ЦIияб Сулахъ росулъа ХIусен ГIабдулкъадировасе къуваталъул идарабазул хIалтIухъабаз гIакъуба кьолеб букIанин лъазабулеб буго адвокат Рустам Юнусовас. ГIабдулкъадиров низам цIунулез ккуна гьев гьоболлъухъ вугев мехалдаян бицана гьесул инсуца. «Полициялъул ункъго хIалтIухъан вукIун вуго гьенив. Гьез абун буго жидеца ХIусен кколев гьечIин, гьесие цIех-рех гьабизе бокьун бугин, щайгурелъул гьесда щибалиго жо лъазе бегьула цо такъсиралда тIаса», - ян абуна ГIабдулкъадир ГIабдулкъадировас.
Гьесул вас низам цIунулез МахIачхъалаялде вачун вуго. Гьевгун бухьен чIезабизе кIвечIел гIагарлъиялдаса чагIи гIарзагун полициялде ана. Гьениб гьезда лъана ГIабдулкъадиров низам цIунулез ккун вугевлъи ва заманалъулаб туснахъалде ай ИВСалде лъун вугеблъи. Гьесул ихтиярал цIунизе гIагарлъиялъ ккуна адвокат Юнусов.
Юнусовасул рагIабазда рекъон, ИВСалда гьев дандчIвана ГIабдулкъадировгун. «Гьес бицана жив ккурав къоялда, паспортги телефонги рахъун, полициялъ жив вачанин цо бакIалде. Гьеб щиб бакI букIарабали гьесда лъалеб гьечIо, полициялъул хIалтIухъабаз пакет ретIизабун буго гьесда. Гьеб бакIалда къуваталъулаз гьесул килщазде токалъул кварал рачун руго ва ток биччан буго. ГIакъуба кьун, низам цIунулез ГIабдулкъадиров тIамуна жинца гьабичIеб такъсиралъе мукIурлъизе. Изну гьечIого яргъид гIуцIаразе кумек гьабулевлъун жив вукIанин абизе тIамун вуго гьев», - илан бицана адвокат Юнусовас.
Адвокатас абулеб буго полициялъул хIалтIухъабаз ГIабдулкъадировасул гIагарлъиялде лъазабизе кколеб букIанин гьев ккун вукIин ва Киров мухъалъул диваналъул хIукмуялда рекъон ИВСалде лъун вукIин. «Амма полициялъулаз къануналъул цониги низамги цIуничIого жидеего бокьараб гьабуна. ГIакъубаги кьун гьез чи тIамуна гIайиб тIаде босизе», - ян абуна Юнусовас.
Гьес бицухъе, жакъа къоялда ГIабдулкъадиров МахIачхъалаялда бугеб цIех-рехалъулаб туснахъалда ай СИЗОялда вуго ва гьевгун дандчIвазе адвокатасе квал-квал лъицаниги гьабулеб гьечIо. ЦIех-рехалъул комитеталъул Дагъистаналда бугеб идараялде гIарза битIана Юнусовас ва, гьелда рекъон, гьес ГIабдулкъадировасе тIалаб гьабулеб буго кIиго экспертиза. «Психологиябгун психиатрикияб экспертизаги диваналъулабгун медикияб экспертизаги гьабизе ккола ГIабдулкъадировасе ва гьез бихьизабила гьесие гIакъуба кьун букIараблъи», - илан рикIкIунеб буго адвокатас.
ГIабдулкъадировасе гIакъуба кьурал полициялъулал жавабалде цIаян гIарзаги битIун буго Юнусовас цIех-рехалъул идараялде. Адвокатасул лъазабиязда тIаса МахIачхъалаялъул Киров мухъалъул жанисел ишазул бутIаялда баянал кьечIо. ЦIех-рехалъул идараялдани абуна гIарзадул хал гьабулеб бугин ва гьенил рехсарал хIужжаби уяллъун ратани, цIех-рех гьабизе бугин.
