МагъчIваялъе рес

Мажгитал къай- гъалатIаз гъалатIал ритIизари


МахIачхъалаялда пресс-конференция, 1Фев2016
МахIачхъалаялда пресс-конференция, 1Фев2016

Салафиязе тIадецуял гьарулел ругони гьелъ жамгIият радикализациялде цIазе рес бугин абураб пикру загьир гьабуна экспертаз итни къоялда букIараб пресс-конференциялда.

Салафиязул мажгитал къаялъ Дагъистаналда терроризмалде данде къеркьеялъе кумек гуреб, квекIен гьабулин лъазабуна тIоцебесеб февралалда мажгитал къаялъул суал гьoркьоб лъун тIобитIараб данделъиялда жамгIиял хIаракатчагIаз, экспертаз ва журналистаз. Данделъиялъул хIасилазда гIуцIун буго резолюция.

Гьеб данделъи тIобитIиялъе гIилла кканин цебехун, 31 январалда Хасавюрт шагьаралда салафиязул мажгит къайин бицана данделъи ахIарай жамгIияй хIаракатчIужу Ирина Стародубровскаялъ. Салафиялгун диалог кIалъаязул хIасилазда гурел, тIадецуялдалъун гьабулел бугони, гьелъ радикализациялде цIазе рес бугин жамгIиятин баян гьабуна экспертаз. Салафиязул мажгитал къаялъул бицунаго цо, цебехун Хасавюрталда къараб мажгиталде буссинабизе бегьуларин кIвар, гьеб тIоцебесеб мажгит гурин къалеб бугебин бицана 31 январалда Хасавюрталда къан букIараб «Северная» мажгиталъул вакил Нажмудин Нажмудиновас. Гьеб къаялъе гIиллалъу бачанин имам гьечIолъи, гьебго Хасавюрталда гIемер ругин имамал гьечIел гIисинал мажгитал, авалалъул мажгитал, амма къалел ругин гIицIго салафиязулин бицана гьес.

Иргадулаб, къазе рес бугеб мажгит бугин Гъизилюрт мухъалъул Комсомольское росдал мажгит, гьеб мажгиталъул имам Жанисел ишазул бутIаялде ахIун, тIадецуй гьабун бугин бицана Нажмудиновас. Живго Комсомольское росулъ бугеб мажгиталъул имам Рамазан МухIамадовас баян гьабуна мажгиталда Сириялде инчIого рукIине ва ракълилаб гIумруялде ахIулин.

Рамазан МухIамадов: «Нижер мажгит буго гьабсагIат къазе хIинкъи бугеб мажгит, чанго нухалъ хIинкъаби кьун, тIадецуй гьабулеб буго нижеде. Дида бичIчIулеб гьечIо, щай нижеде тIадецуй гьабулеб бугебали. Нижеца цогидал улкабазде инчIого чIеялде ахIула, Сириялда бугеб хIал ва гьеб кинабго гьанир ругел низам цIунулездаса лъикI лъала нижеда, гьенир цIалулел рукIаразда, дидаги, гьанир ругел РухIияб идараялъул вакилзабаздаги. Гьединлъидал, гьенире иналдаса кантIизарула нижеца гIадамал. Мажгитаз гьел гIолилал Сириялде иналдаса цIунелел руго. Мажгитал къаяз Сириялде унезул къадар цIикIкIине буго. Сириялда ккараб ва цогидал бакIазда ккараб гьаниб ккечIого букIин буго нижер мурад, низам цIунулелгун хIалтIиги цадахъаб букIине ккола нижер. Нилъер гьаниб батараб жо буго гъалатIаз гъалатIал ритIизари. Гьеб бичIчIизабизе бокьун буго».

Инсанасул ихтияразул рахъалъ Россиялъул Президентасда цебе бугеб мажлисалъул вакил Максим Шевченкоца кIвар буссинабуна жиндир заманаялъ, батIи-батIиял жамагIатазда гъорлъ гьоркьолъаби лъикIлъизариялъе кIудияб хIалтIи гьабунин Дагъистаналъул Муфтий АхIмад-ХIажи ГIабдуллаевас. ГьабсагIаталда, цо-цо идарабаз гьабулеб хIалтIуца гьеб кинабго биххизабулеб бугин.

Максим Шевченко: «Ихтиярал хвезариялъул ва тIадецуй гьабиялъул хIужабазул, дица гьарула гьанир ракIараразда, Элла Памфиловалъухъе ва Иисанасул ихтиярал цIунулеб мажлисалде, диваназде гIарзаби хъвайин, гьединго Россиялъул Президентасул цIаралдаги, щай гурелъул, гьабсагIаталда, чанго соназ, захIматаб заманалда батIи-батIиял жамагIатазда гъорлъ кIудияб хIалтIул хIасилалда чIезабураб рекъел хвезабулеб буго къувуталъул идарабаз гьединаб хIалтIи гьабиялъ. Гьез Дагъистаналъул муфтиясул ва РухIияб идараялъул авторитет хвезабулеб буго».

ДАГIШалда хурхун, Шевченкоца тIаде жубана, щибав чиясда гьев Сириялде ине рес бугев чи вугун щакдари релълъунин нацизмалъул режималда букIараб жоялда.

Гайдарил цIаралда бугеб институталъул вакил, жамгIияй хIаракатчIужу Ирина Стародубровскаялъ баян гьабуна, Котрова къватIалда мажгит къаялдаса бахъун хал гьабидал, бихьулин, гражданияб жамгIияталда жаниб ричIчIунгутIиял тIагIинариялъул механизмал гьечIолъи. Церехъаби ва идараялги рихьулел гьечIин, ахIвал-хIал хисизабун бажарулел.

Ирина Стародубровская: «Гьаниб абулеб буго, мажгитал къаялъе гIилла бугин гьениса гIадамал Сириялде ва ИГИЛалде ин. Ама мажгитал къаялъ иш лъикIаб рахъалде яги квешаб рахъалдейищин хисилебин абуни. гьеб квешаб рахъалде хисизе буго Гьел имамаз гуро гьел Сириялде иналде ахIулел.Имамал жанир тIамунин, гьел гIолилал гьусулел гIадамал кирего тIагIунарелъул. Амма мажгит къан букIаго, гьел кантIизаризе чагIи рукIине гьечIо».

Данделъиялъул хIасилалда ракIарараз бахъана резолюция, гьелда рекъон, мажгитал къай халатбахъунеб бугони, гIагараб жаманалда радикализация цIикIкIине рес жамгIияталда жаниб. Гьединго хIажат буго идара, яги церехъаби ричIчIунгутIиял ругеб заманалда ахIвал-хIал хисизабун бажарулел.

ТIоцебесеб февралалъул бакъанида, Хасавюрт шагьаралъул администрациялда салафиязул жамгIияталъул вакилзабазухъе тIадруссинарун руго къараб мажгиталъул кIулал. КIиабилеб февралалда, «Северная» мажгиталлде хьвадулез «Эркенлъи» радиоялъе баян гьабуна мажгит рагьун бугин. Хасавюрт шагьаралъул тIалъиялъ баян гьабухъе, мажгит рагьулаго чанго шартI лъун буго, гьезул цоялда рекъон, мажгиталда имам теялъул суал РухIияб идараялда ва шагьаралъул тIалъиялда данд бан тIубазе кколеб буго.

XS
SM
MD
LG