МагъчIваялъе рес

«ХIамабагьадурлъи» гьабулел низам цIунулезе кинаб тамихI къотIилеб?


Салатгереев Шамилил ихтиярал цIунулей адвокат Сапият МухIамадова

Казбек мухъалъул Калининаул росулъа Салатгереев Шамилида тIад зулму гьабун буго гьезулго полициялъул хIалтIухъабаз. Низам цIунулез гьесде гIунтIизабулеб буго росулъ гьес цIогь гьабун бугилан абураб гIайиб. Амма гьесул адвокаталъ абулеб буго гьесда кинабгIаги гIайиб гьечIилан. Гьесда тIад хIал гьабурал полиицялъул хIалтIухъаби тамихIалде цIай тIалаб гьабулеб буго гьелъ.

Шамил низам цIунулел хIалтIухъабаз ккун вуго сентябралъул 18 абилеб къоялъ.

Шамил ккола кIиго лъимадул эмен, Чачаналда контракаталда рекъон рагъулаб хъулухъ тIубалев вукIун, болжал лъугIун кIиабизеги гьениве ине документал хIадурулев вукIун вуго гьев «Адам» абураб автомобилал къачIалеб бакIалда аскIов эхтун вукIарав гьесда аскIоб лъалхъизабураб «Нива» автомобилалъуса къватIиве вахъарав полициялъулас гьесда абун буго жинда цадахъ вилълъине кколин мунилан.

Автомобилалда жанив рекIун хадув полициялъулас гьесда гьикъун буго дуда лъалищин гьабсагIат киве мун вачине вугевали, гьас лъаларин абидал, кватIичIого лъазе бугин дуда гьебиланги абун Казбек мухъалъул жанисел ишазул идараялде вачун вуго Шамиль.

Гьелъул кIиабилеб тIалаялде гьев вачараб кабинеталъур жегиги ратун руго ункъо полициялъулал. Калининаулалъул участкаялъул инспектор Мусавузовас гьасда абун буго мун дова къватIив чIайин жидеца ахIизегIан.

КъватIивехун чIарав гьасда рагIун буго гьав вачун вачIарас жиндирго пишацоясда абулеб: «Башир, лъикIаб хIалалъ кьабе дов, жинцаго бикъарабги ва Калининаулалда гьанжелъагIан ккараб цIогьалъулги гIайиб гьес жиндаго тIаде босизегIанилан».

Гьев чияс Шамилида тIад бронежилетги ретIун байбихьун буго гьесул бетIер бухизе. Кьабулаго гьес гьасдаса тIалаб гьабулеб букIун буго гьас бикъараб руччабазул шубаги ва цоги гьасда щибниги хIакъикъат лъалареб цIогь гьабурав чи вугин живан мукIурлъеян.

БикъичIин жиндица щибнигиян ахIделев гьавги тун лъикIаб хIалалъ кьабун вуго гьез Шамил.

Кингоги гьасде гIунтIизабулеб гIайибалъе гьав мукIурлъичIев гьес цогиги бронижилет ретIун буго гьез Шамилида ва нахъойги кьабизе байбихьун буго.

Кьабиялъул хIасилда гьесул квешго бетIер сверизе лъугьун буго, берда цебе накIкI лъугьун щибниги бихьулеб букIинчIин жиндаян хъвалеб буго Шамилица гьеб лъугьа-бахъиналъул хIакъалъулъ.

Гьедин гьасул хIал дагьлъизегIан кьабун хадув гIодов ккарабго жанисел ишазул идараялъул тIоцебесеб тIалаялде вачун вуго гьез Шамиль. Гьений цееккун гьасда йихьизецин йихьичIей гIаданалъ абун буго гьасда расги ургъел ккогейин гьаб кIиго кагътида гъулбасги гьабун рокъове ине бегьулин мунилан.

