Араб анкьил шамат къоялъ Анкараялда гьабураб суицидалияб гьужумалъул хIасилалалда захIматго лъукъарав жеги лъабгояв гIумруялдаса ватIалъана. Гьелдалъун чIваразул гIаммаб къадар нусиялда кIиго чиясде бахун буго. Гьадин лъазабуна Туркиялъул Генералияб прокуротуроялъ. Гьелъул баяналда рекъон ккун вугин 13 чи.
Туркиялъул премьер-министр АхIмад Давудогълуца арбагI къоялъ лъазабуна, улкаялъул тарихалда бищун кIудияб теракт гьабиялда шаклъи бугезул цояз чанго моцI Сириялда банин, ва батизе бегьула гьезул бухьен бугин «Исламияб пачалихъ» абулеб террористикияблъун рикIкIунеб гIуцIиялъулгун.