Фильм бусурбабазул хьвада-чIвадиялда данде кколареб букIиналда хурхун гьеб бихьизабизе гьечIо Ингушетиялда, Чачаналъ ва Дагъистаналда. Дагъистаналда кино бихьизе тунгутIиялъе аслияб хIалтIи гьабуна ГIолилазул ишазул министерлъиялъул жигарчагIаз. Кинотеатразул бетIергьабазда кIалъан, социалиял гьиназдаса гьеб киноялъухъ балагьиялдаса инкар гьабиялде ахIун. Гьеб кино киналгIаги дагъистаниязул гурелги тIолго яхI-намус бугеб, лъикIлъи-квешлъиялъул бичIчIи бугев чиясул бербалагьиялде данде кколареб бугин ва гьеб бихьизабиялдаса инкар гьабиги кколин гIадат-гIамал цIунийин баян гьабулеб буго жигарчагIаз.
«Пятьдесят оттенков серого» абураб кино кколеб буго гьеб цIаралда бугеб тIохьол сюжеталдасан бахъараб. Гьеб тIехь Дагъистаналъул тIахьал ричулеб бакIаздаса нахъе бахъиялде лъицаго ахIулел гьечIо. Жинца тIехь цIалун букIинчIин, киноялъухъ балагьизеги къасдго букIинчIин, амма жидедаго бихьичIеб жо какун гIадамазде ахIи баялъ кIвар кьезе гьабулеб бугила гIадамазул гьелдейин баян гьабулеб буго блоггер Айдимир Дагановас.
Айдемир Дагъанов: « Гьеб кино бихьизе лъида гьукъулеб бугеб, цо чиясдайищ, яги тIолго жамагIаталдайищ? ТIолго жамгIияталъе батанани, гьеб чанго къоялдасан кIочон тезе буго. ГIадан восун хIисаб гьабунани – гьелъухъ балагьизе бокьаралги, ракIалдацин букIинчIелги ралагьизе руго гьелъухъ. Гьелде кIвар буссинабиндал. ХIикматаб халкъ буго Дагъистаналда, дагьаб цебегIан Варламов вачIун, гьес нилъер шагьар какидал, киназго я рахъ ккун, яги гьесде данде чIун хъвалеб букIана, гьабсагIат гьеб киназдаго кIочон тана. Берда цебе бугеб хIехь бихьичIого рикIкIада бугеб сумалъул бицунеб буго. Шагьар бацIцIад гьабизе рахъа жидерго мисал бихьизабун, расги пайда гьечIеб жоялъул бицун, ахIи багъаризабичIого».
Гьеб киноялда данде рахъунез байрахъ гIадин кколеб бугин диналда данде гьеб ккунгутIи Амма хIакъикъаталдаги, иргадулаб нухалъ дин хIалтIизабулеб бугила гIадамаз жидеего цIаруейилан баян гьабуна « Эркенлъи» радиоялъе жиндир цIар абизе бокьичIев цогидав блоггерас.
Жакъа шагьаралда ругел кинотеатразул кассаязда чIван руго лъазариял гьеб кино бихьизабизе гьечIилан. Жалго кинотеатразда ругел гIадамаз аслияб куцалъ бичIчIунгутIи загьир гьабулеб буго, щай гьеб хIалалъ гьеб киноялъул бицине лъугьаралали, гьелдаса цебеги чанго букIанила дагьабги гIемер чороклъи гъорлъ бугеб фильмал. Аслияб куцалъ киналго цIех-рех гьабураз абулеб буго Чачан респуликаялда гьукъидал цо-цо гьезда нахърилълъараз багъаризабураб жо бугин гьеб ахIи-хIур.
Гьеб киноялъухъ гIадамал балагьизе хIакъикъаталдаги бокьун букIун батичIони, гьеб ахIи багъаризабизе кколароанила. Гьеб кино бихьичIел ва тIехь цIаличел чагIаз гьеб какиялъул магIна бичIчIулеб гьечIилан баян гьабулеб буго МахIачхъалаялдаса Дианаца. Гьеб тайпаялъул кIвар гуреб жоялда сверун ахIи бахъинаби бугила цо-цо дагъистаниязе хасиятаб гIадаллъи, баагьизе бокьичIел, гьадинги гьелъухъ ралагьизе инароанила,бокьарал гьадинго цо анкьидасан гьелъухъ ралагьилила бицана Дианал гьалмагъ Марьямица.
Кино къватIибе бачIиналде цебего тIолго дуняллалда гIемер бахIсал рукIана гьелда хурхун, гьедин цо-цо улкабазда гьеб тIубан гьукъун буго, масала Малазийалда ругел гIадамазда гьеб бихьизе гьечIо. Цогидал улкабазда киноялъухъ балагьизе рихьизарун руго саназул гIорхъаби. Россиялда гьелъухъ ралагьизе хъвараб бакIалдарбихьизабун буго 18 соналдаса тIадехун ригь бугел гIадамал.
