«Шамилхъалаялъул секторин» «рохьилаз» абулеб мухъалъул амирлъун рикIкIунев вукIарав Сиражудин ГучучгIалиевасе диван гьабулеб буго Ставрополь икълималъул тIадегIанаб диванханаялда. ГучучгIалиевасда чанги гIайиб чIвалеб буго: «рохьилазул» къукъа гIуцIи, полициялъул хIалтIухъаби чIвай, диванчи чIвай ва цогидал вахIшиял такъсирал.
Ставрополь икъималъул диванханаялде ГучучгIалиевасда хурхун гьабураб цIех-рехалъул материалал араб соналъул декабралда щун рукIана. Амма диваналъул данделъи рагьизе кIолеб букIинчIо ва гIиллалъун гьелъие букIана ГучучгIалиевасул адвокатасул унти.
ИчIабилеб февралалда тIоцебесеб данделъи тIобитIана ва диванчияс байбихьудаго гIайиб гIунтIизабиялъул документ цIалана. Гьелда рекъон, 2011 ва 2012 соназда ГучугIалиевас гIахьаллъи гьабуна «Шамильхъалаялъул секторалъул» тадбиразда. Гьеб «сектор» низам цIунулез рикIкIуна «Вилаят Дагъистан» абураб «рохьилазул» гIуцIиялде гъорлъе унеблъун.
2012 соналъул маялда къуваталъул идарабазул хIалтIухъабаз хасаб операциялда чIвана «секторалъул» церехъаби – ХIусен Мамаев ва Эльдос Зулпукъаров. Маялдаса хадуб къукъаялъе нухмалъи гьабулеб букIана букIана ГучучгIалиевас. ЦIех-рехалъул материалазда рекъон, Зулпукъаровгун ва Мамаевгун цадахъ лъугьун ГучучгIалиевас чанги вахшIияб такъсир гьабуна. Мисалалъе, полициялъул хIалтIухъабазул автомобиль кьвагьизабуна гьез. Полициялъул кIиго хIалтIухъан чIвана ва лъабгояв лъукъана. Гьеб такъсиралда гIадатIиял чагIиги хвана.
Гьединго ГучучгIалиевас хIалбихьун букIана Дагъистаналъул УФСИналъул нухмалъулев Муслим Даххаев чIвазе. Даххаев батIаго лъукъичIо, амма квешаб хIалалде ккана гьесул шофер МахIач МахIмудов.
ГучучгIалиевасул бищун «машгьураб» такъсирлъун рикIкIунаан диванчи чIвай. Дагъистаналъул тIадегIанаб диванханаялъул диванчи МухIамад МухIамадов чIвана 2013 соналъул январалда. Гьев лъалаан изну гьечIого яргъид гIуцIаразда гъорлъ рукIаразул ишал хал гьабулев диванчи гIадин. Низам цIунулез рикIкIунеб буго гьеб такъсир ГучучгIалиевас гьабунин.
Къануналда рекъечIого ярагъ тIибитIизаби, автомобилал рикъи, бизнесменазухъе флешкаби ритIи – ГучучгIалиевасда чанги гIайб гIунтIизабулеб буго цIех-рехалъ.
Низам цIунулез гьев ккуна 2013 соналъул маялда. Ленинкент росулъ тIобитIараб хасаб операциялда ГучучгIалиевасе тIуризе кIвечIо ва полициялъулаз лъукъарав гьев ккуна. Гьесда хъинтIун рагьарал цIех-рехалъул материалал Дагъистаналъул тIадегIанаб диванханаялде араб соналъул августалда щвана. Амма ахир-къад, соналъул ахиралда гьеб иш битIана Ставрополь икълималде. ДиванчагIазул баяназда рекъон, Дагъистаналда диван гьабун букIарабани, процессалда гIахьаллъулезеги, нугIзазеги хIинкъигьечIолъи чIезабизе захIмалъизе букIана. Ставрополалъул диванханаялда диван байбихьиледаго лъазабуна процесс къараблъун букIине бугин. Диван гьабулеб залалде прокуроралгун адвокатал гурел цогидал риччазе гьечIин абураб жо буго гьеб.
