МагъчIваялъе рес

Дагъистаналдаса нигIматазе цо цIар ургъизехъин буго


Cognak from Daghestan

Дагъистаналдаса къватIире ричулел нигIматазе хасаб бренд ай цIар ургъулеб буго республикаялъул хIукуматалъ. Гьеб брендалда гъорлъ ричалел нигIматал экспорт гьаризе руго россиялъул регионаздаги, Россия тун цогидал улкабаздеги.

Гьал къоязда республикаялъул хIукуматалда тIобитIараб данделъиялда вице-премьер Шарип Шариповас абуна Россиялда лъикIалан лъалин Дагъистаналдаса коньякги минералияб лъимги, амма, мисалалъе, пихъ-овощазул консервазул хIакъалъулъ лъиданиги рагIунцин батуларин.

Гьел консервал цогидал регионазда ва улкабазда ричизе ратании, гьезул къадар цIикIинабизе кколин, абуна Шариповас. Гьесул рагIабазда рекъон, магIарухъ ругел консервазул заводазде хасал комиссиял ун руго. Гьел комиссияз халгьабизе буго заводазда цо соналда жаниб кигIан гIемер консервал ричазе бегьулел ян.

Мисалалъе, исана Харгаби ва Унсоколо мухъазда куракул 20 азарго тонн бакIаризехъин буго. Гьеб куракул бащадабцин бутIа консервазул заводазде щвезе гьечIо. Щай абуни, заводазда шартIал гьечIо гIемерал консервал ричазе ян бицана вице-премьерас.

Дагъистаналдаса къватIире ричулел нигIматал цо брендалда гъорлъ рачиналде цере, гьел нигIматазул къадар экспорталъе гIураб букIине кколин, рикIунеб буго экспертаз. Экономист Сергей Амировас абуна Эркенлъи радиоялъе Россиялда лъалин цохIого цо дагъистаналдаса бренд – коньяк. Коньякалъул заводалги Дагъистаналда батIаго лъикIаб хIалалда гьечIилан тIаде жубана Амировас.

Сергей Амиров: «Россиялдацин брендал ругилан абизе бегьуларо. Нилъер улкаялъул буго кIиго бренд – гIаракъ «Столичная» ва Калашниковасул автомат. Гьел руго тIолго дуниялалдаго лъалел брендал. Регионалиял брендазул бицине ккани, мисалалъе, Дагъистаналъул бренд буго коньяк.

Брендирование абураб жо бигьаго гьабуларо. Дагъистаналъе бокьун буго цо брендалда гъорлъ коньякги, консервалги рачине. Кин гьеб суал тIубалеб? Дагъистаналда коньяк гьабулел чанги завод буго. Бокьиладай гьезие жидерго маркаби цого брендалда гъорлъ рачине? Гьезул бизнесалъе зарал ккезеги рес буго гури.

ТIаде жоялъе коньяказул заводаздаги батIаго лъикIаб хIал гьечIо Дагъистаналда. Республикаялъул нухмалъулев Рамазан ГIабдулатиповас абуна цодагьалъ цебе цIолбол 100 азарго тонна гурони бакIарулеб гьечIин Дагъистаналда.

Цересел саназдани бищун дагь батани 300 азарго тонн бакIарулеб букIун буго. ХIасил-калам, брендазда хадур лъугьине гIедегIун руго Дагъистаналда. Я коньяказул заводаздаги, я консервазул заводаздги ругел масъалаби тIуразе ккола тIоцере, хадуб бицине бегьила брендазулги.

Дир гIакълу лъазе бокьани, дида ккола, коньяк бичалел заводазда ругел суалал тIуразе ккола. Гьеб буго дагъистаналъул бищун лъалеб бренд».

Дагъистаналдаса нигIматал цо цIаралда гъорлъ рачи – гьеб ккола даран-базар роцIинабиялъул политика. НигIмат цебетIеялъулаб гьеб политика ккола заман къваригIунеб жоилан абуна Дагъистаналъул экономикиял бухьеназул ва даран-базаралъул министерлъиялъул нухмалъулев Юсуп Умавовас.

Заман гуребги гьелъие гIезегIан гIарацги къаригIулин абуна Умавовас Дагъистаналъул хIукуматалъул данделъиялда. Дотациял цIикIкIарал республикаялда цIияб проекталъе гIарац балагьизе захIмалъизе буго, гьелдалъун инвесторал ралагьизе ккола илан тIадеги жубана министрас.

Гьесул рагIабазда рекъон, Дагъистаналъул экономикиял лъикIал бухьенал руго Ставропольегун, Астрахань ва Ростов мухъалгун. Минералияб лъим, хIан, коньяк, консервал – гьел нигIматал ричула цере рехсарал регионазе.

Шималияб Кавказалъул федералияб бутIаялда вугев Россиялъул президентасул хасав вакил Александр Хлопониница цодагьалъ цебе абуна кIудиял тукабазда регионалиял хасал стендал гIуцIизе бегьулин.

Гьесул пикруялда рекъон, централияб Россиялда ругел тукабазда Шималияб Кавказалъул республикабаздаса рачIарал нигIматал ругел бутIаби рагьизе бегьула. Гьединго кавказалдаса нигIматазул хасал тукаби рагьизе бегьула Сочиялда Олимпиада байбихьараб мехалда илан абуна Хлопониница.

Амма экономист Амировасул пикруялда рекъон, Сочиялде рачIарал туристазда лъаларо ратIа рахъине кавказалдаса нигIматал. ТIадежоялъе Шималияб Кавказалъул республикабаздаги релъарал нигIматал гьарула ва гьел нигIматалги цо квералъул килщаздалъун рикIине бегьулаян абуна Амировас.
XS
SM
MD
LG