Жинцаго гьабулеб жо жиндаго лъикIалн бичIчIуларев Шамилица гъулбас гьабун буго гьеб кагътида. Гьелдаса хадуб гьав кьабулев вукIаразул цояс аскIовеги вачIун гьикъун буго Шамилида дуца кинаб хъалиянин бухIулебан. Гьас абун буго «Континет» абураб маркаялъул хъалян бухIулилан.

Гьелласа хадуб гьасул кисинир рукIрала гьеб маркаялъул хъалябиги, Nokia моделалъул телефонги, 40 азарго гъурущ гIарацги бахъун буго гьез Шамилил кисиниса. Гьале гъоб цIогьазул пиша, чванта цIураб гIарацгун хьвадулев вуго гьав угъраш, нижин абуни гьанир моцIалъе бачIунеб харжида бадире ралагьун рукIунилан. Амма гьеб гIарац букIун буго живго бетIергьанаб автомобиль бичун Шамилие щвараб гIарац.

Шамилил ихтиярал цIунулел руго адвокат Сапият МухIамадовалъ. Гьесда тIад гьебшинаб зулму гьабурав полициялъул хIалтIухъаби чанго батIияб такъсир гьабиялъул статьялда рекъон тамихIалде цIазе кколилан абулеб буго гьелъ

МухIамадова Сапият: «Гьелде тIадеги кьабун хадув щибниги букIинчIеб гIадин чай кьелищ дуегоянги абун къватIиве щвезавун вуго гьев, гьенив гьесухъ балагьун чIун Шамилил хъизамалъул вацги вукIун вуго.

Гьев живгоги полициялда хIалтIулев вукIарав чи рагIула. Шамилица гьесда бицун буго жиндиего гьабунщинаб. Рокъове щвезегIан нухдаги, рокъове щун хадувги би лагIулеб букIун буго гьес, гьедин тIубараб къо вегун ун буго гьесул.

Нахъисеб къоялъ гьев рокъове вачарав гьесул хъизамалъул вац ун вуго полициялде гьез Шамил кьабиялъе гIилла тIалаб гьабун.

Гьесдаги абун гьез руччабазул шубаги цоги шибалигоги бикъиялъул щаклъи бугин гьесдаян.

Рокъове щваравго гьесда живго жинцаго чIвазе къасд гьабулев ватула гьесда Шамил, гьес хех гьабун «Хехаб кумекалъул» автомобильги ахIун азарханаялде хъамула гьев.

Жеги рукIалиде вачIун гьечIолъиялъ рагIа-ракьанде щун гьевгун гара-чIваризецин щвечIо диеги, гьесие ккаралъул мухIканлъи дидаги гьесул гIагарав чияс бицана».

Шамилихъа нахъе бахъараб гIарацги цогидабги гьесул кисиниб букIараб жо полициялъулаз жеги нахъбуссинабун гьечIо.

Полицияъулаз кьабун хадув рокъове виччарав Шамилица гьеб кинабгоги захIмалъун къасд гьабун живго жинцаго чIвазецин.

Гьесул гIагаразда жиндир заманаялъ тIатинеги тIатун гьезда кIун буго гьеб вахIшияб къасд чIезабизе.

ГьабсагIаталда Казбек мухъалъул аслияб азараханаялда вегизавун вугев Шамилида жеги захIматго гурони кIалъазе кIолеб гьечIилан бицана Сапиятица хдубги.

Гьеб хIужаялда тIасан Шамилица жинцаго гIарза хъан буго Дагъистаналъул нухмалъулев Рамазан ГIабдулатIиповасухъе, ЦIех-рехалъул комитеталъул Дагъистаналда бугеб бутIаялъул нухмалъулесул ишал тIуралев Тугай Тугаевасухъе ва Республикаялъул прокурор Шагьнавазов Рамазанихъеги
Жийго Сапият МухIамадова гьеб гIарзагун ЦIех-рехалъул комитеталде ана итни къоялъ.

Гьелда тIасан рагьараб такъсир гьабиялъул иш Москваялдеги битIун гьениб тIобитIизе кколин цIех-рехилан абулеб буго адвокаталъ.
XS
SM
MD
LG