МагъчIваялъе рес

Туркиялда протестантазде данде армия хΙалтΙизабизе бегьула


Туркиялъул нухмалъиялъ лъазабуна, Стамбулалда ва Анкараялда протестазда гΙахьаллъулезде данде армия хΙалтΙизабизе бегьулин.

Бюджеталъул гΙуцΙиязул хΙалтΙухъабазул ва прогрессиявиял профессионалиял цолъиязул конфередерацияз полициялъ демонстрантал риха-хочинариялда разигьечΙолъи загьир гьабулаго, лъазабуна хΙалтΙичΙого чΙеялъул миллияб акция. Гьездего журан руго гьединго медиказул ва инженеразул интересал цΙунулел цолъиялги. Гьез тΙалаб гьабулеб буго полициялъул зулму чΙезаби.

France-Presse агентлъиялъул лъазабиялда рекъон, туркиялъул жанисел ишазул министр Муаммер Гулерица профессионалиял цолъиязул акцияби лъазарун руго къануналде данде кколареллъун ва гьел тΙоритΙизе риччазе гьечΙин.

Туркиялъул инсанасул ихтиярал цΙунулезул хΙисабалда, гьатΙан къоялда Стамбулалда полициялъ ккун вуго 44Ι чи, Анкараялда – 56. Низам цΙунулез протестантазде данде хΙалтΙизабун буго магΙу бачΙинабулеб газ ва лъин.

Стамбулалъул Гези паркалда демонстрация байбихьун букΙана кΙиго анкьалъ цебе, паркалъул бакΙалда дармил центр бай чΙезаби тΙалаб гьабун. Полициялъул хъачΙаб хьвада-чΙвадиялъ цΙикΙкΙинабун буго демонстрантазул разигьечΙолъи ва акцияби хΙукуматалде дандечΙеялде руссун руго. Гьел гьанже тΙиритΙун руго цогидал шагьараздеги.
XS
SM
MD
LG