Парижалъул терактазул къурбаназул къадар, ахирисел баяназда рекъон, рехсолеб буго 128 чи абун. Лъукъун вуго 300 чи, гьезулги 80-яв рагIула захIматаб хIалалда.
Гьел терактазул жавабчилъи тIаде босун буго «Исламияб пачалихъ» абулеб террористияб къукъаялъ. Интернеталда гьез кьураб видеоялда мухIканго бицунеб буго Парижалда террористаз гьабулеб букIараб жоялъул. Лъазабулеб буго жалго чIвалез жалго кьвагьизарунин кодор рукIарал гулби лъугIараб мехалдайин. Франциялъул экспертаз кIвар буссинабулеб буго террористал кидаго рукIинчIел гIадин цоцалъ рекъон хIалтIулел рукIараб куцалде.
Видеоялъул автораз абулеб буго гьеб бугин Сириялда рагъулал ишалъулъ гIахьаллъиялъухъ Франциялдаса «Исламияб пачалихъалъ» къисас босийин. Франциялъул полициялъул баяназда рекъон, цо террористасул жаназаялда тIад батун буго Сириялдаса 25 сон барав чиясул паспорт. Гьеб уяб документищали лъазабизе буго экспертизаялъ.
Гьелде тIадеги лъалеб буго жалго кьвагьизарурав анкьго террористасул цояв хасал хъулухъазда лъалев Франциялдаса чи вукIин.
Франциялъул мухбираз кIвар буссинабулеб буго Парижалда ичIго батIи-батIияб тIадекIанцIи цоцада цадахъго гIадин гьабун букIиналде. ТIоцебесеб кьвагьи гьабун буго Франциялъул Стадионалда аскIоб Парижалда аскIоб бугеб Сен-Дениялда анцIгоялде 20 минута хIалтIараб мехалда. Гьеб мехалда гьенив вукIана улкаялъул президент Франсуа Оландги Франциялъул ва Германиялъул командаязда гьоркьоб футболалъул матч бихьулев. Хадусеб 40 минуталда жаниб Сен-Дениялда гьабун буго жеги кIиго кьвагьи ва Париж бакьулъ гьабун буго анлъго тIадекIанцIи. Цо «Батаклан» концертазул залалда хун вуго 80-ялдаса цIикIкIун чи. Полициялъ гьужум гьабизегIан ункъго сагIаталъ гьенир гъоркьлъалие нус-нус чи ккун вукIана ункъго террористас.