МагъчIваялъе рес

Россиялъул рагъулаб авиациялъ кьабиял щвезарулел руго исламистазул позициязда Сириялда


АрбагI къоялда Россиялъул Федерациялъул Мажлисалъ президент Владимир Путиние изну кьуна Сириялда Россиялъул рагъул къуватал хIалтIизаризе. Гьединаб гьаригун Россиялъул президентасде хитIаб гьабун букIанин Сириялъул президент Башар Асадицайин, лъазабуна журналистазда президентасул администрациялъул бетIер Сергей Ивановас.

АрбагI къоялдаго Россиялъул улка цIуниялъул министерлъиялъ лъазабуна, Россиялъул авиациялъ байбихьанин гьукъараб «Исламияб пачалихъ» абураб радикалиял исламистазул гIуцIиялъул позициязда кьабиял щвезаризейин.

Франс-Пресс агентлъиялъ Сириялъул вакильзабазда базабун лъазабулеб буго Россиялъул къуватаз гьаваялдаса кьабиял щвезарулел ругин Хама, Хомс ва Латакия шагьаразда аскIореххун ругел позицияздайин.

CNN телеканалалъе Цолъарал Штатазул кIудияб даражаялъул пачалихъияв хъулухъчиясда базабун лъазабуна, Москваялъ Вашингтоналда гьарун букIанин, Америкаялъул рагъулал аэропланазул хIалтIи Сириялда лъалхъизабийин. Амма гьелъ лъазабун букIинчIин кир гьел авиакьабиял щвезаризе ругелалиян.

Цолъарал Штатазул жиндир цIар рехсечIев вакилас Reuters агентлъиялъе комментариял гьарулаго, жиндирго щаклъи загьир гьабун буго Россиялъул авиациялъ гIицIго «Исламияб пачалихъ» гIуцIиялъул позициязда кьабиял щвезарулел рукIиналда. Гьеб щаклъиялда гъоркь унгоги кьучI батанийин, Сириялда терроризмалде данде Цолъарал Штатазда цадахъ лъугьун къеркьеялъул перспектива захIматаб букIине бегьулин, жубан буго гьес.

Цолъарал Штатазул хасал хъулухъазул информациялда рекъон, пилотал гьечIого роржунел Россиялъул аппаратал чанго къоялъ роржунел рукIана Сириялъул территориялда, гьез баянлъизарулел рукIана потенциалиял ишанал.

АрбагI къоялда Дамскалъ тасдикъ гьабуна, президент Башар Асадица Россиялъул президент Владимир Путинидаса кумек гьарун букIин. Гьелъул хIакъалъулъ лъазабиял раккана Федерациялъул Мажлисалъ жиндирго хIукму гьабун хадубго.

Россиялъул президентасул администрациялъул бетIер Сергей Ивановас хадуб мухIканлъизабуна, гьеб хIукму хурхараб бугин, гIицIго гьаваялдаса кьабиял щвезариялдайин ва Сириялда ракьдатIасаб къуват хIалтIизабиялъул бицен гьабулеб гьечIин.

Эркенлъи радиоялъе комментариял гьарурав рагъулав аналитик Александр Гольцица абулеб буго, Федерациялъул Мажлисалъ гIорхъаби чIезарун гьечIониги, Россиялъул тIалъиялъе жакъасеб ахIвал-хIалалда жиндиегоги данде ккезе гьечIин гьеб ракьдатIасаб операция Сириялда тIобитIизейин.

Александр Гольц: «Дида гIемер рагIана Совет Союзалъулги Россиялъулги лидеразул каламал гьединал операциязда цере. Амма дида тIоцебе бихьулеб буго рагъулаб операция лидерасул гьединаб каламалда цебе хIадур гьабун букIин. Дида бичIчIунеб буго, Сириялда Россиялъул къуватал щвезариялъул мурад. Тактикияб даража босани, гьеб ккола Цолъарал Штатазул президент Барак Обамагун гара-чIвари тIобитIи букIараблъи. Стратегияб даражаялда гьелъул мурад букIине бегьула Украиналъул конфликталъе гIоло ккараб халкъаздагьоркьосеб изоляциялдаса Россия борчIи яги гьелдаса борчIун букIин гIадаб хIал гьаби».

Гольцица абулеб буго, жиндир кIудияб хьул бугин щиб кканиги, Россиялъул талъиялъе гIаклъу гIезе бугин гьениб ракьдатIасаб операциялда гIахьаллъичIого чIеялъейин.

Александр Гольц: «Баянаб жо ккола, ракьдатIасаб операция гьабиялъе Россиялъе гIемер сурсатал къваригIунеблъи, бицен гьабизе букIана аза-азар рагъулазул ва техникаялъул. Гьединал сурсатал гьенир рукIанинги, Россиялъе гьениб икъбал щвезе букIинчIеблъиги баянаб жо ккола. Дир кIудияб хьул руго, Россиялъул талъиялъе гьединал галаби гьаричIого чIеялъе гIакълуги, цодорлъиги гIезе букIиналъул.

Дида ккола, Россиялъ Цолъарал Штатаз нухмалъи гьабулеб рагъулаб коалициялде гъорлъе унел улкабазго гIадаб нух бищизе бугин ва рихьдае авиакьабиялги щвезарун чIезе бугин. Гьелъие гьенир сурсаталдги руго, 30 гIанаб аэроплан буго, аслияб къагIидаялда штурмовикалги бомбардировщикалги, ай, гьеб ккола дурусго гьединал авиакьабиял гьариялъе гIолеб техникаги ярагъги».

Россиялъул рагъулазул контингент гьедингоги букIана Сириялда. Сундеха Федерациялъул Мажлисалъ официалияб изну загьир гьабураб, абураб суалалъе гьадинаб жаваб кьуна Гольцица.

Александр Гольц: «Аэропланал доре щвезари, техника ва ярагъ добе битIи, гьелдаго цадахъ, ккимулаго жидер доба щибниги гьечIин абула рукIин цо жо ккола. Амма цогидаб жо ккола хIакъал авиакьабиял щвезарулел ругони. Гьеб ккола битIахъеб асар гьаби. Гьанже гьарулел галаби документалияб, официалияб къагIидаялда гьарулел рукIин бихьизабизе бокьун батила Россиялъе. Амма цогидаб жо ккола, дуца улкаялъул территориялде жанивеги лъугьун, рагъулаб операция тIобитIулеб бугони. Гьеб мехалда кинаб гIаги гарантия гьечIо байбихьараб къагIидаялдаго цинтIаго гьеб рагIалде бахъине букIиналъул. Вьетнамалде жиндирго интрукторалги ярагъгун техникаги ритIарав Джон Кеннедидаги ккун букIун батиларо гьединаб бидулаб къагIидаялда гьеб асар лъугIине бугин».

Гьанже интернеталда лъун буго гIемер видео. Гьенир комментариял тараз абулеб буго, Россиялъул авиациялъул кьабиязул хIасилалда гIемер гIадатиял гIадамал холел ругин.

XS
SM
MD
LG