МагъчIваялъе рес

Къо гьалдолеб буго Дагъистаналда


Дагъистаналъул Буйнакск шагьаралда автомобиль кьвагьиялъул хIасилалда лъукъарав полициялъул хIалтIухъан захIматаб хIалалда азарханаялда вегизавун вуго. Санкт-Петербург шагьаралдаса гIолилав хвеялъул гIайиб гIунтIизабулеб буго Дагъистаналдаса чиясде. МахIачхъалаялъул жанисел ишазул нухмалъулев ГIашикъов Раипиде гIунтIизабулеб буго чанго такъсир гьабиялъул гIайиб.


Россиялъул цIех-рехалъул комитеталъ Раип ГIашикъовасде гIунтIизабулеб буго анкьго такъсир гьабиялъул гIайиб. Гьезда гьоркьор руго 2011 соналъ Каспийск шагьаралъул депутат, «Горводоканал» абураб гIуцIиялъул нухмалъулев ХIажиев МухIамадгIали чIваялъулги, гьединго полициялъул хIалтIухъаби ХIажибеков ГIалиги, ГIашурбеков Нурланги рухиялъул гIайиб.

Рехсарал такъсир гьабиялъулъ гIахьалъарал чагIи хIисабалда щаклъи букIун гьанжеялдего ккун рагIула гьединго Гъизляр шагьаралдаса прокурорасул кумекчи ГIабдулхIалимов МухIамадги, Каспийскалдаса полициялъул хIалтIухъан Жамалудинов ХIажиги, МахIачхъалаялдаса цIех-рехалъул идараялъул хIалтIухъан АхIмадов МухIамадги.

Талат къоялъ информалатазухъа щвараб баяналда рекъон цIех-рехалъул идараялъ тIалаб гьабун буго республикаялъул жанисел ишазул идараялъухъа ГIашикъов Раип гьабсагIат вугеб бакI лъазе гьабеян.

Амма низам цIунулезда лъалеб жо буго гIицIго 22 марталда гUашикъовас лъабго къоялъул отпускги тIалаб гьабун гьев шагьаралдаса къватIиве ун вукIин ва тIокIаб гьесул хIакъалъулъ лъалеб хабарги рагIуларо гьабсагIат.

Раип ГIашикъовасул адвокат йихьун йикIанин жинда ва гьелъ бицанин ГIашикъов цIунулел чагIи кьабизеги кьабун батIияб фамилияги кьун Гъизилюрталда жанир тIамун ругилан абун бицана дагъистаналъул МВД-ялъул хIалтIухъабазул махщалил цолъиялъул нухмалъулев Шамилов МухIамадица.

Хадуй гьей адвокатги тIагIанин, живго Раипги лъалев гьечIин кив вугевали, гьединлъидал битIараб бицани щибилан гьеб хIужаялда тIасан абилебалицин лъаларилан мукIурлъана гьев Эркенлъи радиоялъе:

Шамилов МухIамад: «ГьабсагIаталда дидаго гьелъул хIакъалъулъ лъалеб жо гьечIо, лъазе толебги гьечIо. Гьеб гьикъизе ккола цIех рехалъул комитеталъул нухмалъулев Саврулинида, прокуратураялъул чагIазда.

Цояз абулеб буго жанив тIамун вугилан, цогидаз абулеб буго гьечIин гIицIго такъсирчагIазул рахъалъ нугI хIисабалда ахIун вугилан, газетаз хъвалеб буго гьев жанир тIамурал чагIи къватIире рахъизе кумек гьабулев вукIанилан абун. Гьа, щибилан абун кинал хIужабазде мугъчIвайги гьабунха кIалъалев.

Гьаб заман буго хIакъикъаталдаги кIалъачIого гьелъул бакIалда сакъисги чIамун чIани нилъеего лъикI бугеб заман. ГьабичIеб такъсиралъе гIоло къо гьикъулеб бугони чиясе гьелда дандечIарав чи вуго дун.

Амма гьабун батани Раипица гьеб такъсир, гьеб гьай-гьай рогьоги ничги буго Дагъистаналъул полициялъеги, респбуликаялъул халкъалъеги.

Полициялъул погоналги гъежда ран гIадамал чIвалев чи низам цIунулезда гьоркьов вукIин гьеб дунялалдаго букIине бегьулеб ишги гуро, гьелъул хIисаб гьабидал абизе раги бачIуанрог кIал-мацIги цIорон хутIун вуго дунги».

Дагъистаналадаса МухIамадов Марат абулев гIолиласде гIунтIизабулеб буго Санкт Петербург шагьаралдаса «Зенит» абураб футболалъул командаялъул фанат чIваялъул гIайиб.

Гьеб лъугьа-бахъин ккун букIана 24 февралалдаго, дагъистанияздаги Санкт Петербургалдаса футболалъул фанатаздаги гьоркьоб ккараб рагъулаб тунка-гIусиялъул хIасилалда захIматаб хIалалда азарханаялде вачарав Дмитриев Евегний хвана чанго къоялдасан.

Марат Мусаев ккун вуго марталъул 31-б къоялъ, гьесде гIунитIизабулеб буго ургъунго гIадамасул сахлъиялъе зарал гьаби абураб статьялда рекъон гIайиб. Живго Маратихъа ялъуни гьесул адвокатасухъа кинал ругониги баянал щвечIо.

Дагъистаналъул Буйнакск шагьаралда гьал къоязда кьвагьараб автомобилалъул хважаин, гьебго шагьаралда гIумру гьабун вугев полициялъул хIалтIухъан захIматаб хIалалда азарханаялда вегизавун вугилан хъвалеб буго информ алатаз кьураб баяналда.

Гьеб лъугьа-бахъин ккун буго итни къоялъ калъуда сагIат цо тIабараб гIадаб гIужал буйнакския Лермантовасул цIаралад бугеб къотIноб. Кьвагьул алат бухьун букIун буго аввтомобилалъул тIинда. Гьеб заманалда автомобилалъур рукIун руго гьединго лъукъарасул хъизанги ва гьесул гьитIинав васги, гьезие щибниги къварилъи ккун гьечIо.

Москваялда тIагIун вуго Дагъистналъул Хив мухъалъул Новофриг абураб росдал имам Кучев Фамиль. Гьесул гIагарлъиялъ бицухъе Фамилилгун гьезул бухьен къотIун буго апрелалъул ункъабилеб къоялъго. Гьеб къоялъ Фамиль аэропланалда воржине кколев вукIун вуго Мисриялде.

Фамилил гIагарав чи ГIабдулаца информ алатазе бицухъе гьес ахIичIеб бакI тун гьечIо: Москваялда ругел азарханаязде, хварал чагIи рачунеб бакIазде, гьединго тIагIун вукIин лъараб къоялъ рокъоса къватIиве вахъаралдаса гьев анщинаб бакIалъул маршруталда рекъонги цIех-рех гьабун буго гьез, амма хIасил ккун гьечIо.
XS
SM
MD
LG