МагъчIваялъе рес

Дагъистаналъул Пенсиязул Фондалда нухмалъулев хисана


24 маялда Дагъистаналъул Пенсиязул Фондалъул нухмалъулесул ишал тIуралевлъун тIамуна Азнавур ХIажимирзоев. Гьеб хъулухъ гьес гьабизе буго лъагIел ахиралде щвезегIан. Гьелдаго цадахъ ХIажимирзоевасда тIад къан буго гьеб Фондалъул нухмалъулев хисулесул ишги.

Дагъистаналъул Пенсиязул Фондалъул нухмалъулесул хъулухъ эркенлъун букIана гьанжелъагIан гьенив вукIарав Сагид МуртазагIалиев цIех-рехалде кьуралдаса нахъе. Официалияб куцалда абуни, гьев вугеб бакI лъалеб гьечIо. ЦIех-рехчагIазул баяназда рекъон, МуртазагIалиевасде гIайиб гIунтIизабулеб буго гьес терроризмалъе гIарац биччанин, пачалихъиял хъулухъчагIи чIвазе къасд гьабунилан.

Дагъистаналда биччалеб «Черновик» газеталъул сайталда хъвалеб буго Пенсиязул Фондалъул нухмалъиялде кандидатураби хIисабалда рехсолел рукIанин республикаялъул парламенталъул вице-спикер СайгидахIмад АхIмадовги, МугIрузул мухъалда республикаялъул бетIерасул официалияв вакил ГIабдулмуслим ГIабдулмуслимовги, туризмалъул министр МухIамад ГIисаевги.

XS
SM
MD
LG