МагъчIваялъе рес

ХIалаллъи тIалаб гьабулеб экспозиция


Дагъистаналдаса бизнесчагIазе нух кьезе ккола хIалалаб бацIцIадаб кванил нигIматал гIезаризе. Гьеб масъала гIумруялде бахъинабиялъе гIемераб гIарац хIажат буго жакъа республикаялъе. Гьелъие ругел ресазул журналистазе бицине арбагI къоялъ МахIачхъалаялда данделъун рукIана «Каспий-ХIалал» абураб гIуцIиялъул вакилзаби.

Аслияб куцалда пресс-конференциялъул гIахьалчагIаз журналистазул пикру буссинабулеб букIана Дагъистаналде кIвангIан цIикIкIун инвесторал цIазе кколилан. Августалъул 23 -25къоялъ Каспийскалда выставка тIобитIизе буго "ХIалал-Экспо" абураб гIуцIиялъ.

Гьеб Выставкаялда гIахьаллъизе рагIула цохIо Россиялдаса гурелги гьединго Пакистаналдаса, Малайзиялдаса, Турциялдаса, Цолъарал Штатазул республикаялдаса ва цогидалги улкабаздаса вакилзаби.

Выставкаялда Дагъистаналдаса бизнесчагIаз рихьизаризе руго батIи-батIиял проектал, хIалалаб кванил нигIматазул, ретIел-хьиталъул ва цогидабги къайи-цIаялъул тайпаби

Гьеб киналъего бетIерлъи гьабулеб буго "Рисалат-Холдинг" абураб гIуцIиялъ. КIиго соналъ тIатIалаго ХIалал Экспоялъул цIаралда гъоркь гьез выставка тIобитIун буго Москваялдаги.

Гьелъ кIудияб пайда кьунин нижжее цогидал инвестораздаги нижееги нижер хIалтIиги лъазеян бицана «Рисалат Холдингалъул» нухмалъулев Мокъушдибиров МухIамадица.

Киназдаго лъалин Дагъистналъул инвестициялъул рахъалъ рекъдулеб хутIун букIин. Амма жал ине ругин батIияб нухалъ. Кинаб нух гьебали гьадин бицана журналистазе Мокъушдибиров МухIамадица

Макъушдибиров МухIамад: «Жидерго кисиниса цIикIкIун гIарац кьезе инвесторал разилъичIонигицин нижеца гьезулгун къотIи-къаял хвезе течIого рагIалде рахъинаризе руго. Нижеего зарал бугеб хIасил гьелъ кьолеб бугоанигицин ниж гьелдаса руссинаро.

Щайгурелъул гьеб куцалда щуго анлъго инвесторасулгун къотIи-къаял гьаризе нижеда кIванани гьез жидедаго хадур цогидалги цIазе руго.

Дагьав цевегIан гьанив имам чIварав мехалъ лъугьун рукIана гьел бакьангурин жидее Дагъистаналда бизнес гьабизе.

Амма кин бугониги гьез таваккал тIамуна гьанире рачIине рачIаралго гьаниб тIубанго батIияб ахIвал-хIал букIун бугилан мукIурлъана гьел, информалатаз хIакъикъат батIайиса кьолеб букIун бугин нижее.

Гьанжеялдего 100 миллионалъул багьаяб проект буго нижгун хIалтIизе разилъарав инвесторасул, ракIалде ккола гьелдаса 75 миллион гъурщил багьаяб хайир щвелилан.

Ниж хIадурал руго инвесторалгун лъагIалица чIорого хIалтIизе, гьебмехалъ гьезда бихьизе буго Дагъистаналда нижеца хIалтIи гьабулеб букIин ва гьаниб бизнес цебетIеялъе киналго шартIал рукIинги»

Гьелда бан журналистаз кьуна гьесие суал кинаб куцалда гьезда инвесторал Дагъистаналде рачIинаризе ракIалда бугебилан.

Дагъистаналда гIемерал машгьурал спортсменал ругин гьезда лъалел гIемерал чагIи ругин къватIиса хIукуматалда гьезул кумекалдалъун гьаризе ругилан инвесторазулгун къотIи-къаял.

Жакъа Дагъистаналъул базаразда бичулебщинаб кванил нигIмат 80-90 процент буго къватIиса бачIарабщинаб. Росабалъ гIезабураб хIалалаб бацIцIадабщинаб нигIмат дагьлъулеб бугин къо бахъанагIанилан рази гьечIого руго гIемерал гIадамал.

Рес бугищ жакъа гьелда жаниб хиса-свери гьабун хIалабщинаб, нилъерго чагIаз гIезабураб къайи-цIаги, кванил нигIматги цIикIкIинабизеян суал кьуна журналистаз «Каспий-ХIалал Экспоялъул» вакилзабазе.

Гьеб жидер хIаракатчилъиялда цебе чIараб аслияб масъалабазул цояб кколин. Нилъерго ватIаналда бугеб лъикIабщиналъул миллатги гьабичIого чияр нигIматазул къимат гьаби гIакълулъун кколарин

Гъуниб мухъалъул Гьонодаса, живго КIогьориб росулъ гIумру гьабун вугев Расулов АхIмадил исана микьабго сон буго Дагъистаналда гIезабураб пихъалъул бахъараб сок хIадур гьабун бичуле бугелдаса.

КIагьадерил консервал хIадурулеб заводалда инжеенр технологолхун хIалтIулев инсул кумекалдалъун гьесда кIун буго живго бетIергьанаб бизнес хIадуризе Амма гьесул бизнесал]е кIудияб конкуренция гьабулеб къватIиса босун сок бичулел бизнесчагIаз.

Гьеб гуребги лъикIаб даражаялъулаб сок хIадур гьабиялъе хIажалъулеб техника босизеги цIакъго гIемераб гIарац хIажаллъулеб бугин.

Гьединал жалго бетIергьанаб бизнесалъул бетIергьабазе кумек гьабизе бугин жидецаян абулеб буго Каспий-ХIалал Экспо гIуцIиялъул вакилзабаз.
XS
SM
MD
LG