«Санкт-Петербургалъул солдатазул улбул» абураб инсанасул ихтиярал цIунулеб гIуцIиялъ ва «Информация цебетIеялъул институт» абураб фондалъ жидерго регистрация гьабизе кколеб буго «къватIисел улкабазул агентал» хIисабалда Россиялъул юстициялъул министерлъиялъул хIукумуялда рекъон. Гьелъул хIакъалъулъ лъазабулеб буго «Интерфакс» агентлъиялъ. «Санкт-Петербургалъул солдатазул улбузул» нухмалъи гьабулеб буго Инсанасул ихтиярал цIуниялда сверун президентасул мажлисалъул гIахьалчIужу Элла Поляковалъ. Гьелъ лъазабун букIана, Россиялъул нусгоялдасаги цIикIкIун рагъулав хванин Украиналъул машрикъалъул рахъалда унеб рагъдайин ва бищун дагь босун 300 чи лъукъанин. Панфиловалъ лъазабуна, жидер гIуцIи агентазул хасаб реестралде босиялда хурхун диваналде гIарза кьезе бугин.