МагъчIваялъе рес

«Анжи» командаялъ 3-абилеб бакI ккуна


20 маялда Дагъистаналъул футболалъул команда «Анжи» хIалеб букIана Москваялдаса «Локомативгун». Гьеб хIаялда бергьенлъиги босун Россиялъул футболалъул чемпионаталда лъабабилеб бакIалде бахана нилъер команда. ХIаялъул хIасил ккана 2:I. Абизе ккола жеги киданиги гьединаб тIадегIанаб бергьенлъи щун букIинчIин «Анжиялъейилан».

ХIаялъул тIоцебесеб бащалъиялда кIиябго команда бащад букIана. 34 минуталда «Локомативалъул» футболист Александ Самедовас кьабуна «Анжиялъе» гол, гьелдаса хадуб 40 абилеб минуталда гьебго «Локомативалдаса» Ведран Чорлукица жидерго кавабахъе торгIо кьабун хадуб кIиябго командаялъул хIасилал бащалъана.

Ахирисеб бищунго аслияб гол 74 минуталда кьабана «Анжиялъул» капитан Самюэль Это'оца. Гьеб бергьенлъиялдаса хадуб «Анжилъе» щвана 53 очко ва Россиялъул футболалъул чемпионаталъул лъабабилеб бакIалде рачIана.

МахIачхъалаялъул футболистал цере ана цIарараб Москваялъул футболияб клуб «Спартакалдаса» ва Краснодаралдаса «Кубань» командабаздасаги.

Спортивияв журналист Айдемир Дагановасул пикруялда рекъон лъабабилеб бакIалъе гIоло «Анжияъ» гьабураб хIай букIун буго кутакалда къуватаб ва жеги гьединаб борхалъуде команда бахунги букIун гьечIо.

Айдемир Даганов: «2003 соналъ Россиялъул чемпионаталда лъабабилеб бакIалъе гIоло Торпердо командагун хIалаго гIемерал рекIкIалги гьарун Анжи къун букIана ва 4 бакI гурони щвечIо гьезие. Гьелдаса нахъе тIокIаб гьелде гIагарабцин хIасилги ккун букIинчIо командаялъул.

Анжи буго унго-унгояб «гIурусазулин» абизе бегьулеб команда цин жидеего квекIенал гьарула гьелъ, хадуб гьезде данде кутакалда къеркьола.

Гьелъие мисаллъун бачине бегьула сон Локомативалдаса Александр Самедовас гьезие гол кьабизе тей. Щибго гьесие квалквал гьабилинцин лъугьинчIо нилъер футболистал. Хадур байбихьаан кутакалда хIалуцун хIазе. Добго Локомативалъ жидерго кавабахъе гол кьабиялъги нилъее гIезегIан кумек гьабунин абизе ккола, амма гьеб голалъ рачанин нилъ бергьенлъиялдейин абизе бегьуларо».

Айдемир Дагановасул рагIабазда рекъон гIагараб заманалда «Анжиялъул» вукIарав тренер Гус Хидингил гьеб командаялъулгун букIараб къотIи-къаяй лъугIулеб буго. ТIокIаб команда куцазе гьечIо гьес, гьесул бакIалда Италиялъул «Ниаполи» командаялъул вукIарав тренер Вальтер Маццари вачIине вугилан.

Дагановас гьединго бицана Сулейман Керимовас «Анжи» босараб мехалдаго бицунеб букIанин Дагъистаналда футбол цебетIеялде гIемераб кIвар кьезе бугилан.

Гьес жиндирго рагIи ккун гIемераб хIалтIи гьабулеб бугила республикаялда гьеб спорталъул тайпа цебетIеялъе.

Хасго лъималазул футболалъул академия рагьиялъ гIемерал ресал кьолел ругила нилъер футбол бокьулезе гьелде руссине. Академиялда ругел лъималазе киналго рукIине кколелщинал ресалги санагIалъабиги гIунцIун ругин гьенирилан бицана гьес.
XS
SM
MD
LG