Россиялда гьукъараб «Исламияб пачалихъ» абураб террористияб гIуцIиялъ Европаялда террористиял акцияби тIоритIиялъе хIадур гьавун вуго бищун дагь босун 400 хвалде унев. Гьелъул хIакъалъулъ ГIиракъалдаги Европаялъул улкабаздаги хIалтIулел хасал хъулухъазул вакилзабазда базабун, хъвалеб буго Associated Press агентлъиялъ.
Гьелго вакилзабазул рагIабазда, террористал хIадур гьарулел рагIула ГIиракъалдаги Сириялдаги ругел «Исламияб пачалихъ» гIуцIиялъул мархьиязда. Европаялде ва Совет Союз биххун хадур рижарал пачалихъалде щун хадуб, гьез гIуцIизе кколел руго гьисинал террористиял къокъаби ва гьаризе кколел руго терактазул серияби. Дагьалъ цебе аресталде гъоркье восарав Парижалда терактал гIуцIцIарав СалахI ГIабдусаламица Бельгиялда терактал гьабураб къокъа гIуцIун букIиналъул щаклъи буго цIех-реххчагIазул.
Бельгиялъул цIех-реххчагIаз халат бахъинабулеб буго кьвагьиязда цебе аэропорталда террористазде аскIове вачIун вукIарав гьезие кумек гьабулев вукIун ватизе бегьулев чи валагьиялъул операция. Щаклъи буго гьес теракт хIадур гьабулеб букIиналъул.