МагъчIваялъе рес

Р.ГIабдулатIипов: «Кидаго гIарац гьаризе кколаро»


Гьал къоязда Россиялъул премьер-министр Дмитрий Медведев дандчIвана заманалъ Дагъистаналъул бетIерасул ишал тIуралев Рамазан ГIабдулатIиповгун. Гьеб тадбир кин арабали бицана ГIабдулатIиповас талат къоялъ кьураб пресс-конференциялда.

Медведевасулгун букIараб дандчIваялда аслияб къагIидаялъ Дагъистан цебетIеялда хурхарал суалал рорханин бицана Рамазан ГIабдултIиповас 27 августалда тIобитIараб пресс-конференциялда.

Дагъистаналъул вакилзабаз республика цебетIеялъе хIадурарал киналгIаги проектазеги лъикIаб къимат кьунин премьер министрасиланги абуна гьес журналистазда.

Рамазан ГIабдулатIипов: «Гьес «Дагъистан цебетIеялъул корпорациялъулги» рахъ ккуна, гьединго ВнешЭкономБанкалъул гIарцул цо къадар нилъер республикаялде бусснабизе бегьилин дица абидал, гьелдеги щибго дандечIей гьабичIо Дмитрий Медведевас.

Кидаго тIалъиялда гIарац гьарулел рукIинчIого, Дагъистан цебетIеялъе хIалтIи гьабизе къваригIун буго, гьелъие нижеца бицен гьарурал гIемерисел проектал къабул гьаруна Россиялъул премьер-министрас»

Пресс-конференциялда ГIабдулатIиповас бицана Дагъистаналъ федералиял цолъарал программабазулъ дагьабги цIикIкIун гIахьаллъи гьабизе къваригIун бугиланги. Гьезулъ гIахьаллъи гьабизе Дагъистаналъул рес букIине санагIалъабиги гьарилин къотIи гьабун буго Медведевас ва ГIабдулатIиповас.

Рамазан ГIабдулатIипов: «Гьаб сагIат Дагъистаналъ 17-18 программаялъулъ гIахьаллъи гьабулеб батани, 2014 соналъ 24 программаялъулъ гьабизе ккола нилъеца гIахьаллъи. Дица гьеб лъикIаб хIасил бугилан рикIкIуна.

Дица гьеб суал Владмир Путингун дандчIвалеб мехалдаги борхун букIана, гьанже Медведевасдаги бицана гьелъул.

ГIемерисел цолъарал федералиял проргаммабазулъ гIахьаллъи гьабун бажарулеб гьечIо нилъер республикаялъ гIарац гьечIолъиялда бан.

Гьединлъидал Дмитрий Медведевасги дицаги къотIи гьабуна Дагъистаналъ гьел федералиял цолъарал программаби гIумруялде рахъинариялъе 10 процент гIарцул кьуниги гIелилан.

Дандекквеялъе бицинин, масала, цо-цо программаби гIумруялде рахъинаризе ккани гьелъул гIахьалчагIаз 50 процент гIарцул кьезе ккола»
­­­­Дмитрий Медведевасулгун букIараб гьеб дандчIваялда рорхарал суалазул бищунго кIвар бугезул цояблъун букIанин МахIачхъалаялъул аэропорт къачIаййиланги лъазабуна ГIабдулатIиповас.

Рамазан ГIабдулатIипов: «Аэропорт къачIалъул бицунаго абизе ккола Дагъистаналда бараб жо гьениб щибниги гьечIилан. Гьелъие хIажатаб гIарацги федералияб бюджеталдасан биччан буго, гьениб хIалтIи гьабиги федералиял министерлъабаз тIаде босун буго.

Россиялъул экономикаялъул министерлъиялда цебе бугеб хасаб экспертизаялъулаб комиссиялъ аэропорталда бугеб диспетчеразул рукъалъул гIунгутIабиги ратун хIалтIи байбихьулеб гьечIо.

Гьеб суалалъул халги гьабун аэпорталда хIалтIи байбихьизе гIамал гьабейилан лъазабуна Медведевас Россиялъул экономикаялъул ва транспорталъул министразда. Гьеб хIалтIи заманалда байбихьичIони аэропорт цIигьабиялъе биччараб цо миллиардгун 300 миллион нилъер гьоркьоб инеги бегьула»

Гьединго ГIабдулатIиповас бицана Каспийскалъул «Авиаагрегат» заводалда гьитIинал юк баччулел автомобилал риччаялъул проектги къабул гьабунин Дмитрий Медведевасиланги.

Дагъистаналъул нухмалъулесул рагIабазда рекъон гьел машинаби къватIире риччазе лъугьани Дагъистаналъул экономика цебетIезе буго.

Гьеб гурониги Дагъистаналъул росдал магIишат цебетIеялъулъги гьел автомобилаз кIудияб бакI кквезе буго Рамазан ГIабдулатIиповасул пикруялда рекъон.
XS
SM
MD
LG