вугевали лъалебги гьечIо лъиданиги», - илан бицана Сатираевас.

Калининаул росдалчагIи полициялде гIарзагун ун руго. Хасавюрталъул жанисел ишазул идараялда «Эркенлъи» радиоялъе бицана гIарзадул хал-шал гьабулеб бугилан жидеца ва метер-сезе гьелда хурхун такъсир гьабиялъул иш рагьизе бугин.

Республикаялда гIумру гьабулел хIежалде ритIизе ихтияра исана кьун букIун буго кIиго турфирмаялъе илан бицана «Эркенлъи» радиоялъе Дагъистаналъул буссурбабазул динияб идараялъул пресс-хъулухъалъул нухмалъулев МухIамадрасул ГIумаровас.

МухIамадрасул ГIумаров: «Исана нижеца аккредитация кьуна кIиго фирмаялъе: «Марва-тур» ва «Баракат». Жидеего кумекалъе гIоло хIежалъулаб кампаниялде гъорлъ гьез бачана жеги кIиго турагентство – «Равза-тур» ва «Караван».

Цогидал фирмабазул ихтияр букIинчIо гIадамал хIежалде ритIине. Аферистаз гуккарал полициялде инее ккола».

«Анжи-Тур» фирмаялъухъа баянал «Эркенлъи» радиоялъе щвечIо – гьезул цониги телефон хIалтIулеб батичIо.
XS
SM
MD
LG