МахIачхъалаялъул школазе ва лъималазул ахазе кванил нигIматал чIезарулеб гIуцIиялъ нигIматал росизе лъазарурал аукционал тIоритIулел рукIун руго къанунияб гуреб хIалалда. Гьеб тIоцебесеб лъугьа-бахъин кколеб гьечIо, школазе кванил нигIматал чIезариялъулъ прокуратураялда къанун хвезабиялъул хIужаби ратулел.
Прокуратураялъ тIобитIараб хал гьабиялъул хIасилалда «МахIачхъалапродукт» абураб шагьаралъул школазе ва лъималазул ахазе кванил нигIматал чIезарулеб гIуцIиялда тIатинарун руго къанун хвезабиялъул хIужаби. Гьеб гIуцIиялъ нигIматал росизе лъазарурал аукционазул документал къанун хвезабун гIуцIун ратун руго. Гьединго гIилла гьечIогон аукционалда гIахьалъизе изну кьун гьечIо чанго нигIматал чIезарулеб гIуцIиялъе. Гьеб лъугьа-бахъиналда бан рагьун буго такъсир гьабиялъул иш, административияб къанун хвезабиялъул чанго хIужаялда рекъон.
Дагъистаналъул Прокуратураялъул вакил Татьяна Голубевалъ баян гьабухъе, школазе нигIматал чIезариялъулъ къанун хвезабиялъул хIужаби тIатинари къанагIатаб иш кколеб гьечIо. МухIканго чан гьединаб хIужа букIарабали абизе захIмалъулин баян гьабуна гьелъ «Эркенлъи» раиоялъе, амма чанго мухъалда ва шагьаралда административияб тамихIалде цIанила жавабиял идараби. Прокуратураялъ планалда рекъон тIоритIулел хал гьабиял гурелги рукIунила гIадамазул гIарзазда бан тIоритIулелги, гьаб соналда гьединал хал гьабиял цIикIкIунцин рукIанин лъазабуна гьелъ.
Школалда гIисинал классазул лъималазе квен кьезе байбихьаралдаса балеб буго ункъо сон, амма гьеб ункъго соналда жаниб цо лъимаде квание бихьизабураб гIарцул къадар, 12,3 гъурущ хисулебго гьечIо. Гьеб гIарцуде лъимаде кьолеб буго радал ва къаде квен. МахIачхъалаялъул №3 школалъул директор Жанна Селивановалъ баян гьабухъе Россиялъул Медикиял гIелмабазул академиялъ бихьизабураб нигIматазул сияхIалда кинго данде кколеб гьечIо лъималазе квание бихьизабураб гIарцул къадар. Араб соналъул лъагIалил ахирлда «МахIачхъалапродукт» абураб гIуцIигун гьабураб къотIиялда рекъон чIезарулел нигIматал цекьунги рукIанин цо параялъин бицана гьелъ «Эркенлъи» радиоялъе.
Жанна Селиванова: « ЦIияб соналда цебе, декабрь моцIалда тIобитIана аукцион, кванил нигIматал чIезариялъе. Гьелда рекъон, гьел чIезризе тIаде босараб гIуцIилъун ккана «МахIачхъалапродукт». Абизе кIоларо, кинабгIаги тIад рекъонгути букIунарин даражаялда, амма нигIматал мукъсанал руго. Лъималазе чIезабизе бихьараб къадар пихъалъу ва нигIматазул чIезабизе гIолеб гьечIо гьеб гIарац. Цо заманаялъ букIана гIуцIиялъ нигIматал рачIунарого, амма сентябрь моцIалдаса гьоркьоса къотIичIогон чIезарулел руго нигIматал».
Чанго соналъ цебе букIаралде данде ккун нигIматазул багьаби лъалеб куцалда рахун ругониги лъимаде квание бихьизабураб гIарцул къадар хисичIогон хутIизе буго 2016 соналдаги. ЦерегIан къояз, 2016 соналъул бюджет къабул гьабулагон Дагъистаналъул школлъмалазе квание бихьизабун буго г1ицIго 372 миллион гъурущ.
Кванил нигIматал чIезарулеб гIуцIиялъул рахъалъ гуреги хIармал гьарулел руго школазул тIалъиялъги. Улбул хIинкъулел руго рагьун бицине, жидер лъимал школазда цIализе кколилан абун, амма чанго мухъалъул школазда къойида жаниб кIиго нухалда кьезе бихьизабураб кванил бакIалда квен кьолеб буго цо ригьалъ. Гьебги гIемерисеб мехалда лъел чурпа, гьоркьоб гьан гьечIеб. Чай лъималазда бихьулебго гьечIо. Хунзахъ мухъалдаса Написатие бокьич1о росу рехсезе, лъимаца школалда кьолеб квен квинего кунарин бицана гьелъ.
Написат: «Школалда дир лъимеде кьола аслияб куцалда релъарал макаронал, нахцин гьоркьобе рехичIеб. БукIуна гьедино горохалъул ва рахьдал чурпа. Гьан гьезда бихьизего бихьуларо. Хасало лъим гьечIилан абун чайцин кьоларо гьезие. Чай бокьула лъималазе. Пихъ-мичIги гьезие щоларо».
Школалда лъималазе квен чIезабизе гIарац жалго улбузги бакIариаланин абулеб буго цо-цояз, амма гьелъие гуреб, школа цIуниялъе, цIигьариялъул хIалтIаби гьабиялъе ва чанго хIужаялъе бакIарулеб буго улбухъа гIарац школазул тIалъиялъ.
