МагъчIваялъе рес

Москваялда унеб буго коммунистазул съезд


Геннадий Зюганов

Россиялъул комунист партиялъул лидер Геннадий Зюгановас Москваялда шамат къоялда тIобитIараб партиялъул 15 съездалда какана улкаялъул нухмалъи улка цIунизе тадбирал тIоритIулел гьечIилан. Съезд тIобитIун букIана Россиялда улка цIунулезул къолъун лъазабураб 23 февралалда.

Жакъаги 23 февраль гIемерисез рикIкIунеб буго бихьиназул къолъун. Россиялда гьеб байрам кIодо гьабизе бугин лъазабун буго 80% цIехрехалда гIахьаллъараз. Байрамги баркун бихьиназе сайигъатал кьезеги ракIалда буго киналго руччабазда.
Къоло лъабабилеб февралалда Москваялда тIоритIана чанго официалиял тадбиралги, мисалалъе «ЦIар лъаларев аскариясул» хабада тIугьдул лъуна официалиял тIадтараз, президент Владимир Путиница, Федерациялъул Шураялъул гIахьалчагIаз, депутатаз, рагъул гIахьалчагIазги. ТIоритIана байрам кIодо гьабун чанго рохалилал тадбиралги гьединго батIи батIиял акциялги.

Коммунистазул партиялъ (КПРФ) тIобитIана акция 2000 гIанасев чиги гIахьаллъарав. Москваялда Пушкинил майданалдаса бахъараб Театралъул майданалде щвезегIан хьвадулаго. Акциялда гIахьаллъараз ахIулел рукIана капитализмалде данде чIарал лозунгал.

Коммунистаз капитализмалде данде чIарал лозунгал церелъолел рукIана жидерго иргадулаб 15(юбилеялъулаб) съездалдаги.
Коммунистаз съезд байбихьана Москваялда 23 февралалда.

Геннадий Зюганов:«Гьале щугогIанасеб сон. Цолъарал Штатазул экономикияб кризисалъ сорозарулел руго Евросоюзалъулги цогидалги улкабазулги экономика. Россиялъул экономикаялде гьоркьобе хIал гьабун жубазабун бугеб».

Коммунистазул партиялъул лидерасул съездалса калам гIатIидго тIибитIизабулеб буго информациялъул алатаз.
Коммунистазул лидер Геннадий Зюгановас жиндирго каламалда гьединго гIайиб гIунтIизабулеб букIана Россиялъул тIадтараз тIобитIулеб политикияб курсалдеги.

Коммунистаз цебе лъолеб буго жидерго программа, улка политикиябгун социалияб кризисалдаса борчIизабизе кIолеб. Геннадий Зюгановас абулеб буго политикияб системаги демократияблъун гьабизе кколин, парламенталъе гIатIидал ресалги кьезе кколин, пачалихъиял тIадтаразул аппаратги лъедер гьабизе кколин, экономикиял суалалзулъ пачалихъалъул гIахьаллъиги цIикIкIинабизе кколин.

Съездалъул хIалтIи халат бахъине буго 2 къоялъ.
Съездалда коммунистаз тIаса вищизе вуго цIияв лидерги.
Экспертаз абулеб бугохъин Геннадий Зюганов хутIизе буго жиндирго хъулухъалда.
XS
SM
MD
LG