Россиялъул премьер-министр Дмитрий Медведевас «Euronews» телеканалалъе интервью кьолаго абуна Сириялда ракьул рагъулаб операция байбихьани, гьелдалъун халатаб рагъ багъаризе бегьулин.
«Москваялъ Башар Асадие квербакъи нахъеги гьабизе бугищилан?» - абураб мухбирасул суалалъе жаваб кьолаго Медведевас абуна, Россиялъ хасго гьесие кумек гьабулеб гьечIин, Россиялъ Сириялъулгун гьудуллъиялъул гьоркьобакI цIунулеб бугин.
Ва гьадинаб гьоркьоблъи бижанин Башар Асад президентасул хъулухъалде вачIинегIан.
Мюнхеналда букIараб халкъаздагьоркьосеб конференциялда Дмитрий Медведевас абуна НАТО-ялъулгун Россиялъул гьанжесел бухьенал цIияб цIорораб рагъул байбихьиялда релъарал ругин.