МагъчIваялъе рес

Къиматал гIодорегIан гьариялъ ЕГЭ-ялъул хIасилал лъикIлъуларо


Школа лъугIараз кьезе кколеб цогояб пачалихъияб экзаменлда сверун ахIи-хIур лъугIулеб гьечIо Дагъистаналда.

Гьал къоязда лъана бищунго аслиязул цояблъун кколеб гIурус мацIалъул экзаменалъул къиматал. Чангияз гьел ургъунго гIодорегIан гьарун ругин рикIкIунеб буго. Гьезул пикруялда рекъон нилъер республикаялда экзаменал рича-хисиялъул ва гьел лъикIал къиматазда кьезе ккани эбел-инсуцаги лъималазги сверун гьарулелщинал ишал рихьун, Россиялда гьеб киналъулго гIемер бицунеб буго.

Гьедин Дагъистаналъул тIалъиялъе гIемерал бадирчIваял гьарулел рукIиналъ ургъунго дагь гьарулел руго гьел экзаменазул балал.

Дагьав цевегIан тарав Дагъистаналъул лъайкьеялъул министр Артур ТIалхIатовас хIалтIуде лъугьун хадуб цIакъ кьварун лъазабун букIана ЕГЭ-ялъул «дармиде» данде жив гIемер къеркьезе вугилан.

Гурони нилъер республикаги, гьанир школа лъугIаралги, гьезие дарсал кьуралги Россиялда сурулел ругила. Гьаниб гIарацги кьун экзаменалъул бищун тIадегIанаб балги босун Россиялде цIализе арал гьезда гьоркьор гIисинал классазул лъималазда лъалебцин лъаларелги чанги ратулел ругила.

ТIоцебесеб цогояб экзамен кьун хадуб Артур ТIалхIатовас лъазабун букIана гьеб кьолелъул гъалатIал риччаялъ 20 хIалтIи унгояблъун рикIкIине гьечIилан.

Итни къоялъ букIараб пресс-конференциялда гьес бицана цохIо Лаваши мухъалдаса 75 цIалдохъанас экзамен цIидасан кьезе кколе бугила, щай гурелъул букIине кколеб хIалалда тIобитIун гьечIо гьеб лавашдерица. Гьединлъидал гьеб мухъалъул лъайкьеялъул бетIер хIалтIуда тун бажаруларин лъазабуна министрас.

Артур ТIалхIатов: «ЕГЭ тIобитIулелъул ругел гIунгутIабазул абидал гьев чи нижер хIалтIухъабазде ахIдезе, гьезие хIинкъаби кьезе лъугьана гьев. Гьединал чагIи хъулухъалда тун бажаруларо. Гьесдаса гурониги цогидал мухъазул лъайкьелъул идараялъул бутIруздасаги рази гьечIо ниж, гьездехунги руго гIезегIан суалал.

Цогояб экзамен тIобитIулаго гьелъул къагIидаби цIакъго хвезарун буго Дербент шагьаралда, гьебго мухъалда ва Шамиль, Табасаран, Агъул мухъазда. Гьединлъидал нижеца чанго мухъалъул бетIерасухъе гьел лъайкьеялъул бутIрул хъулухъалдаса рахъиялъе хIалтIи гьабеян хъвазе буго»

Гьединго ТIалхIатовас бицана исана цониги ЕГЭ ялъе 100 балл щвараб хIалтIи гьечIилан. Абизе ккола цересел саназ гьединал хIалтIаби гIемер рукIунаан нилъер цIалдохъабазул.

Шагьараздаса росабалъе ун экзаменал кьолезул хIакъалъулъ министрас бицана экзаменал кьелалде цере школа хисаразул лъикIал къиматал щвеялде хьул лъогеян. Гьезул хIалтIабазул цIакъго-цIакъ кIвар кьун халгьабизе бугилан.

ЕГЭ ялда хурхун Эркенлъи радиоялъул суалазе жавабал кьуна гIемерал саназ лъайкьеялъул идарабазда хIалтIарай Зайнаб ГIалимирзаевалъ.

Гьелъул пикруялда рекъон ЕГЭ-ялъул балал ургъунго гIодорегIан гьари Россиялъул ТIалъиялда берцин рихьиялъе гьабулеб иш бугила ва гьелъ лъикI цIалулел лъималазе гIемераб квал-квалги кколеб бугилан.

Комментариял (1)

Гьаб форум къан буго
XS
SM
MD
LG