МагъчIваялъе рес

ХI. СафаргIалиев: «Олимпиадаялда цебе Кавказ бацIцIад гьабулеб буго Кремлялъ»


ХIажимет СафаргIалиев

Июналъул байбихьуда Дагъистаналъул машгьурал, гIемерал соназ хъулухъазда рукIарал тIадчагIи хIалтIудаса рахъана. Республикаялъул президентасул ишал тIуразарулев Рамазан ГIабдулатIиповас лъазабуна гьеб кколин Россиялъул президент Владимир Путинил жигаралдалъун Дагъистаналда гIадлу-тадбир щулалъизабийилан.

Анлъабилеб июналда низам цIунулез ккуна Гъаякент мухъалъул нухмалъулев ГIилмудин ХIамзаев. Гьесде гIайиб гIунтIизабуна бесдаллъималазе мина-карт чIезабизе биччараб гIарац къанунияб гуреб куцалда хIалтIизабунилан.

ГIабдулатIипов хъулухъалде тIамуралдаса ахирал моцIазда гьес хIалтIудаса рахъана Ахти, Гъизилюрт, ЦIунтIа, БежтIа, Бабаюрт, ГIахъуша, Табасаран мухъазул бутIрул.

Цо-цо цIех-рехчагIаз абулеб буго гьединаб политикаялъ Дагъистаналда ахIвал-хIал жеги хIалуцине бегьулилан. Хасго МахIачхъалаялъул мэр Саид Амиров кквеялъ рагъ-кьалалде рачине рес бугилан бицана цо-цо кавказоведаз.

Социалиял сурсатазда хабар тIибитIун букIана Россиялъул Пачалихъияб Думаялъул миллатазул ишазул рахъалъ комитеталъул нухмалъулев ХIажимет СафаргIалиев витIун вукIанила Лефортовоялъув тIамилелда цеве Саид Амировасулгун гара-чIвариял гьаризе, амма гьесул къадру гIечIила гьеб тIадкъай тIубазабизеян.

Гьеб хабаралда ва гьабсагIат Дагъистаналда бугеб политикияб хIалалда тIасан гьадинаб баян кьуна Эркенлъи радиоялъе ХIажимет СафаргIалиевас:

ХIажимет СафаргIалиев: "Саид Амировасулгун киналгIаги гара-чIвариял гьаричIо дица. Унго-унгояб гьереси ккола гьеб хабар. Гьеб бицен кисан баккарабалиги лъаларо дида.

Саид Жапарович ахиралда дида вихьана Рамазан ГIабдулатIипов Дагъистаналъул президентасул ишал тIуразарулевлъун тIамулеб мехалда. ТIокIав гьелдаса дида гьев вихьичIо.

Гьеб цо. КIиабизеги, гьединал темабазда гара-чIвариял гьаризе лъицаго тIадкъачIо дида, тIадкъаниги, тIаде босизеги букIинчIо дица гьеб суал. Гьев Фатуллаевас ва гьесул къайицадахъаз ургъун рахъарал харбал руго гьел.

ТIаде гьужум гьабидал, сайтаздаса гьеб информация нахъе бахъана гьез. Гьел маргьаби сабаблъун «Независимая газета» басмаялдасаги нахъе гьавуна нижеца Фатуллаев.

Дагъистаналъул президентасул ишал тIуразарулевлъун Рамазан ГIабдулатIипов тIамиялда ва гьес билълъанхъизабулеб бугеб политикаялда хурхун гьадин бицана СафаргIалиевас:

ХIажимет СафаргIалиев: "ГIабдулатIипов Дагъистаналде нухмалъуде вачIиналъе гIилла букIана республикаялда ахIвал-хIал лъикI гьечIолъи. Гьеб цо. КIиабизе абуни, 2014 соналда Сочиялда тIобитIизе бугеб Олимпиада ва гьеб лъугьа-бахъиналде Кавказалда чIара-хьараб хIал букIинабизе ккей. Централъ хIехьезе гьечIо гьеб мехалда Кавказалда кьвагьа-гIанхъиял".

Гьединаб ахIвал-хIал Олимпиадаялъул заманалда БакътIерхьул пачалихъазе данде ккезе гьечIо. Олимпиялъул хIаял цоги бакIалде рахъиялъулцин суал лъезе бегьула Западалъ.

Гьеб гуребги, республикаялда гIадлу биххиялъул киналгIаги гIорхъаби рахун руго, гьединлъидал губернаторазе ва миллиял президентазе мутIигIлъуларел федералиял хъулухъаз таваккал тIамун буго Дагъистаналда къанунал рилълъанхъизаризе.

АнцI-анцI соназ мухъазул бутIруллъун рукIарал анкьго-микьго хъулухъчи хIалтIудаса эркен гьавуна ГIабдулатIиповас. Табасаран мухъалъул нухмалъулев НурмухIамад ШихахIмадовасда ва Гъаякент мухъалъул бетIер ГIилмудин ХIамзаевасда тIад низам цIунулез хIалтIаби гьарулел руго.

Гьел тIадчагIи цIакъго тIасан ккун рукIанилан абуна ХIажимет СафаргIалиевас:

ХIажимет СафаргIалиев: "Администрациялъул бутIрул хъулухъалдаса рахъиялъул бицани, щибаб ишалъул жиндирго хаслъаби руго.Цо-цояз бюджеталъул гIарац мекъаб куцалда хIалтIизабун буго, цо-цояз бикъун буго. ГIемерал бутIрул эркен гьаруна хIалтIудаса. Цо-цоял жалго ана нахъе.

Чанги бутIрул гIемерал соназ цого хъулухъазда рукIана. Гьезда дунял бихьи ва бичIчIи гIакса сверизе лъугьана, жиндир бакIги, жинда тIадал ишалги кIочана гьезда, такъсирияб къокъадул цевехъан гурев, администрациялъул бетIер жив кколевлъи кIочон тана чангиясда.

131-абилеб федералияб къануналъ чIезарун руго гьел хъулухъчагIазул масъалаби, борч, тIадал ишал. Дагъистаналда щибав кIиабилев бетIерас политика хIалеб буго, гьездайин абуни тIадаб буго гIицIго мухъалъул магIишат цебе бачине ва масъалаби тIуразе".


Дагъистаналъул цIияб тIалъиялъ суал лъолеб буго нухмалъулезде халкъалъул божилъи загьирлъиледухъ хIалтIизе, гьеб мурадалда гьарулел ругин ахирал моцIазда гIумруялде рахъинарулел хиса-басиялин баян кьуна СафаргIалиевас.

ГIемерал машинабазул читIирги цадахъ бачун, анцI-анцI, нус-нус чи жал цIунулезулги хьолбохъ чIезарун, гIадатияб халкъалдаса рикIкIалъарал тIадчагIазул заман анилан бичIчIизабуна гьес.

Дагъистан экономикияб рахъалъ цебетIезабиялъул бицунаго, Думаялъул комитеталъул нухмалъулес абуна республикаялъул аэропорт халкъазда гьоркьосеблъун гьабизе кколин, ралъдал порталъул къуват камиллъизабизе хIажат бугин, гьединго цIолбохъанлъиялдеги кIвар кьезе къваригIун бугилан.

Комментариял (1)

Гьаб форум къан буго
XS
SM
MD
LG