Украиналъул машрикъалъул рахъалда Россиялъул журналистал хвеялде гIайиб жинде гIунтIизабурай Украиналъул пилот Надежда Савченкоца Россиялъул омбудсмен Элла Памфиловалде хитIаб гьабун, лъазабуна Москваялъул цIех-рехалъул анлъабилеб изоляторалда ругел руччабазул захIматаб ахIвал-хIалалъул хIакъалъулъ.
Гьелъул хIакъалъулъ «Твиттералда» хъван буго Савченкол адвокат Николай Полозовас.
Гьесул рагIабазда, гьей цIунулезул лъай-хъвай гьабун буго Савченкол ишалда хурхун тIобитIизе ракIалда бугеб экпертизаялда хурхараб кIиго хIукмуялъулгун.
Гьеб кколеб рагIула гьелъул телефоналъул ва «киналиго хъвай-хъвагIаязул экспертизаян» лъазабун буго адвокатас.