МагъчIваялъе рес

Боксер М. ГIабдусаламов захIматго вуго


Russian boxer, native dagestanian Magomed Abdusalamov

Дагьалъ цебе рингалда сакъатлъи ккарав Дагъистаналдаса боксер ГIабдусаламов МухIамад жеги захIматаб хIалалда вуго Нью-Йоркалъул азарханаялда. Сах гьавиялъухъ гьесул цIакъго гIемер гIарац унеб буго, гьединлъиядал гIагарлъиялъ, спортсменаз ва пишацояз гьесул хъизаналъе гIарцудалъун кумек гьабулеб бугилан лъазабулеб буго цо-цо информалатаз.

Боксер ГIабдусаламов МухIамад азарханаялде хъамуна боксалъул къец лъугIараб сагIатго. Гьесул квер бекун букIана.

Амма дове щварабго гьев лъавудаса ун вуго. Гьесул промоутер Борис Гринбергица информалатазе бицухъе, боксерасул гIадалнахалде би бачIун буго ва тохтурас гьесул гвангвараялъул цо бутIа къотIун буго.

МухIамад ГIабдусаламов гьабсагIаталда жеги лъавуде вачIун гьечIо. Гьесул чIужугун лъимал ва кинабго гIагарлъи гьесда аскIоре щун руго. Щибаб къоялъ Нью-Йоркалда бугеб азарханаялда гьев сах гьавиялъухъ гIемераб гIарац кьезе кколеб бугилан лъазабулеб буго гьесул вац ГIабдусаламица.

Пишацояз, спорсменаз МухIамадил хъизаналъе гIарцудалъун кумек гьабиялъе гIоло банкалда счет рагьун буго гьенибе гIарац реххизе бокьаразе. Кумек гьабизе бугин лъазабун буго чанго спортсменаз, бизнеменаз ва гIадатиял гIадамаз.

ГьабсагIаталда МухIамадил кинаб ахIвал-хIал бугебали «Эркенлъи» радиоялъе бицана Америкаялда вугев гьесул вац ГIабдусаламилгун гьоркьоса къотIичIого бухьен бугев ЧIанкIалаев Булачица.

ЧIанкIалаев Булач: «ГьабсагIаталда гьесул хIал цIакъго захIматаб буго. Амма жакъа дагьалъ цебе бачIараб информациялда рекъон, дагьабго лъикIлъулеб буго хIал. Живго МухIамад жеги лъавуде вачIун гьечIо, амма гьорой 15 проценталъ дагьлъун бугилан бицана.

Гьеб азарханаялда унти сах гьаби цIакъ хираго буго, щибаб къоялъ кьезе кколеб рагIула щуазарго доллар гIарац.

ГьедигIан рес гьечIо боксерасул хъизамалъул. Гьеб гуребги, Нью-Йорк гIумру гьабизе хирияб бакI буго, гьенире араб гIагарлъиялъулги гIемер гIарац инарищха.

Гьесул вац ГIабдусаламица ва Сурхайица щибаб сагIаталдаса дида лъазабула бугеб хIал, дица абуни интернеталдаса ва цоги батIияб къагIидаялъ лъазабула гIадамазда, бичIчIизабула бугеб ахIвал-хIал.

Дица гьеб щвезабуна президентасухъеги, Пачалихъияб думаялъул депутатазухъеги, гьездаса кумек щвеялъе хьулгун.

Кумек щолеб буго, амма кигIан къадаралъ лъаларо дида, гьединаб информация кьоларо гIагарлъиялъ. МухIамадил пишацоял боксеразги гIемер кумек гьабулеб буго.

Дагьалъ цеве дун кIалъана боксер СултIан Ибрагьимовгун. Гьев ва жеги чанго чи арбагI къоялъ Нью-Йоркалде роржине хIадурун руго. ХIасил, кумек камулеб гьечIо. Кинабго бараб буго живго МухIамадида, хьул буго гьев кватIичIого сахлъиялда».

Информалатазда ва блогосфераялда цо-цоязул пикруялда рекъон, боксер гьеб хIалалде ккеялъул гIайиб тохтуразда буго.

Промоутер Борис Гнирбергил рагIабазда рекъон, азарханаялде вачарабго МухIамад ГIабдусаламовасул квер ва мегIер бекун букIана, амма гьес чIечIого бицунеб букIана жиндир бетIер унтулеб бугин.

Амма тохтурзабаз чанго сагIаталдаса гурони ботIрол сурат бихъичIо ва унти тIатинабичIоян. ГIайиб гIунтIизабулеб буго гьединго къецал гIуцIараздаги, ай тIадехун рехсарав промоутерасдаги.

Данделъи лъугIун хадув сакъатлъи ккарав спорсмен азарханаяде вачине хехаб медицинаялъул машина ахIун гьечIо лъицаниги, боксер щвезавун вуго таксиялда гьесул гьудулзабаз. Гьезул рагIабазда рекъон, боксер лъавуде вачIун хадув ва гьесул гIумруялъе хIинкъи гьечIолъи мухIканлъун хадуб къецал гIуцIарал ва тохтурал диваналде цIазе бегьула жиндир заманалда кумек гьабичIилан.

МухIамад ГIабдусаламовасул спортивияб карьера гьелдалъун лъугIанин рикIкIунеб буго гIемерисез, щайгурелъул гьединаб гIузру ккун хадуб жеги бокс кьабизе бегьуларо. Гьеб букIана гьесул тIоцебесеб къей ва ахирисеб спортивияб дандчIвай.
XS
SM
MD
LG