24 абилеб сентябрялъ Шималияб Кавказалъул федералияб округалъул бетIер Сергей Меликов Дагъистаналде вачIиналда хурхун, МахIачхъалаялда къан рукIана аслиял къватIал. ГIемер заманалъ нухазда рагъаричIого хутIун рукIана автомобилал.
Амма цо нухда чIун хутIарал гIечIого, нухдаса унел кортежалъул машинаялдаса къватIиреги раккун, охранаялъул гIадамаз дагьабниги аскIорегIан ругел автомобилазул матIаби гъуранин лъазабулеб буго автомобилистаз.
Гьедин, цо моцIалъ цебе, цогидазулго гIадин, сиренабиги кьолаго нахъасан бачIунеб кортежалъе нухги кьун чIун букIанин жиндир машина цогидазулго гIадин, кортежалъул читIиралъул ахирисеб джипалдаса къватIивеги ваккун тIил хьвагIулев чи вихьидал жинца дагьабги рагIалдегIан къазабунин машина, амма цогидаб машинаялъул матIу беканин гьев чиясин бицана МухIамадов Къасумица «Эркенлъи» радиоялъе.
МухIамадов Къасум: «Нухда инеев вукIуна дурго нузда, нахъасан баккун бачIуна кортедж сигналалги гьарулаго, кIвараб куцалъ нух кьун рагIалде къаниги кьабун дубинкабигун рекула матIаби . Дирги гьединго ккана, амма дир машинаялда щвечIо, дица машина сверизабун дагьаб, амма дида хадуб букIаралъул бекана матIу. Посталде гIарз бахъана полициялъулазде , ункъоял рукIана гIарз бахъун, амма щиб гъоз гьабилеб? Гьел посталда ругезги релъун тIаса рихьизаруна гIадамал».
ХIакимасул кIиго джип бугонани гьеб кортежги кколеб бугин, цинги нухда бокьараб гьабулеб бугин гьезилан рикIкIунеб буго МухIамадовас.
Дагъистаналда цIияб бижараб гIадат гурин кортежазул машинабаз цогиял, нухдаса унел автомобилазе зарал гьабийилан абулеб буго ЭкспертазГьедин, Каспийскалде унев нухда ГIумаров АсхIабил машинаялда хадур гъун буго кортеж гIедегIун унев цо хIакимасул, нух кьун рагIалде къаниги, цо машинаялдаса къватIиве ваккарас матIаби гъурун руго гьесул, гьединго матIаби гъурун руго цогидал машинабазулги нухда рукIарал.
Гьебго тайпаялъул лъугьа-бахъин ккун букIун буго Шихсаидовасул кортеж ХIажи МахIачев хведал гьевги вукъун тIад вуссунаго Ростов-Баку федералияб нухалъул Гоксерное абураб кьода аскIоб тойота камри машинаялъул цебесеб цIер бекун, цогидаб гьединго матIу бекун ва тункизабун, кIиябго машина бачунезе жидеегоги ккун буго зарал ва гьединго автомобилалги къачIазе ккун руго. Гьеб лъугьа-бахъиналда тIасан гIарза диваналде кьуниги щибго хIасил ккун гьечIо, «Эркенлъи» радиоялъухъе щварал мухIканал гурел баяназда рекъон, цояб машинаялъул бетIергьан хIинкъизавун гIарза нахъе босизе гьабун буго.
ХIакимчагIи, федералиялги бакIалъулалги, цIуниялъул ругин хасал роцаби, амма гьел цонигиязулги роценазда рекъон шагьаралъул аслиял къватIал къайги гIадамазе зарал гьабиги батуларин рикIкIунеб буго юрист Къадиев расулица. Нухазда кортежаз гьабулеб балагь базарги гIадамаз гьел диваналде ахIун, хIинкъичIого жаваб кьураб мехалъ гурого лъугIуларин баян гьабуна юристас. Гьесул рагIабазда рекъон, Къурбанов Гарун чIван хадуб байбихьун буго гIумруялъе хIинкъи гьечIого букIиналлъе хIакимзаби цIуниялъе бюджеталъул гIарац хвезабизе, амма гьенибги гIорхъи рахъ гьечIин рикIкIунеб буго Къадиевас.
Къадиев Расул: « ТIоцебесеб судалдаса хадуб лъугIизе буго гьеб жо. Цо иш букIана ккун дида лъалеб, адвокат ТIагьирова Джамилал машинаялъул матIу бекун букIана Жанисел ишазул министрасул охранаялъ. Гьелъ гьел судалде кьуна, амма гьез гьелъие машина къачIай бецIана. Дипломатияб нухалда тIубана гьеб иш. МухIамадсаламил заманаялъ букIинчIо гьединаб жо. Дир щаклъи ккола Меликов цIунулезул нухал къазе хиял букIиналда. Гьединал ишал нухда ккечIого рукIине гIадамаз руцIун чIечIого лъазабизе ккола . Нагагь зарал ккун бугони диваналдеги ахIизе ккола. Гьеб мехалъ гурого лъугIуларо гьез гьабулеб балагь-базар».