Диваналъул тIоцебесеб данделъиялда ГучучгIалиевасул адвокатаз абуна жал рази гьечIин гIунтIизабулеб гIайибаздаса ва позиция жидеца тIатинабилин гIагараб заманалда рукIине ругел данделъияздаян. Гьединго адвокатаз диванчиясухъе гIарза кьуна. Гьелда рекъон, адвокатаз гьарулеб буго диваналъул процесс цогидаб къоялда гьабизе. Гьез бичIчIизабуна жидерго гIарза ГучучгIалиевасул хIал лъикIаб гьечIолъиялъ. Хасаб операциялда ГучучгIалиевасул квералде гулла щвана ва гьелъие операция гьабун букIана. Гьеб квер операциялдаса хадуб унтулеб бугин гьесулин, абуна адвокатаз.
Диванчияс гIарза прокурорасухъе кьуна ва абуна гьелъие жаваб хIадур гьабеян. Диваналъул иргадулаб данделъи гьаб анкьалда тIобитIизе бугин, лъазабуна диванчияс, амма кинаб къоялда гьеб букIине бугебян мухIкан гьабичIо. Прокурорасул жаваб бачIун хадуб тIубазе буго гьеб суал.
Гьанибго тIаде жубала, ГучучгIалиевасул эмен МухIамад Дагъистаналда цIар тIибитIарав адвокатлъун вукIана. 2013 соналъул июлалда гьев Семендералда чIвана. ЦIех-рехалъул баяназда рекъон, гьев чIван ватизе бегьула «рохьилаз». Гьелдалъун гьез ГучучгIалиевасухъе «ругьел» битIана жидер хIакъалъулъ информация тIатинабугеян, бичIчIизабуна цех-рехчагIаз жидерго версия.
Гьединго ракIалде щвезабила, чанги информалатаз лъазабун букIана, МахIачхъалаялъул мэр Саид Амиров низам цIунулез ккунин ГучучгIалиевас гьесда тIаса баянал кьун хадубян. ГучучгIалиевасул адвокат Константин Мудуновасни гьел лъазабиял гьересиял ругин абуна ва тIаде жубана Амировгун киналгIаги бухьенал рукIинчIин ГучучгIалиевасул. Живго Мудуновасни Амировасул ишалдаги гIахьаллъи гьабунин абизе бегьула. Мудунов МухIамад ГIабдулхIалимовасул адвокатлъун вукIана. «Колхозник» тIокIцIар бугев ГIабдулхIалимов Амировасда хурхун рагьараб ишалда цIех-рехалъул аслияв нугIлъун вукIана. Ахир-къад, Колхозникас адвокатаздаса инкар гьабуна.
Мудуновас абухъе, ГучучгIалиевасул Амировгун бухьенал рукIанин харбал тIиритIизаруна ГучугIалиевасе кьурал гIакъубабазул хIакъалъулъ информация нахъе ккезабиялъе гIоло.
Константин Мудунов: «ГучучгIалиев ккуна 31 маялда, нахъисеб къоялда ккуна Саид Амиров. Низам цIунулез жидецаго абулеб буго ГучучгIалиев ккураб мехалда гьев лъавудаса ун вукIанин ва МВДялъул азарханаялде щвезавунин. Нахъисеб къоялда кколев вуго Амиров. БичIчIулеб гьечIо, кида ГучучгIалиевас Амировасда тIаса баянал кьурал. Амиров гьеб ишалде ургъунго ккезавуна, щайгурелъул ГучугIалиевасе кьолел рукIарал гIакъубабазул бицунеб букIана адвокатаз. Амма журналистазе Амировасул интерес букIана доб мехалда ва ГучучгIалиевасе гIакъубаби кьолел ругин абураб информация гьезие интересаблъун батичIо. ГучучгIалиев тIамулев вукIана гьаричIел такъсирал тIаде росине. Гьесул эменги чIвана ургъунго. ГучгIалиевасда гьедин бичIчIизабулеб букIана гьев мукIурлъизе кколин гьаричIел такъсиразеги».
Диваналъул процессалда тIаса Мудуновас баянал кьечIо. Гьес абуна жеги бичIчIулеб гьечIин, кин диван ине бугебали ва баянал кьезе жеги заман бугин.
