МагъчIваялъе рес

Сириялда рагъулел Дагъистаналдаса спортсменал


.

29 августалда Миллияб библиотекаялда тIобитIана Дагъистаналдаса спортсменал Сириялде рагъизе иналъул суал гьоркьоб лъураб данделъи.

Рамазан ГIабдулатIипов - волейболист, парламенталъул председатель Хизри ШихсагIидов – 1997 соналдаса байбихьун «Анжиялъул» президент, хIукуматалъул нухмалъулев ГIабдусамад ХIамидов гугарухъанлъун кколеб республикаялда щуазарго тренерги гьалщинал Олимпиялъул чемпионалги рукIиналда гIадлъизе кколеб батиларо.

Амма гIажаиблъизе бачIунеб жо буго ахираб заманалда гьезул цо-цоял изну гьечIого яргъид гIуцIаразда гъорлъ рехсолел рукIинги Шамалде рагъизе унел рукIинги.

Спортсменалго гIадин гьенире цогидаб махщалил гIолохъабиги иналъул баяналги руго. Жеги чIванкъотIун лъалеб гьечIо гьел киназулго къадар.

Амма лъалеб жо бугин гьелъие гIорхъи чIвазе кколеблъиян лъазабуна спорталъулгун физкультураялъул министр МухIамад МухIамадовас.

Мавлет Батировасул цIар лъураб Хасавюрталъул спортивияб школалъул директор Абакаровас бицухъе, батIи-батIияб даражаялда чемпионаллъун рахъарал гIолохъабазул 14-яв ун вуго Шамлде.

Цинги ункъоял нахъе рачIун руго. ХIамидовасул цIаралда бугеб спорталъул КIалгIаялдеги рачIун бицанин гьез Шамалде иналдаса жал рекIекълъун рукIинилан абуна Абакаровас.

«Унголъунги гьел рекIекълъунги ратани, жал мекъи рукIиналъе мукIурлъунги ратани, гьел спортсменал гьаб данделъиялдеги рачине бегьулаан.

Амма дораса тIадруссарал гIемерисез бицунеб жо цого букIуна – Башар Асадил вахIшилъиялъулги гьес исламалъе гьабулеб заралалъулги хIакъалъулъ», - ин щаклъи загьир гьабуна министрас.

ГIадамал чIвазе гурин нилъеца спортсменалги чемпионалги гIезарулел, тIоцебесеб иргаялда, нилъеца гIадан куцазе кколин абулеб букIана библиотекаялде данделъарал чемпионазги, гIадатиял спортсменазги, спортшколазул нухмалъулезги.

Министр М. МухIамадовас дагьа-макъалго бадирчIваял гьарулел ругоан тренеразегун спортшколазул директоразе, куцазе бачIараб лъимер кинаб хъизаналдаса, кинаб горсвериялдасаяли хал гьабулеб гьечIин гьезилан.

Амма машгьурав тренер МухIамад ХIусеновас абуна тренерасухъе щвелалдего, ясли-ахалдаго куцазе кколин лъимер, гурони хадуб кватIун кколила.

Гьединго къойилго спортсменазе рухIиял дарсал лъезе чи витIейин чан нухалъила ахIи бараб жинца мажгитазде. Абунила гIарацги жиндирго чвантиниса кьелилан. Амма лъицаниги щивниги витIун вачIинчIила.

Жалго жакъасел тренераздаги ракI рекъолеб гьечIоан ХIусеновасул. ХIалтIи гьечIого хутIанщинав чи унев вугила тренерлъун. Гьединлъидал гIолохъабазда мисал бихьизабизе чи дагьав ватулев вугила.

Жидеда тренерал цIакъго тIадегIанал чагIилъун рихьулаанин, гьезул нухдаса таризеги кIолароанин ракIалде щвезабуна машгьурал спортсменал МухIамад ГIарациловасгун, Жалал Къасумовас, гьединго Расул Мирзаевас. Масала, гьабсагIат вугеб борхалъиялде жив Олимпиялъул чемпион Сагид МуртазагIалиевасул мисал сабаблъун ваханин бицана Расул Мирзаевас.

Церехун дунялалда рагIарал спортсменал гьанже рагъизе Шамалдего гIадин, рохьореги унел ругин, яги изну гьечIого яргъид гIуцIаразе кумек гьабулел рукIунин абула.

Амма жакъа бахинчIониги, метергIаги гьелъул баракат гьечIолъи бахинчIого хутIуларин бичIчIизабулеб бугоан спорталъулгун физкультураялъул министр МухIамад МухIамадовас.

