МагъчIваялъе рес

Москваялъ чIезе тана Дагъистаналъе биччалеб гIарац


РукIа-рахъиналъул магIишаталъе харж гьабизелъун Дагъистаналъул муниципалиял гIуцIабазе кьолеб гIарац Москваялъ чIезе тун буго.

Гьеб цIидасан кьезе байбихьизе буго ункъо моцIидасан. Гьеб заманалда жаниб муниципалиял гIуцIабазул нухмалъулез тIагIинаризе ккола документазда ругел гIунгутIаби. Бабаюрт, Хъумторхъала, Гъизляр, Дахадаев мухъазул муниципалиял гIуцIабазда бараб жо бугин гьенибин абуна Эркенлъи Радиоялъе Дагъистаналъул рукIа-рахъиналъулгун коммуналияб магIишаталъул министерлъиялда.

Мисалалъе босани, Дагъистаналъул буголъиялъул министерлъиялъулгунги "Дагестангазсервис" абулеб гIуцIиялъулгунги цереккун гьарурал къотIи-къаял цIигьаризе кколел рукIун руго гьел мухъазул нухмалъулез. Гьел мухъазде газ бачиналда хурхарал къотIи-къаял рагIула гьел.

Амма документазда ругел гIунгутIаби гурелги, Москваялдасан гIарац биччангутIиялъе гIилла бюджеталъул гIарац пасат гьабиги бугин бицана ЭР-ялъе ХIабиб Давудовас. Гьев ккола рукIа-рахъиналъулгун коммуналияб магIишаталъул министерлъиялъул пресс-централъул вакил.

ХIабиб Давудов: "Добасан битIун бачIараб гIарац мекъи хIалтIизабун, жиндир болжалалда хIисаб кьечIого, ункъо моцIалъ чIезабун буго Москваялъ гIарац гьанибе битIи. Гьединго жанисел ишазул министерлъиялъул сайталда букIана хъван рукIа-рахъиналъул магIишаталъе биччараб гIарац бикъун бугилан. Амма бикъичIилан чIун руго хIакимзаби.

Гьезул иш диваналдаса гIебеде буго. Жеги лъугIараб жо гьечIо. Республикаялдаги Россиялдаги рагIараб ахIи-хIур букIана гьелда сверун".

Цо-цо баяназда рекъон, бицен гьабулеб суалалда бараб буго гьеб министерлъиялъул нухмалъиялда ккарал хиса-басиялги. Гьедин Дагъистаналъе нухмалъи гьабизе Москваялдасан витIун вачIарав Рамазан ГIабдулатIиповас гьенив нухмалъуда тана Сейфулагь ИсхIакъов. Цеве гьев вукIана Халкъияб Мажлисалъул спикер хисулевлъун.

Бюджеталъул гIарцуе пасалъи гьабун, яги документазда гIунгутIаби ратун, Москваялдасан бачIунеб гIарац гьедин чIезе теялъул хIужаби цереги чанги ккана. Масала, гъоркьисала июль моцIалда хъван букIана Дагъистаналъул прокуратураялде гьединабго магIнаялъул гIарза.

Рукьналъанго къачIазе яги риххизарун цIиял разе кколел минаби Дагъистаналда. Гьбе мурадалъе гIоло 2008-2012 соназда Москваялдасан республикаялъе биччан букIана щуго млрд гъурущ. Хадуб тIаде цоги млрд гъурущги биччана. Аслияб куцалда гьеб харж гьабизе кколеб буго гIемертIалаял минаби къачIазе.
XS
SM
MD
LG