Низам цIунулезул хIалтIуда тIаса гIарзаби руго адвокат Сапият МухIамадовалъулги. Адвокаталъ бицухъе, гьелъ ихтиярал цIунулел Гамлет Кельбисов ва Рустам ХIабибов цIех-рех чагIаз рахчулел руго ва адвокатгун дандчIвазе риччалел гьечIо.
РакIалде щвезабила, цодагьалъ цебе «Эркенлъиялъ» лъазабухъе, низам цIунулез рикIкIунеб буго гьел кIиязго 20I0-леб соналда Москваялда бизнесмен ГIабдулмажид ХIасанов чIваялъулъ гIахьаллъи гьабунин. Гьезул гIагарлъиялдаса чагIаз абухъе, Дербенталда гьел кIиялго рикъана декабралда ва гьал къоязда гурони лъачIо гьезда хъинтIун такъсир гьабиялъул иш рагьун бугеблъи.
Я адвокаталда, я гIагарлъиялда лъалеб гьечIо кир ругел Кельбисовгун ХIабибов. ЦIех-рехчагIаз абулеб буго Владикавказалъул СИЗОялда ругин, хадуб абулеб буго Ессентукиялъул СИЗОялда ругин. Гьел кIигоязда хъинтIун диваналъул процессални унел руго Ессентукиялъул шагьаралъулаб диванханаялда. Гьел данделъиялги адвокатал ахIичIого унел рукIана.
Адвокат МухIамадовалъ гIарзаби ритIун рукIана цIех-рехчIагIазда тIаса ва 20-леб февралалда гьелъул гIарзабазда тIаса диван тIобитIине кколеб букIана. Гьеб процессалде Кельбисов ва ХIабибов рачIине кколел рукIана. Амма диваналъул данделъи букIинчIин, лъазабуна «Эркенлъиялъе» МухIамадовалъ.
Сапият МухIамадова: «Диван тIобитIулеб залалде дол кIигоял рачеян лъазабун букIана цIех-рехчиясда. Амма диваналде я гьел рачIинчIо, я цIех-рехчи вачIинчIо. ДиванчIужуялъ абуна цIех-рехчи Евгений Менджиевас телефоналдаса ахIанин жив унтулев вугин, тIадежоялъе Кельбисов ва ХIабибов диваналде щвезаризе рес гьечIин. Щайилан гьикъидал, жаваб щун буго киналалиго техникиял гIиллаби ругин. Гьелдалъун процесс 25 февралалде гьабизе бугин хIукму къотIана диванчIужуялъ. Амма 21-леб февралалда гьебго диванханаялда дол кIиязего СИЗОялде лъеялъул низам халатбахъинабизе ккола. Гьенире гьел рачIине руго гурищ ва гьенир адвокатги ячIине йигин абураб мехалда, цIех-рехчияс абун буго видеоконференцияги гьабун бачеян диван. Пуланаб процесс букIине бугилан, къануналда рекъон, гIайиб гIунтIизабулезда лъазабизе ккола. ДиванчIужуялда гьикъана, кире гьелъ лъазабиял ритIулелян. Гьелъ абуна жинца кирниги ритIуларин гьел, щайгурелъул цIех-рехчияс жинда бицичIин, кир ругелали гьел кIигоял».
ЦIех-рехчи Менджиевасухъе чанги нухалда ахIана «Эркенлъиялъул» мухбирас, амма гьес телефон босичIо. Гьев хIалтIулев цIех-рехалъул идараялда абуна Менджиев командировкаялда Москваялда вугин.
Гьеб идараялъул нухмалъулевгун гьал къоялда дандвчIван йиго адвокат МухIамадова. Гьес гьелъие рагIи кьун буго цIех-рехчиясул хIалтIул хал-шал гьабилин. Жий гIодое йиччазаизе абурал рагIаби дол рукIанинян абулеб буго МухIамадовалъ гьанже. Жинца адвокатлъи гьабулезул ихтиярал хвезарулел ругин хасаб гIарза битIана гьел Россиялда инсанасул ихтиярал цIунулеб аппаратлъул нухмалъулей Элла Памфиловалъухъе. Авдокаталъул хьул буго Москваялдаса кинабгIаги кумек щвелин.