Гьелъул тIириги щивасде щвезе рес бугила. Гьединлъидал тренеразги спортшколалъул директоразги кIвар кьезе кколила гьелде. Гьедин абулаго министрасул бер речIчIана Гъуниб мухъалъул администрациялда цебе гIуцIараб спорталъул ва гIолилазул ишазул рахъалъ Управлениялъул нухмалъулев Сагитов МухIамадида.

Гьес жиндир кIалъаялъул сан гьабулеб гьечIиланищ ккарабали, Сагитовасе бадирчIваял гьаризе лъугьана министрас вахъинавун тIадегун: «Бищун гIемер магжилал щай Гъуниб районалда ругел, тIубарал мажгитал щай гьез ккун ругел?

ЦохIо дуда гьелъул жаваб кьезе кIунгутIи лъалеб жо буго. Амма гьелъул ургъел гьечIолъи бихьулеб буго районалъул хIакимзабазе. Дие гIагараб бакI букIиналъ бачунеб буго дица Гъуниб районалъул мисал. Цогидал бакIаздаги лъикIаб хIал гьечIо.

Хьаргаби районалдаса чи кив вугев? МухIамадгIали, вахъая тIаде (КIикIуниса ГIусманил цIаралда бугеб спорталъул КIалгIаялъул директор МухIамадгIали МухIамадзагьидов – авт.).

Дов магжилав кидалъагIан дуца аскIов тезе вугев?»

Кинабали заправка бухIарал чагIазулгун бухьен бугин гьев чиясулин бичIчIизабулеб бугоан министрас, амма щиб кинали мухIкан гьабичIо.

Директорасги абуна гьев «магжилав» кватIичIого живго унев вугин гьениса нахъе.

Жакъа модалъун лъугьун бугин мегежги тун, тIажалги къокъ гьарун рукIине, амма диналъ гьеб тIадаблъун гьабулеб батанигицин, гьелда рекъараб берцинаб гIамал бихьизабулеб гьечIин гьел гIолохъабазин тIаде жубана министрасги тренеразги.

ПалхIасил, гьел киналго мукIурлъулел ругоан жакъа гIолилал бокьараб ккагиян абулеб хIалалда рехун тун рукIиналъеги, жибго пачалихъалъул рахъалдасан идеология гьечIолъиялъеги, гьелдаса пайда цогидал къуватаз босулеб букIиналъеги.

«Нилъее чемпионал гуро къваригIун ругел. ГIела гьанжелъагIан гьел куцарал. Жакъа къоялъ кинаб къагIидаялдалъун чемпионлъи щолеб бугебалиги балъгояб жо гуро. ТIубараб рагъ унеб буго дунялалда «унго-унгоял чепионал щал, хIилла гьабун чемпионаллъун рахъарал щал?» абураб суалалда тIасан.

Нилъеца куцазе ккола гIадамал. Нилъеца кIвараб хIаракат бахъизе ккола нилъерго лъимал мекъи нухде ккечIого рукIиналъе. Гьаниб министр МухIамад МухIамадовас Сагитов МухIамадие бадибчIвай гьабуна.

Амма жиндир заманалда гьес гIезегIан гIолилал хвасар гьаруна, рахъинаруна кекусинкаялъул чемпионаллъун», - илан бицана МухIамад-Эмин ХIажиевас. Гьев ккола спорталъул рахъалъ ДРялъул президентасда цебе гIуцIараб шураялъул нухмалъулев хисулев.

Машгьуралги гьанжего гьанже церетIун рачIунелги спортсменал хъачагъазухъе инчIого рукIиналъе нухал ралагьулаго, щивас загьир гьаруна жиде-жидер пикраби. Масала, Расул Мирзаевасда лъикIаблъун бихьулеб бугоан рикIкIада мугIрузда ругел гIиси-гIисинал росабалъеги рачIун машгьурал спортсменаз гьитIи-гьитIинал чемпионатал тIоритIун, спорт машгьур гьаби.

ФСБялъул вакилас абуна спорталъул министерлъиялда хасаб хъулухъ гIуцIизе кколин республикаялда спортсменазда сверухъ бугеб ахIвал-хIалалъул мониторинг гьабулеб.

Машгьурав гугарухъан ва политик Элмади ЖабрагIиловасин абуни рикIкIунеб бугоан щивасда бичIчIизе кколин Аллагьас нилъее сайгъат гьабураб тIабигIаталъул берцинлъигун бечелъаби хадусел гIелазухъе кьезе бажаруледухъ цIунизе кколеблъи.

Гьеб мехалда рагъизе лъиданиги ракIалде кколарилан.

Комментариял (2)

Гьаб форум къан буго
XS
SM
MD
LG