«ХIалтIуде велосипедалдаги рекIун» абураб тIолабго Россиялъул акция тIобитIизе буго 20 маялда. Тадбиралда гIахьаллъизе букIиналъул хIакъалъулъ лъазабуна гIемерисел регионаз. Москвагун цогидал чIахIиял шагьараз, республикабазул тахшагьараз, областазул центраз.
Буго гьеб сияхIалда Чачан республикаги. Амма гьечIо - Дагъистан. Велосипедалъул машгьурлъи цIикIкIинаби, хасго Дагъистаналъул тахшагьаралъул цIакъ кIвар кIудияб масъала кколин рикIкIунеб буго нижер редакциялъе комментариял гьарурал дагъистанияз.
Дагъистаналъул гIелмияб централъул МацIалъул, литератураялъул ва искусствоялъул институталъул директор МахIамад МахIамадовас жидерго централъул минаялда цебе жиндирго гIарцихъ бан буго велосипедал лъолел бакI. Гьесул рагIабазда, МахIачхъала гIадал таранспорт гIемераб шагьаразда велосипедазде руссинго ккола чиясул заманги сахлъиги цIуниялъе бугеб бищунго санагIатаб къагIида. Хасго шагьаралъул бутIруз транспорталъул проблемаби рагIалде бахъинабиялъе хIасил кьолеб кIвар буссинабулеб гьечIолъиялде балагьун.
МахIамадовас абулеб буго, тахшагьаралда транспорт хьвадиялъул проблема дагьалъги хIалуцинабунин транспорт гIемерлъиялъ гуребги, централдаса, ай, аслияб майданалдасаххун рукIарал жамгIияб транспорталъул маршрутал къаялъгийин. КIудияб проблемаялде буссун буго хехаб медикияб кумекалъул, цIа ссинабиялъул ва цогидаб хасаб экстреннияб транспорталъул хьвади.
Машгьурав адвокат ва блогер Расул Къадиев кколев вуго МахIачхъалаялда, абухъего, бищунго машгьурал «велосипедистазул» цояв. Гьесда лъалеб букIун гьечIо шамат къоялда рехсараб акция унеб букIин. Гьеб гьесие цIакъ ракIалъе гIолеб буго. Щиб гьесие ва МахIамадовасе ракIалъе гIолеб гьечIебали, нужеда лъазе буго гъоркь лъураб аудиофайлалъухъ гIенеккун хадуб.
