МагъчIваялъе рес

Имамзабазде босараб иградулаб ишан


Азарханаялда ругел ХъахIаб росулъа имамасул ралъадиги васги захIматаб хIалалда руго. Гьел кIиялго лъукъун рукIана 23 июналъул сардилъ гьезул рокъалде ай росдал имам МухIамад ГIалиевасул рукъалде тIадекIанцIи гьабураб мехалда. Гьеб мехалда чIван вукIана тIадекIанцIаразул цоявги. Имамасе зарал ккун букIинчIо. Щай гьанжеги ишаналде росун ругел имамзаби ва кинаб букIине кколеб гьезул цIуна-къай?

ГьатIан къоялъул сардилъ ХъахIаб росдал имамасул рокъоре тIаде кIанцIарал лъабгоязе гьев викъизе къваригIун вукIанин лъазабулеб буго къуваталъул идарабазул хIалтIухъабаз. Гьел тIаде кIанцIараздасан зарал ккун гьечIо МухIамад ГIалиевасе, амма гьесул 39 сон барай лъадиги 15 сон барав васги захIматал ругъналги щун азарханаялда рачун руго. Живго имамас, росуцоялгун цадахъ гьел чагIазде дандечIей гьабун буго, гьелъул хIасилалда такъсирчIагIазул цояв чIвана ва кIигояв тIурун ворчIана.

Къуватазул идарабаз кьурал баяназда рекъон чIварав кколев вуо 28 сон барав Генуса МухIамадхIабиб ГIабдуллаев. Цеве-цеве киданиги полициялде ккун вукIинчIин гьевилан лъазабулеб буго хасал идарабаз. ТIурун рорчIарал кIигоялги жидер баяназда рекъон генусел рукIине кколин лъазабулеб буго полициялъ.
ГьабсагIат Шамильхъалаялъул азарханаялда руго имамасул лъади ва вас. Гьезие букIине кколеб кумекги гьабулеб буго, хIата МахIачхъалаялдасацин тохтурзаби рачIун рукIун руго гьезие кумек гьабизе, амма гьедин гьабуниги гьаб сагIат цIакъ захIматаб хIалалда ругин гьелин лъазабулеб буго тохтурзабаз.
Исламиял цIех-рехалъул централъул нухмалъулев ва журналист Руслан Геревас рикIкIунеб буго диниял церехъаби цIунизе хасал къокъаби гIуцIиялъ лъикIлъиялде рачунарилан. Гьединго диниял хIаракатчагIазул ва тIолабго халкъалъул хIинкъигьечIолъи букIинаби пачалихъалъ тIаде босизе кколилан.

Руслан Герев: «Кинав вугониги динияв хIаракатчиясде тIадекIанцIи гьабун хадуб тIолабго Дагъистаналдаго хIинкъигьечIолъи букIинабиялъул суал борхула. Нилъер гьаниб жегиги диниял хIаракатчагIи цIунун гьечIо, гьеб буго кIварбугеб суал. Гьел цIуниялъе хасал къокъаби гIуцIиялъ ва гьезухъе жидехъего ярагъ кьеялъги лъикIлъиялде рачунаро. ГIелмиял цIех-рех гьабулел чагIазул баяназда рекъон пачалихъалъул ва диниял гьоркьолъаби щулалъичIого гьеб масъала тIубаларо. Пачалихъалъ чIезабизе ккола хIинкъигьечIолъи.
Гьединго Гереевасул пикруялда рекъон киналго хIинкъигьечIолъиялъул суалал къуваталъул идарабазде рехун течIого, халкъалъги кIвараб гIахьаллъи гьабизе кколеб буго гьеб суал роцIцIинабиялъе.

Руслан Гереев: «Жакъа кинабниги такъсириял ишал, радикалиял къокъабазул багъа-бачари, гьеб кинабго жо нилъеца къуваталъул идарабаздеги реххун тун нилъго нахъасан балагьун руго. Гьеб буго мекъаб иш. Гьединал тIадекIанцIиял гьарун хадуб щибаб нухалъ гьелъие къимат кьолеб, гьеб мекъаб иш бугин хъвараб щибго жо бихьуларо. Гьале гьаб нухалда динияв хIаракатчиясул тIубараб хъизаналъе зарал ккун буго. Гьел чагIи жалго хутIула жидерго къварилъигун. Гьезие гьабулеб гIарцулаб, яги психология кумек букIунаро. Хадуб-хадубги гьезул хIинкъигьечIолъи букIинабиялъе киналгIаги тадбирал гьарулел гьечIо.

Анкьидасан гьесул рокъоре долго чагIи рачIинарин абураб ракIчIей киб бугеб. Гьеб буго бищунго аслияб суал. ГьанжелъагIан гьалгощинал инсанасул ихтиярал цIунулел, жамгIиял идараби рукIаниги жеги диниял ва миллиял лъикIал гьоркьолъаби рукIинале ва гьел щулалъиялъе щибго хIалтIи гьабулеб гьечIо. Гьел цохIо нилъер республикаялъ тIубазе кколеб суал гурелъул, пачалихъалда хIинкъигьечIолъи букIинабиялъул суал президентасул хасаб бербалагьиялда гъоркь букIине ккола»

«Кавказский Узел» сайталъул баяназда рекъон исана Дагъистаналда чIван вуго цо динияв хIаракатчи гьев ккола Губден росдал мадрасалъул мугIалим МухIамад Биярсланов. Гъоркьисала чIван вуго щуго чи. Гьезда гьоркьов вукIана тIарикъаталъул устар ЧIикIаса СагIид Афанди ва цIар рагIарав гIалимчи Бакълъухъа ГIабдулгъафурил МухIамад.


Пожалуйста, подождите
XS
SM
MD
LG